శబరిమల యాత్రికులకు ఫ్రీ బస్సు.. కేరళకు సుప్రీంకోర్టు కీలక ఆదేశాలు

అయ్యప్ప స్వామి దర్శనం కోసం శబరిమల వచ్చే భక్తులకు ఉచిత బస్సు సౌకర్యం కల్పించేందుకు అనుమతివ్వాలని కోరుతూ సుప్రీంకోర్టులో విశ్వహిందూ పరిషత్ పిటిషన్ వేసింది. ఈ పిటిషన్‌ను విచారణకు చేపట్టిన సర్వోన్నత న్యాయస్థానం.. కేరళ ప్రభుత్వానికి నోటీసు జారీ చేసింది. ఈ అంశంపై స్పందన తెలియజేయాలని జస్టిస్‌ సూర్యకాంత్‌, జస్టిస్‌ కేవీ విశ్వనాథన్‌తో కూడిన ధర్మాసనం గురువారం ఆదేశించింది. గత ఏడాది వీహెచ్‌పీ ఇటువంటి పిటిషన్‌ను దాఖలు చేయగా.. కేరళ హైకోర్టు కొట్టివేసింది. దీంతో సర్వోన్నత న్యాయస్థానాన్ని ఆశ్రయించింది.

కేరళ రాష్ట్ర రోడ్డు రవాణా సంస్థ నడుపుతున్న బస్సులు సరిపోవడం లేదని, దీంతో భక్తులు అధిక సమయం నిరీక్షించాల్సి వస్తోందని వీహెచ్‌పీ వాదిస్తోంది. అందువల్ల ఉచితంగా బస్సులు నడపటానికి అనుమతించాలని విజ్ఞప్తి చేసింది. వీహెచ్‌పీ తరఫున వాదనలు వినిపించిన సీనియర్ లాయర్ వి చితంబరేశ్.. భక్తులకు ఉచిత బస్సు సౌకర్యం కల్పించాలని భావిస్తున్నట్టు తెలిపారు. నీలక్కల్-పంబా మార్గమంలో కాదా? అని ధర్మాసనం ప్రశ్నించగా... ఈ మార్గాన్ని దేవస్వం నిర్వహిస్తోందని, తమ పథకం ఆ మార్గంలో కాదని సీనియర్ న్యాయవాది చెప్పారు. శబరిమల దిగువన ఉన్న పంబ వరకు యాత్రికులను ప్రైవేట్ వాహనాల్లో వెళ్లేందుకు ఇప్పటి వరకు అనుమతించామని తెలిపారు.

‘కొండల మీదుగా మరో 4 కి.మీ. నడుచుకుంటూ అయ్యప్ప సన్నిధానానికి చేరుకోవచ్చు.. అయితే కోవిడ్‌ కారణంగా నీలక్కల్ వద్ద పంబకు 22 కి.మీ ముందే ప్రైవేట్‌ వాహనాల ప్రవేశాన్ని నిలిపివేశారు.. నీలక్కల్ నుంచి పంబకు వెళ్లేందుకు యాత్రికులు కేఎస్‌ఆర్‌టీసీ బస్సులపైనే ఆధారపడాల్సి వస్తోంది. కేఎస్ఆర్టీసీ ఛార్జీలు, పండుగ ఛార్జీలను ఎక్కువగా వసూలు చేస్తోంది. నీలక్కల్‌లోని డిపోలో యాత్రికులు పడిగాపులు కాయాల్సి వస్తోంది. సుదీర్ఘ నిరీక్షణ కారణంగా ఈ సీజన్‌లో కొండపైకి వెళ్లే మార్గంలో ఒక చిన్నారి ప్రాణాలు కోల్పోయింది’ అని ధర్మాసనానికి వివరించారు. ప్రతిపాదిత ఉచిత సర్వీస్ బస్సు మధ్యలో ఆగదు లేదా పంబ వద్ద పార్కింగ్ ఉండదని చెప్పారు. అయితే, దీనికి కేరళ హైకోర్టు అనుమతి నిరాకరించింది. కాంట్రాక్ట్ క్యారేజీకి ప్రత్యేక అనుమతి ఇవ్వడం కారిడార్ పరిమితితో స్టేజ్ క్యారేజ్‌తో సమానమని అభిప్రాయపడింది.