భారతీయ విద్యార్థులకు గుడ్‌న్యూస్ చెప్పిన ఫ్రాన్స్ అధ్యక్షుడు.. రిపబ్లిక్ డే వేళ శుభవా

భారత 75 వ గణతంత్ర వేడుకల్లో ముఖ్య అతిథిగా పాల్గొన్న ఫ్రాన్స్‌ అధ్యక్షుడు ఇమాన్యుయేల్‌ మెక్రాన్‌ భారతీయ విద్యార్థులకు శుభవార్త అందించారు. రిపబ్లిక్ డే సందర్భంగా ఎక్కువ మంది భారతీయ విద్యార్థులు ఫ్రాన్స్‌లో చదువుకునేలా ఏర్పాట్లు చేస్తామని స్పష్టం చేశారు. ఇందులో భాగంగా 2030 నాటికి దాదాపు 30 వేల మంది భారత విద్యార్థులను ఫ్రాన్స్‌కు ఆహ్వానించాలని లక్ష్యంగా పెట్టుకున్నామని ఇమాన్యుయేల్ మెక్రాన్ పేర్కొన్నారు.

దీంతోపాటు భారతీయ విద్యార్థులకు ఫ్రాన్స్‌ అందించే సహాయ సహకారాల గురించి కూడా ఇమ్మాన్యుయేల్ మెక్రాన్ వివరించారు. ఫ్రెంచ్ మాట్లాడలేని భారత విద్యార్థుల కోసం యూనివర్సిటీల్లో ప్రత్యేకంగా ఇంటర్నేషనల్ కోర్సులను ఏర్పాటు చేస్తామని హామీ ఇచ్చారు. వివిధ సంస్థల భాగస్వామ్యంతో ఒక నెట్‌వర్క్‌ను సృష్టించి.. దాని ద్వారా ఎక్కువమంది విద్యార్థులకు అవకాశాలు కల్పిస్తామని చెప్పారు. ఫ్రాన్స్‌లో చదివిన పూర్వ విద్యార్థులకు వీసా సదుపాయం కూడా కల్పిస్తామని ఇమ్మాన్యుయేల్ మెక్రాన్ తెలిపారు.

భారత్‌లో రెండు రోజుల పాటు పర్యటించేందుకు గురువారం వచ్చిన ఇమ్మాన్యుయేల్ మెక్రాన్‌.. ప్రత్యేక విమానంలో రాజస్థాన్‌లోని జైపూర్‌ చేరుకున్నారు. అక్కడ జైపూర్‌ శివారులోని ఆమెర్‌ కోటను ఇమ్మాన్యుయేల్ మెక్రాన్‌ సందర్శించారు. ఈ సందర్భంగానే అక్కడ ఉన్న హస్తకళల దుకాణంలో అయోధ్య రామమందిర నమూనాను కొనుగోలు చేసి ప్రధాని మోదీ మెక్రాన్‌కు బహూకరించారు. అనంతరం సాహూ చాయ్‌వాలా వద్ద మసాలా టీ తాగి సాధారణ వ్యక్తుల్లా ముచ్చట్లు పెట్టుకున్నారు. అనంతరం ఛాయ్ డబ్బులను ఇమ్మాన్యుయేల్ మెక్రాన్.. యూపీఐ ద్వారా చెల్లించారు. అందుకు ప్రధాని మోదీ సూచనలు కూడా చేశారు.