రికార్డు నెలకొల్పిన నితీశ్.. రికార్డుస్థాయిలో తొమ్మిదోసారి బిహార్ సీఎంగా ప్రమాణం

బిహార్ ముఖ్యమంత్రి జేడీయూ అధినేత నితీశ్ కుమార్ రికార్డుస్థాయిలో తొమ్మిదో సారి ప్రమాణస్వీకారం చేశారు. రాజ్‌భవన్‌లో నితీష్‌ కుమార్‌తో గవర్నర్ రాజేంద్ర అర్లేకర్ ప్రమాణం స్వీకారం చేయించారు. తొమ్మిదోసారి ముఖ్యమంత్రిగా ప్రమాణం చేసిన నితీశ్.. సరికొత్త రికార్డును నెలకొల్పారు. నితీశ్‌తో పాటు మరో ఎనిమిది మందిని మంత్రులుగా ప్రమాణస్వీకారం చేయించారు గవర్నర్. బీజేపీకి చెందిన విజయ్ కుమార్ సిన్షా, సామ్రాట్ చౌదరిలను డిప్యూటీ సీఎంలుగా నియమించారు. జేడీయూ నుంచి ముగ్గురు, బీజేపీ నుంచి ముగ్గురు, హిందూస్థాన్ ఆవామ్ మోర్చా నుంచి ఇద్దరు, ఒక స్వతంత్ర ఎమ్మెల్యే మంత్రులుగా ప్రమాణస్వీకారం చేశారు. ఈ ప్రమాణ కార్యక్రమానికి బీజేపీ జాతీయ అధ్యక్షుడు జేపీ నడ్డా హాజరయ్యారు. మహాకూటమి నుంచి బయటకొచ్చిన నితీశ్.. మళ్లీ ఏడాదిన్నర తర్వాత ఏన్డీయేతో జట్టుకట్టారు.

జేడీయూకు చెందిన బిజేంద్ర ప్రసాద్, విజయ్ కుమార్ చౌదరి, శ్వరణ్ కుమార్‌లు, బీజేపీకి చెందిన విజయ్ సిన్హా, సామ్రాట్ చౌదరి, ప్రేమ్ కుమార్, హిందూస్థానీ అవామీ మోర్చాకు చెందిన సతీశ్ కుమార్ సుమన్, స్వతంత్ర ఎమ్మెల్యే సుమిత్ కుమార్‌లను మంత్రివర్గంలోకి తీసుకున్నారు. బిహార్ ముఖ్యమంత్రి పదవికి ఆదివారం ఉదయం రాజీనామా చేసిన నితీశ్ కుమార్.. మళ్లీ బీజేపీ మద్దతుతో సాయంత్రమే సీఎంగా ప్రమాణం చేయడం విశేషం. జీవితంలో ఇక బీజేపీతో కలిసేది లేదని 2022 సెప్టెంబరులో ప్రకటించిన.. నితీశ్ ఏడాదిన్నరలోనే మళ్లీ ఎన్డీఏతో జట్టుకట్టారు. మరికొద్ది రోజుల్లో సార్వత్రిక ఎన్నికలు జరగనున్న వేళ.. బిహార్‌ రాజకీయ పరిణామాలు ఉత్కంఠ రేపుతున్నాయి