క్యూ లైన్లోనే కుప్పకూలిన విదేశీయుడు.. సీపీఆర్ చేసి కాపాడిన జవాన్

ఓ సీఐఎస్ఎఫ్ జవాన్ చూపిన సమయస్ఫూర్తి నిండు ప్రాణాన్ని కాపాడింది. సృహ తప్పి పడిపోయిన విదేశీయుడికి సీఐఎస్‌ఎఫ్ ఎస్సై సీపీఆర్ నిర్వహించి ప్రాణాలు నిలబెట్టారు. జనవరి 26వ తేదీ మధ్యాహ్నం సమయంలో ఢిల్లీలోని ఇందిరా గాంధీ అంతర్జాతీయ విమానాశ్రయంలో ఈ సంఘటన జరిగింది. ఎస్సై సమయస్ఫూర్తితో వ్యవహరించి సీపీఆర్ చేయడం ద్వారా అతను తిరిగి తన స్వదేశానికి చేరుకోగలిగాడని సీఐఎస్ఎఫ్ అధికార ప్రతినిధి తెలిపారు.

జనవరి 26వ తేదీన ఢిల్లీ విమానాశ్రయంలో రద్దీ కొనసాగుతోంది. అక్కడికి వచ్చిన ప్రయాణికులను భద్రతా తనిఖీలు చేస్తున్నారు సీఐఎస్ఎఫ్ అధికారులు, సిబ్బంది. ఈ క్రమంలో క్యూ లైన్ లో నిలుచున్న ఫ్రాన్స్ దేశస్థుడు బెర్ట్రాండ్ పాట్రిక్ (63) ఒక్కసారిగా కుప్ప కూలిపోయాడు. అపస్మారక స్థితిలోకి వెళ్లాడు. అక్కడే విధులు నిర్వర్తిస్తున్న సీఐఎస్ఎఫ్ సబ్ ఇన్‌స్పెక్టర్ పునీత్ కుమార్ తివారీ వెంటనే స్పందించి ఆ విదేశీయుడికి సీపీఆర్ చేసి ప్రాణాలు కాపాడాడు. ఎస్సై సీపీఆర్ (cardiopulmonary resuscitation) చేసిన క్రమంలో స్పృహలోకి వచ్చాడు పాట్రిక్. జనవరి 26 వ తేదీన ఢిల్లీ నుంచి ప్యారిస్ వెళ్తున్న ఎయిర్ విస్తారా ఫ్లైట్ లో వెళ్లేందుకు బెర్ట్రాండ్ పాట్రిక్ ఢిల్లీ విమానాశ్రయానికి చేరుకున్నాడు. ఈ సమయంలోనే ఆయన స్పృహ తప్పి పడిపోయాడు.

సీపీఆర్ చేసిన తర్వాత స్పృహలోకి వచ్చిన ఫ్రాన్స్ దేశస్థుడు బెర్ట్రాండ్ పాట్రిక్‌ను విమానాశ్రయంలోని డాక్టర్‌కు చూపించారు. ప్రాథమిక చికిత్స అందించారు అక్కడి వైద్యులు. పాట్రిక్ కాస్త కోలుకున్న క్రమంలో అతను ఫ్లైట్ జర్నీ చేసేందుకు సిద్ధమేనని తెలిపారని సీఐఎస్ఎఫ్‌ అధికార ప్రతినిధి తెలిపారు. సీఐఎస్ఎఫ్ అధికారుల అప్రమత్తత, సరైన సమయానికి స్పందించడం కారణంగా ఒక ప్రాణాన్ని కాపాడగలిగామన్నారు.