బాలరాముడి విగ్రహం శిల కోసం భార్య తాళి తాకట్టు పెట్టిన కాంట్రాక్టర్

అయోధ్యలోని భవ్యమైన రామమందిరం కల 500 ఏళ్ల తర్వాత సాకారమైంది. జనవరి 22న ప్రతిష్ఠించిన బాలక్ రామ్ విగ్రహాన్ని చూసి భక్త జనకోటి తరిస్తోంది. ఆ విగ్రహాన్ని రూపొందించిన కర్ణాటకలోని మైసూర్‌కు చెందిన శిల్పి అరుణ్‌ యోగిరాజ్‌పై ప్రశంసలు కురుస్తున్నాయి. అయితే, విగ్రహం కోసం పొలంలో నుంచి శిలను బయటకు తీసిన సమయంలో తనకు ఎదురైన కష్టాలను, కన్నీటి వ్యతను కాంట్రాక్టర్ శ్రీనివాస్‌ నటరాజన్ వెల్లడించారు. మైసూరు జిల్లా హెచ్‌డీ కోట తాలూకా బుజ్జేగౌడనపురలోని ఓ పొలంలో రాముడి విగ్రహం తయారీకి శిల ఉన్నట్లు మొదట గుర్తించారు.

దాన్ని బయటకు తీసేందుకు పొలం యజమాని హెచ్ రామదాస్.. కాంట్రాక్టర్ శ్రీనివాస్‌తో ఒప్పందం కుదుర్చుకున్నారు. పది మీటర్ల లోతులో నుంచి దాన్ని బయటకు తీసినందుకు రైతుకు కొంత మొత్తాన్ని చెల్లించారు. కార్మికులకు చెల్లింపుల అనంతరం కాంట్రాక్టర్‌కు రూ.25 వేల వరకు మిగిలింది. ఇక్కడ నుంచి ఆయనకు కష్టాలు మొదలయ్యాయి. అనుమతి తీసుకోకుండా పొలాన్ని తవ్వి, శిలను బయటకు తీశారంటూ శ్రీనివాస్‌కు కర్ణాటక గనులు, భూగర్భ శాఖ అధికారులు నోటీసులు జారీ చేశారు. రూ.80 వేలు జరిమానా చెల్లించాలని, లేదంటే క్రిమినల్‌ కేసు నమోదు చేస్తామని హెచ్చరించారు.

ఈ మొత్తం చెల్లించడానికి డబ్బు లేకపోవడంతో తన భార్య తాళిని తాకట్టు పెట్టాల్సి వచ్చిందని శ్రీనివాస్ తెలిపారు. అప్పటికి తనకు వివాహమై కేవలం ఎనిమిది నెలలే అయిందని.. నోటీసులు రావడంతో విధిలేని పరిస్థితుల్లో తాళిబొట్టును తాకట్టు పెట్టి డబ్బు చెల్లించానని శ్రీనివాస్‌ చెప్పారు. అప్పట్లో ఆ రాయిని రాముడి శిల్పం కోసం ఎంచుకుంటారని ఆయనకు తెలికపోవడం గమనార్హం. తరువాతి పరిణామాల్లో.. ఆ శిలను చూసినవారు మేలురకమని గుర్తించి అయోధ్యకు తరలించారు.