అమెరికా అధ్యక్షుడిని వదలని 'డీప్‌ఫేక్'.. వైట్‌హౌస్ ఆందోళన

అగ్రరాజ్యం అమెరికాలో డీప్ ఫేక్ కలకలం సృష్టిస్తోంది. అమెరికా అధ్యక్షుడు జో బైడెన్, ఆ దేశానికి చెందిన ప్రముఖ గాయని టేలర్ స్విఫ్ట్‌నూ తాకింద్ డీప్ ఫేక్ సెగ. అధ్యక్షుడు జో బైడెన్ గొంతును అనుకరిస్తూ ముందుగానే రికార్డ్ టేసిన ఫోన్ కాల్స్ వైరల్‌గా మారాయి. అలాగే గాయని టేలర్ స్విఫ్ట్ అభ్యంతరకర వీడియోలు బయటకు రావడంతో అగ్రరాజ్య అధ్యక్ష భవనం వైట్ హౌస్ ఆందోళన వ్యక్తం చేసింది. ఈ సమస్య పరిష్కారానికి అన్ని చర్యలు తీసుకుంటామన్నారు వైట్ హౌస్ ప్రెస్ సెక్రటరీ కరీన్ జీన్ పియర్. 'తప్పుడు చిత్రాలు, సమాచారం వ్యాప్తంపై తీవ్ర ఆందోళన చెందుతున్నాం. ఈ సమస్య పరిష్కారం దిశగా అన్ని రకాల చర్యలు తీసుకుంటాం. దీనిని కట్టడి చేసే అంశలో సోషల్ మీడియా కంపెనీలదే కీలక పాత్ర అని గుర్తు చేశారు. ' అని వెల్లడించారు వైట్ హౌస్ ప్రెస్ సెక్రటరీ కరీన్ జీన్.

ఎక్స్ వంటి సోషల్ మీడియా ప్లాట్ ఫామ్స్ లో కఠిన నిబంధనలు ఉన్నప్పటికీ గాయని టేలర్ స్విఫ్ట్‌కు సంబంధించిన డీప్ ఫేక్ వీడియాలు తొలగించకపోవడంపై వైట్ హౌస్ ఆందోళన వ్యక్తం చేసింది. ఆమెకు సంబంధించిన డీప్ ఫేక్ వీడియోలు, చిత్రాలు సుమారు 17 గంటల పాటు సోషల్ మీడియాలో చక్కర్లు కొట్టినట్లు పలు మీడియాలు తెలిపాయి. ఎక్స్ ప్లాట్ ఫామ్‌లో పోస్ట్ చేసిన చిత్రాలు, వీడియాలకు 45 మిలియన్లకు పైగా వ్యూస్ వచ్చినట్లు తెలుస్తోంది. మరోవైపు.. ఈ వీడియోలపై గాయని టేలర్ స్విఫ్ట్ చట్టపరమైన చర్యలు తీసుకునేందుకు సిద్ధమవుతున్నట్లు సమాచారం.

ఈ ఏడాది ఆఖర్లో అమెరికా అధ్యక్ష ఎన్నికలు జరగనున్నాయి. ఎన్నికల అభ్యర్థిత్వం కోసం ప్రస్తుతం ప్రైమరీ పోల్స్ నిర్వహిస్తున్నారు. ఈ క్రమంలోనే గత వారం న్యూహాంప్ షైర్‌లో ప్రైమరీ ఎన్నికలు నిర్వహించారు. ఈ ఎన్నికల సందర్భంగా అక్కడి ఓటర్లతో పలు అంశాలపై అధ్యక్షడు జో బైడెన్ మాట్లాడినట్లు ముందుగా రికార్డు చేసిన కొన్ని ఫోన్ కాల్స్ సోషల్ మీడియాలో దర్శనమిచ్చాయి. ఈ ఎన్నికల్లో ఓటు వేయొద్దని ఆయన ఓటర్లను కోరినట్లు ఆ ఆడియో కాల్స్ ఉండడం గమనార్హం.