టీడీపీ, జనసేన మధ్య కాక రేపుతున్న సీటు.. ముగ్గురు మొనగాళ్లలో దక్కేదెవరికో

శాసనసభ ఎన్నికలకు సమయం దగ్గరపడుతున్న కొద్దీ ఏపీ రాజకీయాల్లో వేడి పెరుగుతోంది. ఓ వైపు జగన్ దూకుడుతో అభ్యర్థుల విషయంలో వైసీపీ ఓ అడుగు ముందే ఉంది. మరోవైపు టీడీపీ, జనసేన కూటమి మాత్రం అభ్యర్థుల విషయంలో ఆచితూచి వ్యవహరిస్తోంది. తమతో జతకట్టే విషయంలో బీజేపీ నుంచి ఎలాంటి ప్రకటనా లేకపోవటంతో అభ్యర్థుల ప్రకటన విషయంలో ప్రస్తుతానికి కూటమి వెనుకబడి ఉంది. అయితే కూటమి సంగతి అలా ఉంచితే లీడర్లు మాత్రం టికెట్ కోసం ఓ రేంజులో ప్రయత్నాలు సాగిస్తున్నారు. అలాంటి సీట్లలో ఒకటి విజయవాడ వెస్ట్..

విజయవాడ వెస్ట్ సీటుకోసం టీడీపీ, జనసేన నేతలు గట్టిగా ప్రయత్నిస్తున్నారు. టీడీపీ నుంచి బుద్ధా వెంకన్నతో పాటు మైనారిటీ నేత జలీల్ ఖాన్ ఈ సీటును ఆశిస్తున్నారు. అలాగే జనసేన నుంచి పోతిన మహేష్ పోటీ చేయాలనే ఆలోచనతో ఉన్నారు. పోతిన మహేష్ సంగతేమో కానీ.. జలీల్ ఖాన్, బుద్ధా వెంకన్న మాత్రం తమ అధినేత చంద్రబాబుపై ఒత్తిడి పెంచేందుకు తమ ప్రయత్నాలు ప్రారంభించారు. అందులో భాగంగా బుద్ధావెంకన్న ఇటీవలే విజయవాడలోని పశ్చిమ నియోజకవర్గంలో తన ఇంటి నుంచి కనకదుర్గమ్మ గుడి వరకు భారీ ర్యాలీ నిర్వహించారు. తెలుగుదేశం కోసం తాను కష్టపడి పనిచేస్తున్నానని, తన సేవలను గుర్తించి టికెట్ తనకే ఇవ్వాలని కోరుతున్నారు. పొత్తు ఉన్నా కూడా తనకే టికెట్ ఇవ్వాలని పవన్ కళ్యాణ్‌ను కూడా కోరాతనని అన్నారు.

బుద్ధా వెంకన్న స్పీడుతో జలీల్ ఖాన్ కూడా తన ప్రయత్నాలు ప్రారంభించారు. శుక్రవారం జలీల్ ఖాన్ సైతం భారీ బైక్ ర్యాలీ నిర్వహించారు. ఇదే సమయంలో మైనారిటీలకు టికెట్ ఇవ్వకపోతే తన అనుచరులు ఆత్మహత్య చేసుకుంటారేమోనంటూ సంచలన వ్యాఖ్యలు కూడా చేస్తున్నారు జలీల్ ఖాన్. అభివృద్ధి కోసమే అప్పట్లో వైసీపీని వదిలి టీడీపీలో జాయిన్ అయ్యానన్న ఆయన.. మైనారిటీలకు టికెట్ కోసం అవసరమైతే పవన్‌ను కలిసి పరిస్థితి వివరిస్తానని అంటున్నారు.

మరోవైపు టీడీపీ, జనసేన పొత్తులో భాగంగా విజయవాడలో ఓసీటు జనసేనకు కేటాయించే అవకాశం ఉందని ప్రచారం జరుగుతోంది. ఈ నేపథ్యంలో జనసేన నుంచి ఆ పార్టీ నేత పోతిన మహేష్ సైతం ఆశలు పెట్టుకున్నారు. తనకే టికెట్ వస్తుందనే ధీమాతో ఉన్నారు. ఈ పరిస్థితుల్లో బుద్ధా వెంకన్న, జలీల్ ఖాన్ బలప్రదర్శన.. జనసేన నేతలను సైతం కలవరపెడుతోంది. అయితే 2019 ఎన్నికల్లో ఇక్కడి నుంచి వైసీపీ తరుఫున వెల్లంపల్లి శ్రీనివాస్ గెలుపొందారు. అయితే ఇంఛార్జిల మార్పులో జగన్ ఆయనను విజయవాడ సెంట్రల్ నియోజకవర్గానికి మార్చారు. దీనిపై వెల్లంపల్లి సైతం కాస్త అసంతృప్తిగానే ఉన్నట్లు సమాచారం. మొత్తంగా అన్ని పార్టీల నుంచి విజయవాడ వెస్ట్ సీటు కోసం పోటీ తీవ్రంగా నెలకొంది. చివరకు ఇక్కడ ఏ పార్టీ తరుఫున ఎవరు బరిలోకి దిగుతారో.. ఎన్నికల్లో గెలుపు ఎవరిని వరిస్తుందనేది ఆసక్తిగా మారింది.