డబ్బు ఆశతో దారి తప్పి,,,,గంజాయి రవాణాచేస్తూ హైదరాబాద్ పోలీసులకు చిక్కిన ఏపీ పోలీసులు

తెలంగాణలో డ్రగ్స్, గంజాయి రవాణాను అడ్డుకునేందుకు తెలంగాణ ప్రభుత్వం కఠిన చర్యలు చేపడుతోంది. సీఎం రేవంత్ రెడ్డి సైతం ఈ విషయాన్ని సీరియస్‌గా తీసుకుని ప్రత్యేక శ్రద్ధ కనబరుస్తున్నారు. డ్రగ్స్ రవాణాపై ఉక్కుపాదం మోపాలంటూ పోలీసులను ఆదేశిస్తున్నారు. ఈ నేపథ్యంలో పోలీసులు సైతం సోదాలు, తనిఖీలు నిర్వహిస్తూ డ్రగ్స్, గంజాయి రవాణాను అడ్డుకుంటున్నారు. అయితే తాజాగా గంజాయిని తరలిస్తూ ఏపీ పోలీసులు పట్టుబడటం కలకలం రేపుతోంది. ఏపీకి చెందిన ఇద్దరు కానిస్టేబుల్స్ గంజాయిని తరలిస్తూ బాలానగర్ టాస్క్ ఫోర్స్ పోలీసుల చేతికి చిక్కారు.

ఇక అసలు విషయంలోకి వస్తే.. గురువారం రాత్రి బాచుపల్లిలో గంజాయి అమ్మడానికి ఇద్దరు వ్యక్తులు ప్రయత్నిస్తున్నట్లు బాలానగర్ ఎస్వోటీ పోలీసులకు సమాచారం అందింది. దీంతో సోదాలు చేపట్టిన పోలీసులు AP 39 QH 1763 నంబరున్న వాహనాన్ని ఆపి అందులో తనిఖీలు చేశారు. ఈ వాహనంలో 22 కేజీల గంజాయిని అక్రమంగా తరలిస్తున్నట్లు ఎస్వోటీ పోలీసులు గుర్తించారు. మొత్తం 11 ప్యాకెట్లలో ఈ గంజాయిని ఉంచి తరలిస్తున్నట్లు గుర్తించారు. దీని విలువ సుమారు 8 లక్షల వరకూ ఉండొచ్చని అంచనా.

అయితే గంజాయిని స్వాధీనం చేసుకున్న పోలీసులు.. వాహనంలోని వారిని విచారించగా షాకింగ్ విషయాలు బయటపడ్డాయి. వాహనంలో గంజాయిని తరలిస్తున్న ఇద్దరు వ్యక్తులు కాకినాడలోని మూడో బెటాలియన్‌కు చెందిన హెడ్ కానిస్టేబుల్, కానిస్టేబుల్‌గా గుర్తించారు. నిందితులను ఏపీఎస్పీకి చెందిన సాగర్‌ పట్నాయక్‌, శ్రీనివాస్‌ అనే కానిస్టేబుళ్లుగా పోలీసులు తెలిపారు. గంజాయి సరఫరా ద్వారా పెద్ద మొత్తంలో డబ్బు సంపాదించవచ్చనే ఆశతో.. డ్యూటీకి సెలవుపెట్టి మరీ గంజాయిని అక్రమంగా సరఫరా చేస్తున్నట్లు పోలీసుల విచారణలో తేలింది. ఆరోగ్యం బాగాలేదని సెలవుపెట్టి మరీ నర్సీపట్నం నుంచి బాచుపల్లికి గంజాయి తరలించినట్లు విచారణలో వెల్లడైంది.

నిందితుల నుంచి మరింత సమాచారం రాబట్టేందుకు పోలీసులు తీవ్రంగా ప్రయత్నిస్తున్నారు. ఇదే మొదటిసారా లేక ఇంతకుముందు కూడా ఇలా అక్రమంగా రవాణా చేశారా అనే విషయాలను రాబట్టే పనిలో పడ్డారు. మరోవైపు గంజాయిని తరలిస్తూ హైదరాబాద్‌లో ఏపీ పోలీసులు పట్టుబడటంతో ఆంధ్రప్రదేశ్‌లోనూ రాజకీయంగా దుమారం రేపుతోంది. ఈ విషయంపై విపక్షాలు ప్రభుత్వాన్ని లక్ష్యంగా చేసుకుని విమర్శలు గుప్పిస్తున్నాయి.