శ్రీవారి భక్తులకు 3 రోజుల పాటు సర్వదర్శనం టైమ్ స్లాట్ టోకెన్లు రద్దు,,,టీటీడీ ఈవో ధర్మారెడ్డి వెల్లడి

కలియుగ ప్రత్యక్ష దైవం ఆ శ్రీనివాసుడు కొలువైన తిరుమలను నిత్యం వేలాది మంది దర్శించుకుంటూ ఉంటారు. ఎంతో కష్టపడి తిరుమలకు చేరుకునే భక్తులు స్వామివారిని చూసిన వెంటనే తాము పడిన కష్టాన్నంతా మర్చిపోతుంటారు. అలాగే శ్రీవారి దర్శనం కోసం వచ్చే భక్తులకు ఎలాంటి ఇబ్బంది కలగకుండా తిరుమల తిరుపతి దేవస్థానం కూడా చర్యలు తీసుకుంటూ ఉంటుంది. అయితే ఫిబ్రవరి 16న తిరుమలలో రథసప్తమి వేడుకలు ఘనంగా జరగనున్నాయి. ఈ విషయాన్ని దృష్టిలో ఉంచుకుని భక్తులను టీటీడీ అలెర్ట్ చేసింది.

రథసప్తమి నేపథ్యంలో ఫిబ్రవరి 15, 16, 17 తేదీల్లో సర్వదర్శనం టైమ్‌ స్లాట్‌ టోకెన్లను రద్దు చేస్తున్నట్లు టీటీడీ ఈవో ధర్మారెడ్డి వెల్లడించారు. రథసప్తమి సందర్భంగా తిరుమలకు వచ్చే భక్తులకు ఎలాంటి ఇబ్బంది తలెత్తకుండా ఉండేందుకు ఈ నిర్ణయం తీసుకున్నట్లు చెప్పారు. రథసప్తమి ఏర్పాట్లపై అన్నమయ్య భవన్‌లో టీటీడీ సిబ్బంది, పోలీసు అధికారులతో ఈవో ధర్మారెడ్డి సమావేశం నిర్వహించారు. రథసప్తమికి కొండకు వచ్చే భక్తులకు ఎలాంటి ఇబ్బందులు కలగకుండా చూడాలని ఆదేశించారు. అన్ని విభాగాలూ సమన్వయంతో పనిచేస్తూ వేడుకలు ఘనంగా జరిగేలా చూడాలన్నారు.

అలాగే భక్తుల కోసం మూడున్నర లక్షల లడ్డూలు అందుబాటులో పెట్టుకోవాలని ధర్మారెడ్డి ఆలయ అధికారులకు సూచనలు చేశారు. రథసప్తమి సందర్భంగా జరిగే శ్రీవారి వాహనసేవలను అందరూ చూసేలా శ్రీ వెంకటేశ్వర భక్తి ఛానెల్‌లో ప్రత్యక్ష ప్రసారం చేస్తామన్నారు. వాహన సేవల సందర్భంగా సాంస్కృతిక కార్యక్రమాలు ఏర్పాటు చేయాలన్న టీటీడీ ఈవో.. గ్యాలరీల్లో ఉండే భక్తుల కోసం మజ్జిగ, సాంబారన్నం, పెరుగన్నం, పొంగలి, పులిహోర, తాగునీటిని అందుబాటులో ఉంచాలని ఆదేశించారు.

సాధారణంగా బ్రహ్మోత్సవాల సమయంలో ఉదయం, సాయంత్రం స్వామివారు వాహనాలపై ఊరేగుతారు. కానీ రథసప్తమి రోజు మాత్రం ఏడు వాహనాలపై శ్రీవారు దర్శనమిస్తారు. అందుకే అంతటి పవిత్రమైన రోజున శ్రీదేవీ, భూదేవీ సమేత మలయప్పస్వామిని చూసేందుకు భక్తులు పెద్దసంఖ్యలో తిరుమలకు క్యూ కడతారు. భక్తుల రద్దీని దృష్టిలో ఉంచుకుని రథసప్తమి సందర్భంగా సర్వదర్శనం టైమ్ స్లాట్ టోకెన్లతో పాటుగా ఆర్జిత సేవలు, ప్రత్యేక దర్శనాలను కూడా టీటీడీ రద్దుచేసింది. అలాగే ఆలయంలో నిర్వహించే కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవలను కూడా రద్దుచేశారు.