తిరుమల శ్రీవారికి ఢిల్లీకి చెందిన భక్తుడి భారీ విరాళం.. వారం రోజుల్లో రెండోసారి

తిరుమల శ్రీవారికి మరో భక్తుడు భారీగా విరాళాలు సమర్పించారు. టీటీడీలోని పలు ట్రస్టులకు శుక్రవారం రూ.21 లక్షలు విరాళంగా అందింది. ఢిల్లీకి చెందిన రమా సివిల్ ఇండియా కన్స్ట్రక్షన్ ప్రైవేట్ లిమిటెడ్ సంస్థ ఎస్వీబీసీ ట్రస్టుకు రూ.11 లక్షలు, భువనేశ్వర్ కు చెందిన శివం కాండెన్ ప్రైవేట్ లిమిటెడ్ సంస్థ ఎస్వీ గో సంరక్షణ ట్రస్టుకు రూ.10 లక్షలు విరాళంగా అందించారు. ఈ మేరకు ఆ సంస్థల ప్రతినిధి తిరుపతికి చెందిన వై రాఘవేంద్ర విరాళం డీడీలను తిరుమల అన్నమయ్య భవనంలో టీటీడీ ఈవో ఏవీ ధర్మారెడ్డికి అందజేశారు.

మరోవైపు తిరుమల శ్రీవారి హుండీకి మరోసారి కాసుల వర్షం కురిసింది. జనవరి మాసంలో హుండీ ద్వారా రూ. 116.46 కోట్ల ఆదాయం లభించింది. 21 లక్షల 09 వేల మంది భక్తులు శ్రీవారిని దర్శించుకున్నారన్నారు. కోటి 3 లక్షల లడ్డులను భక్తులకు విక్రయించారు.. 46 లక్షల 46 వేల మంది భక్తులకు అన్నప్రసాద వితరణ చేశామన్నారు. 7 లక్షల 5వేల మంది భక్తులు శ్రీవారికి తలనీలాలు సమర్పించారు. రూ.100 కోట్లలకు పైగా ఆదాయం రావడం ఇది వరుసగా 23వ నెల కావడం విశేషం. గతేడాది జనవరితో పోలిస్తే మాత్రం మొత్తంగా రూ.7 కోట్ల ఆదాయం తగ్గింది.

మరోవైపు తిరుమలలో భక్తుల రద్దీ సాదారణంగా కొనసాగుతోంది.. 9 కంపార్టుమెంట్లలో వేచిఉన్నారు భక్తులు.. శ్రీవారి సర్వదర్శనానికి 6 గంటల సమయం పడుతున్నట్టు టీటీడీ పేర్కొంది.. గురువారం 57,223 మంది భక్తులు శ్రీవారిని దర్శించుకున్నారు.. అందులో 18,015 మంది భక్తులు తలనీలాలు సమర్పించారు.. గురువారం శ్రీవారి హుండీ ఆదాయం రూ.3.44 కోట్లుగా వెల్లడించింది టీటీడీ.