ఆంధ్రప్రదేశ్‌‌కు కేంద్ర పన్నుల్లో వాటా కింద రూ.49,364 కోట్లు

ఏపీ కేంద్రం శుభవార్త చెప్పింది. కొత్త ఆర్థిక సంవత్సరంలో కేంద్ర పన్నుల్లో వాటా కింద ఏపీకి రూ.49,364 కోట్లు రానున్నాయి. అలాగే తెలంగాణకు రూ.25,639 కోట్లు రానున్నాయి. 2023-24 బడ్జెట్‌ కంటే ఏపీకి రూ.4,666 కోట్లు, తెలంగాణకు రూ.2,423 కోట్లు ఎక్కువ మొత్తం రానుంది. 15వ ఆర్థిక సంఘం నిర్దేశించిన దామాషాను అనుసరించి మొత్తం కేంద్ర పన్నుల్లో ఆంధ్రప్రదేశ్‌కు 4.047%, తెలంగాణకు 2.102% వాటాను కేంద్రం పంపిణీ చేస్తోంది. ఆర్థిక మంత్రి నిర్మలా సీతారామన్ పొందుపరిచిన పద్దుల ప్రకారం అన్ని రాష్ట్రాలకు కలిపి.. గతం కంటే రూ.1,15,289 కోట్లు (10.43%) అధిక మొత్తం రానుంది. జీఎస్టీ పరిహారం లోటును భర్తీ చేయడానికి 2020-21, 2021-22ల్లో ఆంధ్రపదేశ్‌కు రూ.5,583.19 కోట్లు, తెలంగాణకు రూ.6,949.49 కోట్ల మేర రుణం ఇచ్చినట్లు కేంద్రం తెలిపింది.

రాజధాని అమరావతిని ఇటు విజయవాడకు, అటు గుంటూరుకు అనుసంధానం చేసేలా కొత్త రైల్వే లైన్‌కు బడ్జెట్‌లో రూ.వెయ్యి కేటాయించారు. రూ.2,679 కోట్ల వ్యయమయ్యే ఈ లైన్‌కు గత ఐదేళల్లో రూ.2.20 కోట్లు మాత్రమే ఖర్చు చేశారు. అది కూడా సర్వేల కోసం వెచ్చించిందే. ఇపుడు రూ.వెయ్యి ఇస్తామనడం ఆసక్తికరంగా మారింది. రాష్ట్రంలో గతంలో మంజూరైన వివిధ లైన్లకు కూడా రూ.వెయ్యి నుంచి గరిష్ఠంగా రూ.10 లక్షలు ప్రకటించారు. విశాఖ కేంద్రంగా ఏర్పాటు చేయనున్న దక్షిణ కోస్తా జోన్‌ కార్యాలయాలు తదితరాలకు కలిపి రూ.170 కోట్లు వ్యయం అవుతుందని గతంలో అంచనా వేయగా, దీనికి ఇప్పుడు ఇస్తామంటున్నది కేవలం రూ.9 కోట్లు.

కేంద్ర తాత్కాలిక బడ్జెట్‌ను ప్రవేశపెట్టగా, అందులో రైల్వే శాఖకు సంబంధించిన వివరాలను విడుదల చేశారు. వాటిలో రాష్ట్రానికి చెందిన కీలక ప్రాజెక్టుల పరిస్థితి చూస్తే ముక్కున వేలేసుకోవాల్సిందే. మొత్తంగా రాష్ట్రంలోని దక్షిణ మధ్య రైల్వేలోని విజయవాడ, గుంటూరు, గుంతకల్లు డివిజన్లు, తూర్పుకోస్తా రైల్వేలోని వాల్తేరు డివిజన్‌కు కలిపి రూ.9,138 కోట్లు కేటాయించారు. కేంద్రం కొన్ని నిధులతో సరిపెట్టింది. మొత్తంగా ఈసారి బడ్జెట్‌లో రాష్ట్రంలోని రెండు, మూడో లైన్లకు మాత్రమే కొంత ఆశాజనకంగా నిధుల కేటాయింపు జరిగింది.