భారత్‌తో వివాదం.. మాల్దీవులకు సాయం చేస్తామని పాకిస్థాన్ హామీ

ఇటీవల భారత్‌, మాల్దీవుల మధ్య దౌత్య పరమైన వివాదం నెలకొంది. ఈ నేపథ్యంలోనే ఓ వైపు భారత్‌తో వివాదం కొనసాగుతున్న వేళ.. మాల్దీవులు అధ్యక్షుడు మహ్మద్ మొయిజ్జూ చైనాలో పర్యటించడం మరింత తీవ్ర చర్చనీయాంశంగా మారింది. ఆ తర్వాత మాల్దీవులు, చైనా మధ్య పరస్పర సహకారానికి సంబంధించి ఒప్పందాలు జరిగాయి. ఈ క్రమంలోనే పాకిస్థాన్ కూడా ఈ వ్యవహారంలోకి ప్రవేశించడం సంచలనంగా మారింది. మాల్దీవులకు సహాయ సహకారాలు అందిస్తామని పాక్ తాత్కాలిక ప్రధాని అన్వర్ ఉల్ హాక్ కాకర్ పేర్కొనడం గమనార్హం. అయితే ప్రస్తుతం తీవ్ర ఆర్థిక సంక్షోభంతో కొట్టుమిట్టాడుతున్న పాకిస్థాన్.. సహాయం కోసం ప్రపంచ దేశాలు, ప్రపంచ సంస్థల ముందు అడుక్కుంటోంది. అలాంటి పాకిస్థాన్ మాల్దీవులకు సాయం చేస్తామని ప్రకటించడం హాస్యాస్పదంగా ఉంది.

భారత్‌ను వ్యతిరేకిస్తున్న మాల్దీవులకు సాయం చేసేందుకు పాకిస్థాన్‌ ముందుకు రావడం విశేషం. పాకిస్థాన్ తాత్కాలిక ప్రధాని అన్వర్ ఉల్ హక్ కకర్.. తాజాగా మాల్దీవులు అధ్యక్షుడు మహ్మద్ మొయిజ్జూ మధ్య ఫోన్‌ సంభాషణ జరిగినట్లు సంబంధిత వర్గాలు తెలిపాయి. మాల్దీవులు అభివృద్ధికి పాకిస్థాన్ సహాయం చేస్తుందని.. పాక్ తాత్కాలిక ప్రధాని హామీ ఇవ్వడం గమనార్హం. ఈ ఘటన భారత్‌తో మాల్దీవులకు జరుగుతున్న దౌత్య వివాదం నడుస్తున్న వేళ జరగడం ప్రాధాన్యం సంతరించుకుంది. మాల్దీవులు, పాకిస్థాన్ మధ్య ద్వైపాక్షిక సంబంధాలను మరింత బలోపేతం చేసే మార్గాలపై ఇరువురు నేతలు చర్చించారు. ప్రాంతీయ సహకారంతో పాటు అంతర్జాతీయ స్థాయిలో మాల్దీవులకు పాకిస్థాన్ సహకారాన్ని పెంపొందించే మార్గాలపై కూడా మహ్మద్ మొయిజ్జూ, అన్వర్ ఉల్ హాక్ కాకర్ చర్చించారు.

మాల్దీవులు - పాకిస్తాన్ మధ్య 1966 జూలై 26 వ తేదీన దౌత్య సంబంధాలు ప్రారంభం అయ్యాయి. ఇక ఈ రెండు దేశాల మధ్య మరో బలమైన బంధంగా చైనా నిలిచింది. భారత్‌ పట్ల నిరంతం విషం చిమ్మే పాకిస్థాన్‌ను.. చైనా ఎప్పుడూ ఓ పావు లాగా వాడుకుంటున్న విషయం తెలిసిందే. అటు పాకిస్థాన్ కూడా భారత్ పట్ల అక్కసుతోనే చైనా ఆడించిన విధంగా ఆడుతుందని అందరికీ తెలిసిన విషయమే. ఇక చైనాకు మద్దతు ప్రకటించే మహ్మద్ మొయిజ్జూ కూడా భారత్ పట్ల అక్కసు వెళ్లగక్కుతూ.. మన దేశానికి శత్రువులుగా ఉన్న దేశాలతో జత కడుతున్నారు. ఈ క్రమంలోనే పాక్, మాల్దీవుల మధ్య తాజాగా చర్చలు జరగడం అవే సంకేతాలను చూపిస్తున్నాయి.

అయితే పైకి మాల్దీవులకు అన్ని రకాలుగా సహాయం చేస్తామని పాక్ ప్రకటిస్తున్నా ప్రస్తుత పరిస్థితి మాత్రం అందుకు భిన్నంగా ఉందని అందరికీ తెలిసిందే. ఎందుకంటే ఇప్పటికే తీవ్ర ఆర్థిక, రాజకీయ సంక్షోభంతో పతనం అంచున కొట్టుమిట్టాడుతున్న పాకిస్థాన్.. మాల్దీవులకు సహాయ సహకారాలు అందిస్తామని చెప్పడం ఓ జోక్ లాగా ఉంది. రోజు రోజుకూ పాకిస్థాన్ ఆర్థిక వ్యవస్థ క్షీణించి ద్రవ్యోల్బణం ఆకాశాన్ని తాకుతున్న వేళ.. పాక్ తాత్కాలిక ప్రధాని చేసిన వ్యాఖ్యలు ప్రస్తుతం చర్చకు దారి తీస్తున్నయి. మరోవైపు.. ప్రధాని నరేంద్ర మోదీ పట్ల మాల్దీవులుకు చెందిన నేతలు, మంత్రులు చేసిన వ్యాఖ్యలతో తీవ్ర వివాదాస్పదం అయిన వేళ.. భారతీయ పర్యాటకులు పర్యాటకం కోసం మాల్దీవులను బహిష్కరించారు. దీంతో మాల్దీవులు పర్యాటక రంగం తీవ్ర ఇబ్బందులు పడుతుంది.