రామయాణంలోని విలన్లంతా ఏపీలోనే ఉన్నారు: జగన్

14 ఏళ్లు సీఎంగా ఉండి కూడా చంద్రబాబు ఉద్ధరించింది ఏమీలేదంటూ సీఎం జగన్ విమర్శించారు. ఏ రోజూ పేదల అకౌంట్లోకి రూపాయి కూడా వేసింది లేదంటూ ఆరోపించారు. పేదల తరుఫున నిలబడేది, వారికి అండగా ఉండేది వైసీపీ ప్రభుత్వమేనన్న జగన్.. వచ్చే ఎన్నికల్లో చంద్రబాబు కుట్రలు, కుతంత్రాలను చీల్చి చెండాడాలంటూ దెందలూరు సిద్ధం సభ వేదికగా పిలుపునిచ్చారు. రామాయణం, మహాభారతంలో ఉన్న విలన్లందరూ మన రాష్ట్రంలో ఉన్నారన్న సీఎం.. తనపై పోరాటానికి ఇతర పార్టీల్లోని కోవర్టులు అంతా ఏకమవుతున్నారని విమర్శించారు. ఇక తానెప్పడూ ఒంటరిని కాదని.. ప్రజలు, దేవుడే తనకు అండగా ఉంటారంటూ భావోద్వేగంగా ప్రసంగించారు.

వచ్చే శాసనసభ ఎన్నికల్లో ప్రజలు కృష్ణుడు అయితే తనది అర్జునుడి పాత్రగా జగన్ అభివర్ణించారు . చంద్రబాబు, పవన్ నాన్ రెసిడెన్స్ పొలిటీషియన్లన్న జగన్.. ఏపీ కోసం వారి చేసిందేమీలేదని అన్నారు. మూడు సార్లు ముఖ్యమంత్రిగా చేసిన చంద్రబాబు నిరుపేదల కోసం ఏమైనా చేశారా అంటూ నిలదీశారు. టీడీపీ పాలనలో జన్మభూమి కమిటీల ద్వారా అవినీతి జరిగిందనీ, జన్మభూమి కమిటీలు లంచాలకు మారుపేరుగా మారాయని అన్నారు. వైసీపీ అధికారంలోకి వచ్చాక వాలంటీర్ వ్యవస్థ ద్వారా పారదర్శకంగా పాలన అందిస్తున్నట్లు చెప్పుకొచ్చారు. నగదు బదిలీ ద్వారా ఆర్థికంగా సహకారం అందిస్తున్నామని, నాడు నేడు ద్వారా పాఠశాలల రూపుమారుస్తున్నామని చెప్పారు.

2024 ఎన్నికలు ఏపీ భవిష్యత్తున నిర్ణయిస్తాయన్న జగన్.. అధికారం కోసం విపక్షాలు పెద్దపెద్ద హామీలు గుప్పిస్తాయని అన్నారు. అమలు చేయలేని హామీలు మ్యానిఫెస్టో రూపంలో రిలీజ్ చేస్తారని.. ఆ తర్వాత చెత్తబుట్టలో వేస్తారంటూ విమర్శించారు. అబద్ధాల పునాదుల మీద విపక్షాల ఎన్నికల ప్రచారం జరుగుతుందన్నారు. 2019లో వైసీపీ అధికారంలోకి వచ్చిననాటి నుంచి ఇప్పటి వరకూ 124 సార్లు బటన్ నొక్కి ప్రజల ఖాతాల్లోకి నగదును వేసినట్లు జగన్ గుర్తుచేశారు. పేదల అభ్యున్నతి కోసం సంక్షేమ పథకాలు అందిస్తున్న తనకు అండగా నిలవాలని, ప్రజల కోసం 124 సార్లు తాను బటన్ నొక్కితే.. ఎన్నికల్లో వైసీపీ ఫ్యాన్ గుర్తుపై జనం రెండుసార్లు బటన్ నొక్కాలని కోరారు. తనకు ప్రత్యేకంగా స్టార్ క్యాంపెయినర్లు అవసరం లేదన్న జగన్.. ప్రభుత్వ పథకాల ద్వారా లబ్ధిపొందిన ప్రజలే తనకు క్యాంపెయినర్లుగా అభివర్ణించారు. వైసీపీ పాలనలో జరిగిన అభివృద్ధిని ఇంటింటికీ వివరిస్తూ వచ్చే ఎన్నికల్లో వైసీపీ ఓటేయాలని ప్రచారం చేయాలని కోరారు.