12 ఏళ్లుగా ఇంట్లోనే మహిళ.. మలమూత్రాలకు చిన్న డబ్బా.. ఇంతకీ ఏం జరిగిందంటే

ఆమె ఇంట్లోనే జైలు జీవితం అనుభవించింది. ఒకటి కాదు రెండు కాదు ఏకంగా 12 ఏళ్లుగా ఆమె ఇంటి గడప దాటి బయటికి రాలేదు. అన్నీ ఇంట్లోనే చేసుకునేది. చివరికి మల మూత్రాల కోసం కూడా బయటికి రాలేదు. బాత్రూమ్ కోసం ఆమె ఒక చిన్న డబ్బాను మాత్రమే వాడింది. ఇంటి నుంచి బయటికి వెళ్లేటపుడు.. తన భర్త తాళం వేస్తే.. మళ్లీ ఆయన తిరిగి వచ్చే వరకు ఆ తాళం తీసేవారే ఉండరు. ఎవరైనా ఇంటికి వచ్చినా.. ఆయన తాళం తీసేవరకు లోపలికి వెళ్లడానికి వీలు ఉండదు. మరి ఎందుకు ఇలా చేశారు. అసలు ఏంటీ సంగతి. ఇది ఎక్కడ జరిగిందో ఈ స్టోరీలో తెలుసుకుందాం.

కొందరు వ్యక్తులు మనుషుల్లా కాకుండా జంతువుల్లా ప్రవర్తిస్తూ ఉంటారు. మరీ ముఖ్యంగా కొందరు తమ భార్య పట్ల గృహ హింసకు పాల్పడిన ఘటనలు సమాజంలో ఎన్ని జరిగినా ఇలాంటివి మళ్లీ మళ్లీ వెలుగు చూస్తూనే ఉన్నాయి. తాజాగా బయటికి వచ్చిన ఓ సంఘటన మరింత భయభ్రాంతులకు గురి చేస్తోంది. ఎందుకంటే ఓ మహిళకు 12 ఏళ్లుగా ఇల్లే జీవితం అయింది. కనీసం అడుగు కూడా బయటికి పెట్టే పరిస్థితి లేదు. ఇక మలమూత్రాల కోసం ఆ మహిళ ఒక చిన్న డబ్బాను ఉపయోగించిందంటే పరిస్థితి ఎంత దయనీయంగా ఉందో అర్థం చేసుకోవచ్చు. ఇలాంటి దారుణ సంఘటన కర్ణాటకలో జరిగింది.

మైసూరుకు చెందిన ఓ మహిళను ఆమె భర్త.. ఇంట్లోనే ఉంచి తాళం వేశాడు. అయితే ఒక్కరోజో రెండు రోజులో కాదు.. ఏకంగా 12 సంవత్సరాలుగా ఆ మహిళ ఇంటికే పరిమితం అయింది. దానికి కారణం శాడిస్ట్ అయిన భర్త. భార్యపై అనుమానం పెంచుకున్న ఆ భర్త ఆమెను ఇంటికే పరిమితం చేశాడు. అంతటితో ఆగకుండా ఆమెపై గృహ హింసకు కూడా పాల్పడేవాడు. అయితే ఆ మహిళ వయసు 30 ఏళ్లు కూడా దాటకపోవడం గమనార్హం. చివరికి విషయం తెలుసుకున్న పోలీసులు.. ఆ బంధీఖానా నుంచి మహిళకు విడుదల కల్పించారు. అయితే అంత చేసిన సైకో భర్తపై కనీసం పోలీసులకు కూడా ఆమె ఫిర్యాదు చేయకపోవడం గమనార్హం. తనను తన తల్లిదండ్రుల ఇంటికి పంపించాలని కోరింది.

పోలీసులు రక్షించిన తర్వాత ఆమె జరిగిన విషయం మొత్తం వివరించింది. తనకు పెళ్లి అయి 12 ఏళ్లు అయిందని తెలిపింది. అయితే అప్పటి నుంచి తన భర్త తనను చిత్ర హింసలు పెట్టేవాడని పేర్కొంది. ఇంట్లో ఉంచి తాళం వేసి చిత్రహింసలకు గురి చేసేవాడని ఆవేదన వ్యక్తం చేసింది. అయితే ఇలా చేస్తున్న తన భర్తను అడిగే వారే లేరని తెలిపింది. తమకు పుట్టిన పిల్లలు ఉదయం స్కూలుకు వెళ్లి తర్వాత తిరిగి వెనక్కి వచ్చినా ఇంటికి తాళం ఉండటంతో తన భర్త వచ్చేవరకు వారు బయటనే ఉండేవారని చెప్పింది. ఇంటి బయటనే ఉన్న తన పిల్లలకు కిటికీల ద్వారా ఆహారాన్ని అందించేదాన్నని వెల్లడించింది.

తన భర్తకు చాలా అనుమానం ఉండేదని.. అందుకే తనను చాలా చిత్రహింసలు పెట్టేవాడని తెలిపింది. అయితే తన భర్తకు తాను మూడో భార్యను అని ఆమె పేర్కొనడం గమనార్హం. గత 3 వారాలుగా వారి ఇంటినే పరిశీలించి ఈ విషయాన్ని కనిపెట్టినట్లు ఓ సీనియర్ పోలీస్ అధికారి ఒకరు వెల్లడించారు. ఆమె పూర్తిగా ఇంటికే పరిమితం కావడం.. ఆమె భర్త.. ఆమెను ఇంట్లోనే ఉంచి తాళం వేయడం.. తిరిగి వచ్చిన తర్వాతే తాళం తీయడం చేయడాన్ని గమనించినట్లు పోలీసులు తెలిపారు. ప్రస్తుతం ఆ శాడిస్ట్ భర్త నుంచి మహిళను కాపాడినట్లు పోలీసులు వెల్లడించారు. అయితే ఆమె కోరిక మేరకు తల్లిదండ్రుల వద్దకు పంపించినట్లు వివరించారు. మహిళ కేసు పెట్టకపోవడంతో ఆమె భర్తకు కౌన్సిలింగ్ ఇచ్చినట్లు పేర్కొన్నారు.