ఏపీ మంత్రికి బిగ్ రిలీఫ్.. సీబీఐ క్లీన్ చిట్

ఏపీ మంత్రి కాకాణి గోవర్థన్ రెడ్డికి సీబీఐ క్లీన్ చిట్ ఇచ్చింది. నెల్లూరు కోర్టు ఫైళ్ల మిస్సింగ్ కేసులో సీబీఐ ఛార్జ్‌ షీట్ దాఖలు చేసింది. ఫైళ్ల మిస్సింగ్ కేసులో కాకాణి పాత్ర లేదంటూ ఛార్జ్‌ షీట్‌లో సీబీఐ స్పష్టం చేసింది. మంత్రి కాకాణికి నేరం జరిగిన విధానం పట్ల అవగాహన లేదని పేర్కొన్నారు. ఏడాది పాటు విచారణ జరిపి, 403 పేజీల చార్ఝ్ షీట్ దాఖలు సీబీఐ.. 88 మంది సాక్షులను ప్రశ్నించింది. మంత్రిపై వచ్చిన ఆరోపణలను కొట్టిపారేసిన సీబీఐ.. మంత్రి కాకాణికి దోషులతో ఎలాంటి సంబంధం లేదని తేల్చింది.

ఏపీ పోలీసుల విచారణను సీబీఐ సమర్థించింది. పోలీసులు నిర్ధారించిన సయ్యద్ హయత్, షేక్ ఖాజా రసూల్‌లను సీబీఐ దోషులుగా నిర్ధారించింది. దొంగతనాలు అలవాటున్న వీరే కోర్టులో ఉన్న బ్యాగ్ దొంగిలించారని చార్జ్‌ షీట్‌లో స్పష్టం చేసింది. నెల్లూరు కోర్టు ఫైళ్ల మిస్సింగ్ కేసుపై హైకోర్టు ఆదేశాల మేరకు సీబీఐ విచారణ చేపట్టింది. సీబీఐ విచారణకు తాను సిద్ధమని హైకోర్టులో మంత్రి కాకాణి ముందే చెప్పారు. సీబీఐ విచారణ జరపాలని హైకోర్టును మంత్రి కోరారు. సీబీఐ విచారణకు అభ్యంతరం లేదని అప్పట్లోనే హైకోర్టుకి అడ్వకేట్ జనరల్ తెలిపారు.

టీడీపీ సీనియర్‌ నేత సోమిరెడ్డి చంద్రమోహన్‌రెడ్డికి విదేశాల్లో రూ.వేల కోట్ల ఆస్తులున్నాయని కాకాణి గోవర్ధన్‌రెడ్డి ఆరపించారు. దీనిపై ఆధారాలున్నాయంటూ పత్రాలను విడుదల చేశారు.. అవి ఫోర్జరీవని సోమిరెడ్డి పోలీసులకు ఫిర్యాదు చేశారు. దీంతో కాకాణిని ఏ1గా పేర్కొంటూ పోలీసులు 2016లో కేసు నమోదు చేశారు. ఈ వ్యవహారానికి సంబంధించిన కేసు ఆధారాలు నెల్లూరు నాలుగో అదనపు జూనియర్‌ సివిల్‌ జడ్జి కోర్టు నుంచి ఈ ఏడాది ఏప్రిల్‌లో చోరీ అయ్యాయి. ఈ వ్యవహారంపై నెల్లూరు జిల్లా ప్రధాన న్యాయమూర్తి (పీడీజే) నివేదిక ఆధారంగా దీన్ని సుమోటోగా తీసుకున్న హైకోర్టు.. మంత్రి కాకాణితోపాటు 18 మంది ప్రతివాదులకు నోటీసులిచ్చి విచారించి తీర్పును వాయిదా వేసింది. ఆ తర్వాత ఈ కేసులో ఫైళ్ల చోరీపై దర్యాప్తును సీబీఐకి అప్పగించింది ఏపీ హైకోర్టు.