ఏం కొనేటట్టు లేదు.. కిలో రూ.500 దాటేసిన వెల్లుల్లి

నిత్యావసరాల ధరలు ఆకాశాన్ని తాకడంతో సామాన్యుల జేబులు ఖాళీ అవుతున్నాయి. కొద్ది నెలల కిందట కొండెక్కి ఉల్లి, టమాటా ధరలు దిగి వచ్చాయి. అయితే, ప్రస్తుతం వెల్లుల్లి మాత్రం జనాలకు చుక్కలు చూపిస్తోంది. నిత్యం వంటల్లో అల్లం, వెల్లుల్లి తప్పనిసరి. లేదంటే ఆ కూర రుచిగా ఉండదు. కానీ, ప్రస్తుతం వెల్లుల్లి కిలో రూ. 500పై మాటే పలుకుతోంది. దీంతో వంటి గది నుంచి వెల్లుల్లి మాయమయ్యే పరిస్థితి నెలకుంది. రెండు వారాల్లో ధరలు రెట్టింపయ్యాయి. వాస్తవానికి గతేడాదది నవంబరు మధ్య నుంచి దేశవ్యాప్తంగా వెల్లుల్లి ధరలు పెరుగుతూ వస్తున్నాయి. డిసెంబరులో రిటైల్ మార్కెట్లలో వెల్లుల్లి కిలో రూ 350 నుంచి రూ. 400 ఉండగా.. హోల్ సేల్ మార్కెట్‌లో అత్యంత నాణ్యమైన వెల్లుల్లి రూ 250 పలికింది. కానీ, ప్రస్తుతం ఇది మరింత పెరిగింది. ఏకంగా కిలో రూ.500 దాటేయడం గమనార్హం. వెల్లుల్లి దిగుబడి తగ్గడంతో మార్కెట్లలోకి సరఫరా అంతంతమాత్రంగా ఉంది. డిమాండ్‌కు తగిన సప్లై లేకపోవడంతో వెల్లుల్లి ధర పెరుగుతోంది.వెల్లుల్లి సాగు ఖరీఫ్, రబీ సీజన్లలో జరుగుతుంది. వర్షాభావ పరిస్థితుల కారణంగా కర్ణాటక, మధ్యప్రదేశ్‌, మహారాష్ట్ర, ఉత్తర బెంగాల్‌లోని కొన్ని ప్రాంతాల్లో జూలైలో వేసిన పంట దెబ్బతిందని వ్యాపారులు తెలిపారు. భారత్‌లోని మొత్తం వెల్లుల్లి ఉత్పత్తిలో దాదాపు 40% వాటా మహారాష్ట్రదే. ప్రస్తుతం పాత స్టాక్ అరకొరగా అందుబాటులో ఉండగా.. కొత్త పంట కోసం రెండు నెలలు నిరీక్షణ తప్పదు. దీంతో అప్పటి వరకూ ధరలు ఇలాగే కొనసాగే అవకాశం ఉంది."మా వంటలలో చాలా వరకు వెల్లుల్లి ప్రధాన పదార్ధం కాబట్టి మేం కష్టపడుతున్నాం.. అయినప్పటికీ, రెస్టారెంట్లు, హోటళ్లలో మా క్లయింట్‌లకు విధేయంగా ఉండాలి.. ముడి పదార్థాల హెచ్చుతగ్గులతో ధరలను పెంచలేం.. కాబట్టి 'లసూనీ కబాబ్' ఇతర వంటకాల తయారీలో మా లాభాలను వదులుకుంటున్నాం.. ధరలు తగ్గకపోతే, మేము రేట్లను సవరించాల్సి’ ఉంటుందని ఓ రెస్టారెంట్ యజమాని వ్యాఖ్యానించాడు.ప్రతికూల వాతావరణ పరిస్థితుల కారణంగా దేశవ్యాప్తంగా వెల్లుల్లి దిగుబడి తగ్గింది. అకాల వర్షాలు చాలా చోట్ల పంటలను నష్టం చేశాయి. చాలా ప్రాంతాల్లో మిచౌంగ్ తఫాను కూడా వెల్లుల్లి దిగుబడిపై ప్రభావం చూపింది.