ఏపీ విద్యార్థులకు గుడ్ న్యూస్,,,ప్రైవేట్ పాఠశాలల్లో పేదలకు 25 శాతం సీట్లు

పేద విద్యార్థులకు ఏపీ ప్రభుత్వం శుభవార్త వినిపించింది. ప్రైవేట్ పాఠశాలల్లో పేద విద్యార్థులకు సీట్ల కేటాయింపుపై ఏపీ ప్రభుత్వం కీలక ఆదేశాలు జారీచేసింది. విద్యాహక్కు చట్టం కింద ప్రైవేట్ బడుల్లో పేద విద్యార్థులకు 25శాతం సీట్లు కేటాయించాల్సి ఉంటుంది. ఇప్పటికే ఈ విధానం అమల్లో ఉండగా.. వచ్చే విద్యా సంవత్సరానికి కూడా దీనిని అమలు జేస్తూ ఉత్తర్వులు జారీచేసింది. 2023-24 విద్యా సంవత్సరం వరకూ ఈ విధానం అమలుచేసేలా గతంలో ఉత్తర్వులు ఇవ్వగా.. వచ్చే విద్యా సంవత్సరానికి కూడా పొడిగిస్తూ అధికారులు తాజాగా ఉత్తర్వులు ఇచ్చారు.

మరోవైపు దేశంలోని అన్ని ప్రైవేట్, స్పెషల్ కేటగిరీ పాఠశాలల్లో 25 శాతం సీట్లను బలహీనవర్గాలకు చెందిన పిల్లలకు కేటాయించాలని గతంలో కేంద్ర ప్రభుత్వం రాష్ట్ర ప్రభుత్వాలకు స్పష్టం చేసింది. ఉచిత నిర్బంధ విద్య చట్టం ప్రకారం ఆరు నుంచి 14 ఏళ్లలోపు పిల్లలకు ప్రాథమిక విద్య ఒక హక్కుగా పేర్కొన్న కేంద్రం.. ఈ విధానాన్ని తప్పనిసరిగా అమలు చేయాలని స్పష్టం చేసింది. కేంద్రం నిర్ణయం ప్రకారం అన్ని ప్రైవేట్, అన్ ఎయిడెడ్, స్పెషల్ కేటగిరీ పాఠశాలల్లో కనీసం 25శాతం సీట్లను పేద విద్యార్థులకు కేటాయించాలి. ఆ విద్యార్థి చదువుకు అయ్యే ఖర్చును ప్రభుత్వమే సదరు పాఠశాలకు చెల్లిస్తుంది. అయితే విద్యాహక్కు చట్టం కింద ప్రైవేటు పాఠశాలల్లో కల్పించే ప్రవేశాల్లో ఎస్సీ, ఎస్టీ, దివ్యాంగులు, అనాథ పిల్లలకు మొదట ప్రాధాన్యం ఇస్తారు.

2023-24 విద్యా సంవత్సరంలోనూ ఈ విధానం కింద ఏపీ సర్కారు పేద విద్యార్థులకు ప్రైవేట్ పాఠశాలల్లో ప్రవేశాలు కల్పించింది. ఈ ప్రక్రియ ద్వారా ప్రైవేట్ స్కూళ్లల్లో ప్రవేశాలు పొందాలనుకునే విద్యార్థులు ప్రభుత్వం వెల్లడించిన తేదీలలో తొలుత ఆన్‌లైన్‌లో రిజిస్ట్రేషన్ చేసుకోవాల్సి ఉంటుంది. ఆ తర్వాత సీట్లను లాటరీ విధానంలో కేటాయిస్తారు.