వైఎస్ షర్మిల జోరు.. ఆ విషయంలో టీడీపీ, వైసీపీ కంటే ముందే

ఏపీ పీసీసీ ప్రెసిడెంట్ వైఎస్ షర్మిల మంచి దూకుడు మీద ఉన్నారు. ఏపీ కాంగ్రెస్ పార్టీ అధ్యక్షురాలిగా బాధ్యతలు చేపట్టిన నాటి నుంచి జిల్లాల పర్యటనలతో బిజీగా ఉన్నారు షర్మిల. తాజాగా రాజన్న రచ్చబండ, బహిరంగ సభలతో హస్తం పార్టీ శ్రేణుల్లో ఆత్మ విశ్వాసాన్ని పెంచే పనిలో పడ్డారు. ఈ నేపథ్యంలో గతంలో పోటీకి మొగ్గుచూపని నేతలు సైతం ఇప్పుడు హస్తం గుర్తు మీద పోటీ చేయడానికి ముందుకు వస్తున్నారు. ఈ క్రమంలోనే అల్లూరి జిల్లా పాడేరు నియోజకవర్గం చింతపల్లిలో వైఎస్ షర్మిల బహిరంగ సభ నిర్వహించారు.

చింతపల్లి సభ వేదికగా ఏపీ సీఎం జగన్ మీద షర్మిల మరోసారి విమర్శలు చేశారు. సీఎం జగన్‌ బీజేపీకి బానిసగా మారారని ఆరోపించారు . సింహం, పులి అని చెప్పుకొనే మీరు బీజేపీ ముందు పిల్లిలా మారిపోయారంటూ సెటైర్లు వేశారు. అలాగే టీడీపీపైనా షర్మిల విమర్శనాస్త్రాలు సంధించారు. ఏపీకి ప్రత్యేక హోదా, పోలవరం ప్రాజెక్టు పూర్తికావాలంటే రాష్ట్రంలో కేంద్రంలో కాంగ్రెస్ పార్టీ అధికారంలోకి రావాలని అన్నారు. బ్రిటిష్ వాళ్ళను తరిమి తరిమి కొట్టిన వీరుడు మన్యందొర అల్లూరి సీతారామరాజు స్ఫూర్తిగా.. అల్లూరి బ్రిటీష్ వాళ్లను తరిమికొట్టినట్లు, నియంతలను తరిమికొట్టాలని పిలుపునిచ్చారు.

వైఎస్ఆర్ హయాంలో 20 లక్షల ఎకరాలకు పోడుపట్టాలు ఇచ్చామని, వాటి ద్వారా రైతులు లోన్లు కూడా తీసుకున్నట్లు షర్మిల గుర్తుచేశారు. వైఎస్ఆర్ హయాంలో వేసిన రోడ్లే ఇప్పటికీ దిక్కు అన్న షర్మిల.. ఇప్పటి ప్రభుత్వాలకు బాక్సైట్ తవ్వకాల మీద ఉన్న శ్రద్ధ గిరిజనుల అభివృద్ధి మీద లేదని విమర్శించారు.జగనన్న 25 ఎంపీలను ఇస్తే ప్రత్యేక హోదా తెస్తామన్నారనీ.. కానీ అధికారంలోకి వచ్చాక చేతకాలేదని తప్పుబట్టారు. ఎన్నికలప్పుడు ఏ పార్టీ డబ్బులు ఇచ్చినా తీసుకోవాలన్న షర్మిల.. అవి మీడబ్బులే. ఇసుక, బాక్సైట్‌, లిక్కర్‌ మాఫియాతో సంపాదించిన డబ్బులే.. కానీ, ఓటు మాత్రం ఆలోచించి వేయండని సూచించారు.

ఇక పాడేరు నియోజకవర్గం నుంచి కాంగ్రెస్ పార్టీ తరుఫున వంతల సుబ్బారావును అభ్యర్థిగా వైఎస్ షర్మిల ప్రకటించారు. మరోవైపు వైసీపీ పాడేరు ఇంఛార్జిగా విశ్వేశ్వరరాజు పేరును ప్రకటించింది. అయితే ఈయన నియామకంపై సొంతపార్టీ నుంచే అసంతృప్తి వ్యక్తమవుతోంది. ఇక జనసేనతో పొత్తు కారణంగా టీడీపీ ఇంకా అభ్యర్థులను ప్రకటించలేదు. ఈ క్రమంలో వైసీపీ, టీడీపీ కంటే ముందే అభ్యర్థిని ప్రకటించింది కాంగ్రెస్ పార్టీ.