కుటుంబాన్ని మింగేసిన బెట్టింగ్ భూతం,,,,భార్య, కూతురిని చంపేసి వ్యక్తి ఆత్మహత్య

అనంతపురం జిల్లాలో అమానుష ఘటన చోటుచేసుకుంది. కట్టుకున్న భార్యను, కన్న కూతురిని కర్కశంగా కడతేర్చాడు ఓ కసాయి. ఆ తర్వాత తానూ బలవన్మరణానికి పాల్పడ్డాడు. దీనికి సంబంధించిన అసలు వివరాల్లోకి వెళ్తే..అనంతపురం జిల్లా యాడికికి చెందిన చంద్రావతికి, పెద్దవడుగూరు మండలం క్రిష్టిపాడుకు చెందిన రామకృష్ణతో ఐదేళ్ల కిందట పెళ్లైంది. వీరికి ఇద్దరు కుమార్తెలు కూడా పుట్టారు. పెద్దమ్మాయి శాన్విత అమ్మమ్మ ఇంట్లో ఉండి చదువుకుంటోంది. చిన్నపాప చైత్రికతో కలిసి రామకృష్ణ కుటుంబం యాడికిలోని చౌడేశ్వరి కాలనీలో అద్దె ఇంట్లో నివశిస్తున్నారు. మగ్గం పనిచేసే రామకృష్ణ.. పెళ్లైన ఐదేళ్ల వరకూ బాగానే ఉన్నాడు. కానీ ఈ మధ్యే క్రికెట్ బెట్టింగ్‌లకు అలవాటు పడ్డాడు. క్రికెట్ బెట్టింగ్‌లో ఉన్నదంతా పోగొట్టుకున్నాడు. తిరిగి సంపాదిద్దామనే ఆశతో అప్పులు చేసి మరీ.. బెట్టింగ్‌‍లలో పాల్గొన్నాడు.

బెట్టింగ్‌లలో ఉన్నదంతా పోగొట్టుకోవటంతో కుటుంబం గడవడం కష్టంగా మారింది. దీంతో భార్యాభర్తల మధ్య గొడవలు ప్రారంభమయ్యాయి. ఇంట్లో తరుచుగా గొడవలు జరుగుతుండేవి. ఈ క్రమంలోనే గురువారం ఇద్దరి మధ్య గొడవ జరగ్గా కసాయిగా మారిన రామకృష్ణ.. భార్యను, చిన్నారిని హత్యచేసి ఇంట్లో నుంచి పరారయ్యాడు. భార్యను మంచానికి కట్టేసి ముఖాన్ని దిండుతో అదిమి హత్యచేసిన రామకృష్ణ.. తొమ్మిది నెలల చైత్రికపై బియ్యం సంచి ఉంచి ఇంట్లో నుంచి పారిపోయాడు. శుక్రవారం ఉదయం రామకృష్ణ సెల్‌ఫోన్‌కు సోదరుడు ఫోన్‌ చేయగా స్విచ్ఛాఫ్‌ వచ్చింది. అనుమానం వచ్చిన అతను బంధువులకు సమాచారం ఇచ్చాడు. ఆ తర్వాత యాడికి వచ్చి చూడగా ఇంటికి తాళం వేసి కనిపించింది.

దీంతో రామకృష్ణ సోదరుడు పోలీసులకు సమాచారం అందించాడు. పోలీసులు తలుపులు పగలగొట్టి ఇంట్లోకి ప్రవేశించి చూసేటప్పటికి చంద్రావతి, చైత్రిక మృతదేహాలు కనిపించాయి. ఇద్దరి మృతదేహాలను పోస్టుమార్టమ్‌కు తరలించిన పోలీసులు.. ఇంట్లో నుంచి ఆధారాలు సేకరించారు. ఆ తర్వాత పారిపోయిన రామకృష్ణ కోసం గాలింపు చర్యలు చేపట్టారు. ఈ క్రమంలోనే రైల్వే స్టేషన్ సమీపంలో మృతదేహం ఉందంటూ శనివారం పోలీసులకు సమాచారం అందింది. ఘటనా స్థలికి వెళ్లి పరిశీలించిన పోలీసులు చనిపోయింది రామకృష్ణగా గుర్తించారు. భార్య కూతురిని హత్య చేసిన తర్వాత రైలుపట్టాల వద్దకు వచ్చి ఆత్మహత్యకు పాల్పడినట్లు గుర్తించారు. అయితే చనిపోతూ భార్యాకూతురిని నన్ను క్షమించండి అంటూ శరీరంపై రాసుకుని బలవన్మరణానికి పాల్పడటం అక్కడున్న వారిని కలిచివేసింది. దీనిపై కేసు నమోదు చేసుకుని దర్యాప్తు చేస్తున్నారు. మొత్తంగా సజావుగా సాగుతున్న కాపురంలోకి ప్రవేశించిన బెట్టింగ్ భూతం దంపతుల పచ్చటి సంసారాన్ని నాశనం చేసింది. అభం శుభం తెలియని తొమ్మిది నెలల చిన్నారి జీవితాన్ని చిదిమేసింది.