ఏపీ ప్రభుత్వానికి ఎదురు దెబ్బ.. నో చెప్పిన సుప్రీం కోర్టు

తిరుపతిలోని 25 ఎకరాల హథీరాంబాబా మఠం భూముల విక్రయంపై సుప్రీంకోర్టు స్టేటస్‌కో విధించింది. ఈ మేరకు జస్టిస్‌ ఎంఎం సుందరేష్‌, జస్టిస్‌ ఎస్‌వీఎన్‌ భట్‌లతో కూడిన ధర్మాసనం శుక్రవారం ఉత్తర్వులు జారీ చేసింది. మఠం భూములు అన్యాక్రాంతం కాకుండా కాపాడలేమని పేర్కొంటూ ఏపీ ప్రభుత్వం వాటిని విక్రయించాలని గతంలో నిర్ణయించింది. లీజుకు తీసుకున్నవారే కొనుగోలు చేయడానికి వీలు కల్పించింది. దానిపై మఠం ఏపీ హైకోర్టును ఆశ్రయించగా.. రాష్ట్ర ప్రభుత్వ నిర్ణయాన్ని సమర్థిస్తూ తీర్పునిచ్చింది. దాన్ని సవాల్‌ చేస్తూ మఠం సుప్రీంకోర్టును ఆశ్రయించింది.

భూములను ఆక్రమణదారుల నుంచి కాపాడటం కష్టమన్న రాష్ట్ర ప్రభుత్వ వాదనలతో సుప్రీంకోర్టు విభేదించింది. ఢిల్లీ నుంచి తిరుపతి వరకు ఉన్న రూ.కోట్ల విలువ చేసే మఠం భూములు అన్యాక్రాంతం అవుతుండటంపై విచారం వ్యక్తం చేసింది. ఈ వ్యవహారంపై పూర్తిస్థాయిలో విచారణ జరిపించాల్సిన అవసరం ఉందని అభిప్రాయపడింది. తదుపరి విచారణను ఏప్రిల్‌కు వాయిదా వేసింది. ఈ కేసు విచారణ పూర్తయ్యేంత వరకు మఠం భూములను అమ్మడానికి వీల్లేదంటూ యథాతథ స్థితి విధించింది.

రాష్ట్ర ప్రభుత్వం 1990లో ఇచ్చిన జీవో 751 ప్రకారం.. తిరుపతి సమీపంలోని పుదిపట్ల గ్రామ సర్వే నం. 51/1, 54/2లో ఉన్న 25.36 ఎకరాల హథీరాంజీ మఠం భూమిని బహిరంగ వేలంలో కాకుండా, ప్రైవేట్‌ నెగోషియేషన్స్‌ ద్వారా మునస్వామి నాయుడు, చెంగమ్మకు ఎకరం రూ.20వేల చొప్పున విక్రయించారు. ఆ తర్వాత ఈ భూమిపై చాలా లావాదేవీలు జరిగాయి. మఠం భూములను నిషేధిత జాబితా (22ఏ)లో చేర్చడంతో కొంత భూమి కొనుగోలుదారుడికి రిజిస్ట్రేషన్‌ జరగలేదు. ఈ క్రమంలో అతను హైకోర్టును ఆశ్రయించగా 1990లో జరిగిన భూముల అమ్మకాన్ని తప్పుబడుతూ, అమ్మకాలను రద్దు చేసింది. కొనుగోలుదారులకు వడ్డీతో సహా డబ్బు వాపసు చేసి వాటిని తిరిగి బహిరంగ వేలం వేయాలని తీర్పు ఇచ్చింది. కొనుగోలుదారులు హైకోర్టు ఫుల్‌బెంచ్‌ను ఆశ్రయించగా అమ్మకాలను సమర్థిస్తూ తీర్పు చెప్పింది. దీంతో మఠం అధికారులు సుప్రీంకోర్టులో ఎస్‌ఎల్పీ దాఖలు చేశారు.