జైల్లోనే డిగ్రీ పూర్తి చేసిన కోడికత్తి శ్రీను.. మంచి మార్కులతో, ఏ కోర్స్ అంటే

కోడికత్తి కేసులో నిందితుడు జనిపల్లి శ్రీనివాసరావు విశాఖ కేంద్ర కారాగారం నుంచి బెయిల్‌పై విడుదలయ్యారు. ఆయన అంబేద్కర్‌ ఫోటో పట్టుకొని బయటకు వచ్చారు. అయితే శ్రీను జైల్లోనే డిగ్రీని పూర్తి చేయడం విశేషం. రాజమహేంద్రవరం జైలులో ఉన్నప్పుడే అంబేద్కర్ వర్సిటీ దూర విద్యలో 70 శాతం మార్కులతో శ్రీను బీఏ పూర్తి చేసినట్లు బంధువులు తెలిపారు. ఆ తర్వాత శ్రీనును రాజమహేంద్రవరం జైలునుంచి విశాఖ జైలుకు తరలించారు.

మరోవైపు శ్రీను జైలు నుంచి విడుదలకాగానే న్యాయవాదులు సలీం, పిచ్చుకల శ్రీనివాస్‌, విదసం ఐక్య వేదిక రాష్ట్ర కన్వీనర్‌ బూసి వెంకట్రావులు మీడియా సమక్షంలో ఆయన తండ్రి తాతారావుకు అప్పగించారు. జైలు గేటు దగ్గర అప్పటికే ఉన్న దళిత సంఘాల కార్యకర్తలు జై భీం అంటూ నినాదాలు చేశారు. న్యాయస్థానానికి, దళితసంఘాలు, న్యాయవాదులకు శ్రీను కృతజ్ఞతలు తెలిపారు. శ్రీనుతోపాటు అతని కుటుంబ సభ్యులకు, కేసులో పోరాడిన న్యాయవాదులకు, విదసం నాయకులకు ప్రభుత్వం రక్షణ కల్పించాలని లాయర్ సలీమ్ డిమాండ్ చేశారు. ఎవరికి ఏం జరిగినా ప్రభుత్వానిది..ముఖ్యమంత్రి జగన్‌దే బాధ్యత అన్నారు.

అంతకముందు బెయిల్ ఆదేశాలను దళిత సంఘాల నాయకులు విశాఖపట్నం ఎన్‌ఐఏ కోర్టులో సమర్పించారు. శ్రీనివాసరావు తండ్రి పేరిట, చిన్నాన్న పేరిట ఉన్న ఒక్కొటీ రూ.6.25లక్షల విలువైన వేర్వేరు భూమి పత్రాలతో పాటు తహసీల్దార్‌ కార్యాలయం నుంచి సాల్వెన్సీ పత్రాలు తీసుకురాగా సాయంత్రం 3.45గంటలకు బెయిల్‌ ఉత్తర్వులను జైలు అధికారులకు మెయిల్‌ చేశారు. దాని ఆధారంగా శ్రీనివా్‌సను విడుదల చేయడం కుదరదని.. నేరుగా పత్రాలే తీసుకురావాలని విశాఖ జైలు అధికారులు సూచించారు. దీంతో దళిత సంఘాల నాయకులు మళ్లీ ఎన్‌ఐఏ కోర్టుకు వెళ్లి న్యాయమూర్తి సంతకాలతో కూడిన బెయిల్‌ ఆదేశాలు తీసుకున్నారు.

ఆ పత్రాలను కోర్టు సిబ్బందే జైలుకు తీసుకువచ్చి అందించిన తరువాత శ్రీనును విడుదల చేశారు. సాధారణంగా రిమాండ్‌ ఖైదీలు వారి దుస్తుల బ్యాగుతో బయటకు వస్తుంటారు. కానీ శ్రీనివాస్‌ మాత్రం అంబేద్కర్ ఫోటోను గుండెలపై పెట్టుకొని బయటకొచ్చారు. శ్రీనివాస్‌పై ఇకపై ఎటువంటి కుట్రలు జరగకుండా అడ్డుకుంటామని దళిత సంఘాల నాయకులు నినాదాలు చేశారు. ఈ కేసు కొట్టేయాలని కోరుతూ సుప్రీంకోర్టులో క్వాష్‌ పిటిషన్‌ వేస్తామని లాయర్ సలీం తెలిపారు. రాజ్యాంగమే శ్రీనును కాపాడిందని సలీమ్‌ అన్నారు. మరోవైపు కుమారుడు శ్రీనును చూసి తండ్రి తాతారావు కన్నీటి పర్యంతం అయ్యారు. ఐదేళ్ల తర్వాత కొడుకు బయటకు రావడంతో భావోద్వేగానికి గురయ్యారు. తను కొడుకు కోసం పోరాటం చేసిన న్యాయవాదులకు ధన్యవాదాలు తెలిపారు. తన కుమారుడు జైలు నుంచి బయటకు రావడం ఆనందంగా ఉందన్నారు.