బీజేపీలో చేరిన రెండో రోజే రాజ్యసభ సీటు.. మాజీ సీఎంకు బంపరాఫర్

మహారాష్ట్ర మాజీ సీఎం అశోక్ చవాన్‌కు బంపరాఫర్ తగిలింది. సుదీర్ఘ కాలం కాంగ్రెస్ పార్టీతో ఉన్న అశోక్ చవాన్.. ఇటీవలె బీజేపీలో చేరారు. ఈ క్రమంలోనే రెండు రోజులకే అశోక్ చవాన్‌కు రాజ్యసభ సీటు దక్కింది. తాజాగా రాజ్యసభకు అభ్యర్థులను ఎంపిక చేసే క్రమంలో మహారాష్ట్ర నుంచి అశోక్ చవాన్ పోటీ చేయనున్నట్లు కమలం పార్టీ అధిష్ఠానం నిర్ణయం తీసుకుంది. రెండు రోజుల క్రితం కాంగ్రెస్ పార్టీకి గుడ్‌ బై చెప్పిన అశోక్ చవాన్.. ఆ తర్వాత కాషాయ గూటికి చేరారు. తాజాగా ఆయనకు రాజ్యసభ సీటు కూడా దక్కడం మహారాష్ట్ర రాజకీయాల్లో తీవ్ర చర్చీనీయాంశంగా మారింది. మహారాష్ట్ర నుంచి ఆయనను రాజ్యసభ సభ్యుడిగా బీజేపీ ప్రకటించింది.

ఇక బీజేపీ జాతీయ అధ్యక్షుడు జేపీ నడ్డా కూడా మరోసారి రాజ్యసభ సీటును దక్కించుకున్నారు. ఈసారి జేపీ నడ్డాను గుజరాత్ నుంచి బీజేపీ ఎంపిక చేసింది. తాజాగా బీజేపీ విడుదల చేసిన జాబితాలో మహారాష్ట్ర నుంచి అశోక్‌చవాన్, గుజరాత్ నుంచి జేపీ నడ్డా పేర్లను ప్రకటించింది. రాజ్యసభ ఎన్నికల్లో పోటీ చేసే వారికి నామినేషన్ల గడువు గురువారంతో ముగియనుంది. ఈ క్రమంలోనే అన్ని పార్టీలు తమ పార్టీ తరఫున రాజ్యసభకు బరిలో ఉండే అభ్యర్థుల పేర్లను ప్రకటిస్తున్నాయి. మధ్యప్రదేశ్ నుంచి డాక్టర్ ఎల్.మురుగన్, ఉమేష్ నాథ్ మహరాజ్, మాయా నరోలియా, బన్సీలాల్ గుర్జర్‌ల పేర్లను అభ్యర్థులుగా బీజేపీ ప్రకటించింది. ఒడిశా నుంచి కేంద్రమంత్రి అశ్విని వైష్ణవ్‌ను రంగంలోకి దించింది.

ఇక రాజస్థాన్ నుంచి చున్నిలాల్ గరాసియా, మదన్ రాథోడ్‌లను రాజ్యసభ సభ్యులుగా సోమవారం బీజేపీ రంగంలోకి దించింది. రాజస్థాన్‌కు చెందిన ఇద్దరు రాజ్యసభ సభ్యుల పదవీకాలం త్వరలో ముగియనుంది. కాంగ్రెస్ పార్టీ నుంచి మాజీ ప్రధాని మన్మోహన్ సింగ్, బీజేపీ నుంచి భూపేందర్ యాదవ్ రాజ్యసభ సభ్యులుగా ఉండగా.. వారి పదవీకాలం ఏప్రిల్ 3 వ తేదీతో ముగియనుంది. 15 రాష్ట్రాల్లోని 56 రాజ్యసభ స్థానాలకు ఈ నెల 27 వ తేదీన జరగనుండగా.. అదేరోజు ఓట్ల లెక్కింపు నిర్వహించనున్నారు. ఇక కాంగ్రెస్‌లో 38 ఏళ్ల పాటు పనిచేసిన అశోక్ చవాన్.. బీజేపీలో చేరిన సందర్భంగా నిర్వహించిన మీడియా సమావేశంలో పొరబడ్డారు. ముంబై బీజేపీ చీఫ్ ఆశిష్ షెలార్‌ను.. ముంబై కాంగ్రెస్ అధ్యక్షుడు అని పొరపాటుగా అశోక్ చవాన్ పిలిచారు. దీంతో ఆ సమయంలో అక్కడే ఉన్న మహారాష్ట్ర డిప్యూటీ సీఎం దేవేంద్ర ఫడ్నవీస్‌తో పాటు అంతా ఒక్కసారిగా నవ్వుకున్నారు.