ఢిల్లీ సరిహద్దుల్లో పతంగులు ఎగరేస్తున్న రైతులు.. ఎందుకో తెలుసా

దేశ రాజధాని ఢిల్లీలోకి ప్రవేశించేందుకు రైతులు రెండో రోజు కూడా తీవ్ర ప్రయత్నాలు చేస్తున్నారు. ఈ క్రమంలోనే సరిహద్దుల్లో తీవ్ర బందోబస్తు, బారికేడ్లు ఏర్పాటు చేసిన కేంద్ర ప్రభుత్వం అన్నదాతలను ఢిల్లీలోకి రాకుండా అన్ని రకాల చర్యలు తీసుకుంటోంది. మరోవైపు.. ఆందోళన చేస్తున్న రైతులు సరిహద్దుల్లో గుమిగూడకుండా భద్రతా బలగాలు పటిష్ఠ చర్యలు చేపడుతున్నాయి. ఈ నేపథ్యంలోనే రైతులు కూడా కేంద్ర ప్రభుత్వం, భద్రతా బలగాల చర్యలను తిప్పికొట్టేందుకు సరికొత్త వ్యూహాన్ని అమలు చేస్తున్నారు. ఇందులో భాగంగానే సరిహద్దుల్లో పతంగులు ఎగుర వేస్తున్నారు.

ఢిల్లీ ఛలో మెగా మార్చ్‌లో భాగంగా మంగళవారం పంజాబ్-హర్యానా సరిహద్దుల్లో ఉన్న శంభు ప్రాంతంలో రైతులు, భద్రతా బలగాల మధ్య తీవ్ర ఉద్రిక్తతలు జరిగిన విషయం తెలిసిందే. బారికేడ్లు, ముళ్ల కంచెలు దాటేందుకు అన్నదాతలు ప్రయత్నించగా.. వారిపై పోలీసులు టియర్ గ్యాస్, వాటర్ క్యానన్లతో దాడికి దిగారు. దీంతో అన్నదాతలు చెల్లాచెదురు అయిపోయారు. ఈ క్రమంలోనే శంభు సరిహద్దు వద్ద ఇవాళ పెద్దఎత్తున చేరుకున్న రైతులు.. అక్కడ పతంగులు ఎగురవేస్తూ సందడి చేస్తున్నారు.

అయితే రైతులు పతంగులు ఎగురవేయడానికి ఒక ప్రత్యేక కారణం ఉంది. రైతులు సరిహద్దులు దాటకుండా పోలీసులు వివిధ రకాలుగా రోడ్లను దిగ్భందించారు. బారికేడ్లు, సిమెంట్ దిమ్మెలు, ముళ్ల కంచెలు సహా అనేక లైన్లుగా అడ్డుకట్టలు వేశారు. అంతే కాకుండా అన్నదాతలను చెదరగొట్టేందుకు డ్రోన్ల ద్వారా టియర్ గ్యాస్ క్యానిస్టర్లను రైతులపైకి వదులుతున్నారు. ఈ క్రమంలోనే డ్రోన్లను ఎగురనీయకుండా వాటికి అడ్డంగా పతంగులను ఎగురవేస్తున్నారు. దీంతో డ్రోన్లు ఎగరేయడం పోలీసులకు కష్టంగా మారుతుందని భావిస్తున్నారు. మరోవైపు.. శంభు సరిహద్దు ప్రాంతం పంజాబ్‌లోనే ఉన్నా.. హర్యానా నుంచి డ్రోన్ల ద్వారా టియర్ గ్యాస్ ప్రయోగిస్తున్నారంటూ పంజాబ్ అధికారులు తీవ్ర అభ్యంతరం వ్యక్తం చేస్తున్నారు.

ఈ క్రమంలోనే అంబాలా సమీపంలోని శంభు సరిహద్దు పంజాబ్ పరిధిలో ఉన్నందున డ్రోన్లు మోహరించకూడదని.. అంబాలా డిప్యూటీ కమిషనర్‌కు పటియాలా డిప్యూటీ కమిషనర్ ఒక లేఖ కూడా రాశారు. తాము పంజాబ్ ప్రాంతంలోనే ఉన్నప్పటికీ డ్రోన్ల ద్వారా గ్యాస్ క్యానిస్టర్లను వదులుతున్నారని రైతులు ఆరోపిస్తున్నారు. అవసరమైతే డ్రోన్లను కిందికి కూల్చేందుకు కూడా సిద్ధంగా ఉన్నట్లు రైతులు ప్రకటించారు.

ఇక రైతులు చేపట్టిన ఢిల్లీ ఛలో నిరసన ప్రదర్శనను అడ్డుకునేందుకు ఢిల్లీ సరిహద్దుల్లో అడుగుడుగునా పటిష్ఠ భద్రతను కేంద్ర ప్రభుత్వం ఏర్పాటు చేసింది. సెంట్రల్ ఢిల్లీతో హర్యానా సరిహద్దు పాయింట్ల వద్ద ఆంక్షలు విధించడంతో తీవ్ర ఉద్రిక్తత నెలకొంది. భారీ భద్రత, కాంక్రీట్ బారికేడ్లను కూడా లెక్కచేయకుండా రైతులు ఛలో మార్చ్‌ కొనసాగిస్తుండటంతో శంభు సరిహద్దు వద్ద పెద్దఎత్తున రైతులు గుమిగూడారు.