పీచు మిఠాయి తినేవారికి షాక్.. ఇక నుంచి దొరకదు.. నిషేధం విధించిన ప్రభుత్వం

పీచు మిఠాయి. దీన్ని చూడగానే ఎవ్వరికైనా నోరు ఊరిపోతుంది. చిన్న పిల్లల నుంచి ముసలి వాళ్ల వరకు చాలా మందికి ఈ పీచు మిఠాయి అంటే ఎంతో ఇష్టం. ఈ పీచు మిఠాయిని ఇంగ్లీష్‌లో కాటన్ క్యాండీ అని పిలుస్తారు. అయితే ఈ కాటన్ క్యాండీపై తాజాగా పుదుచ్చేరి ప్రభుత్వం నిషేధం విధించింది. ఈ పీచు మిఠాయి.. ప్రజల ఆరోగ్యాన్ని చెడగొడుతుందని.. తాజాగా నిర్వహించిన పరిశోధనల్లో తేలింది. దీంతో దానిపై సర్కార్ ఆంక్షలు విధించింది. మనుషుల ఆరోగ్యంపై పీచు మిఠాయి ప్రతికూల ప్రభావాలను కలిగిస్తుందని తాజాగా చేపట్టిన అధ్యయనాల్లో వెలుగులోకి వచ్చింది. దీంతో పుదుచ్చేరి లెఫ్టినెంట్ గవర్నర్ తమిళి సై సౌందరరాజన్ నిషేధం విధించింది. దీంతో కాటన్ క్యాండీని బ్యాన్ చేస్తూ ప్రభుత్వం తీసుకున్న నిర్ణయంపై ప్రజల నుంచి సర్వత్రా హర్షం వ్యక్తం అవుతోంది.

ఈ కాటన్ క్యాండీని వివిధ ప్రాంతాల్లో వివిధ రకాల పేర్లతో పిలుస్తూ ఉంటారు. ఫెయిరీ ఫ్లాస్, బుద్ధి కే బాల్ అని కూడా ఈ పీచు మిఠాయిని పిలుచుకుంటారు. మన తెలుగు రాష్ట్రాల్లో దీన్ని పీచు మిఠాయి అంటారు. అయితే ఈ కాటన్ క్యాండీని ఒకరకమైన చక్కెరతో తయారు చేస్తారు. అది షుగర్ సిరప్ నుంచి తయారు చేస్తారు. ఒక మిషన్‌లోని చిన్న రంధ్రం నుంచి పోగులు పోగులుగా ఈ పీచు మిఠాయి బయటకు వస్తుంది. ఆ బయటకు వచ్చిన పీచు మిఠాయిని ఒక కర్రపై తీసుకుని వివిధ ఆకృతుల్లో తయారు చేస్తారు. వివిధ రకాల రంగుల్లో తయారు చేసే ఈ పీచు మిఠాయి దూది పింజలా, రుచికి తియ్యగా ఉంటుంది.

కొందరు వ్యాపారులు భారీ లాభాలకు ఆశపడి ఈ పీచు మిఠాయిని అత్యంత విషపూరితమైన రసాయనాలతో తయారు చేస్తున్నట్లు అధికారులు గుర్తించారు. పుదుచ్చేరిలో అనేక దుకాణాలు రోడమైన్ బి అనే డేంజరస్ కెమికల్‌ను ఉపయోగించి ఈ కాటన్ క్యాండీని తయారు చేస్తున్నట్లు ఫుడ్ సేఫ్టీ అధికారులు నిర్వహించిన తనిఖీల్లో బయటపడింది. ఆ పీచు మిఠాయి శాంపిల్స్‌లో రోడమైన్-బి అనే విష పదార్థం ఉన్నట్లు అధికారులు తేల్చారు. ఈ క్రమంలోనే పుదుచ్చేరి లెఫ్టినెంట్ గవర్నర్ తమిళిసై సౌందరరాజన్ తీవ్రంగా పరిగణించారు. దీంతో కాటన్ క్యాండీలు తయారు చేసి విక్రయించే దుకాణాలను తనిఖీ చేయాలని అధికారులకు ఇటీవల ఆదేశాలు జారీ చేశారు. ఈ క్రమంలోనే తనిఖీలు చేపట్టిన పుదుచ్చేరి ఫుడ్ సేఫ్టీ అధికారులు.. కొన్ని షాపులను సీజ్ చేశారు.

నేషనల్ ఇన్‌స్టిట్యూట్ ఆఫ్ హెల్త్ ప్రకారం.. రోడమైన్ బి అనేది ఒక రసాయన సమ్మేళనం. దీన్ని వివిధ రంగుల్లో ఉపయోగిస్తారు. అయితే ఈ రోడమైన్ బి ఆహారం ద్వారా తీసుకుంటే క్యాన్సర్ వచ్చే ప్రమాదం ఉందని.. కాలేయం కూడా దెబ్బ తినే అవకాశాలు ఉన్నాయని డాక్టర్లు హెచ్చరికలు చేస్తున్నారు. ఇక ఈ రోడమైన్ బిని అధిక మోతాదులో తీసుకుంటే విషంతో సమానమని పేర్కొన్నారు. ఇక ఇది రక్తంలో చక్కెర స్థాయిలను భారీగా పెంచుతుందని తెలిపారు.

ఈ రోడమైన్ బి శరీరంలోకి చేరిన తర్వాత.. హైపర్ ఆక్టివిటీకి దారి తీసి.. పిల్లల్లో మూడ్ స్వింగ్‌కు కారణం అవుతుందని పేర్కొన్నారు. దీన్ని ఎక్కువగా తినడం వల్ల భారీగా బరువు పెరుగుతారని చెప్పారు. ఇందులోని తీపి.. పళ్లకు కూడా హానికరం చేస్తుందని తెలిపారు. ఇక కాటన్ క్యాండీల్లో ఉపయోగించే కృత్రిమ రంగులు పిల్లల్లో అలెర్జీలకు కారణమవుతాయని.. చర్మంపై దద్దుర్లు, జీర్ణశయ, శ్వాస సమస్యలు తలెత్తుతాయని వెల్లడించారు.