శ్రీకాళహస్తిలో వైసీపికి షాక్.. టీడీపీ గూటికి కీలక నేతలు

ఏపీలో శాసనసభ ఎన్నికలు సమీపిస్తున్న వేళ.. పార్టీల మధ్య జంపింగ్ జపాంగ్‌లు సంఖ్య పెరుగుతోంది. టికెట్లను ఆశిస్తున్న అభ్యర్థులే కాదు.. ద్వితీయ శ్రేణి నాయకులు సైతం పార్టీలు మారుతున్నారు. తాజాగా శ్రీకాళహస్తి నియోజకవర్గంలో అధికార వైసీపీకి షాక్ తగిలింది. ఆ పార్టీకి చెందిన ముగ్గురు జెడ్పీటీసీలు, ఓ కౌన్సిలర్ వైసీపీని వీడి సైకిలెక్కారు. ఉండవల్లిలోని చంద్రబాబు నివాసంలో టీడీపీ కండువా కప్పుకున్నారు.

శ్రీకాళహస్తి జెడ్పీటీసీ వెంకటసుబ్బారెడ్డి, ఏర్పేడు జెడ్పీటీసీ తిరుమలయ్య, తొట్టంబేడు జెడ్పీటీసీ అర్చనాదేవి, శ్రీకాళహస్తి 32వ వార్డు కౌన్సిలర్ హరినాయుడు, తొట్టెంబేడు మాజీ జెడ్పీటీసీ వెంకటాచలం.. చంద్రబాబు సమక్షంలో తెలుగుదేశం పార్టీలో చేరారు. వీరికి చంద్రబాబు కండువాలు కప్పి సాదరంగా పార్టీలోకి ఆహ్వానించారు. ఈ కార్యక్రమంలో టీడీపీ ఇంఛార్జ్ బొజ్జల సుధీర్ రెడ్డితో పాటు పలువురు నేతలు పాల్గొన్నారు.

టీడీపీ అధినేత చంద్రబాబు, టీడీపీ జాతీయ ప్రధాన కార్యదర్శి నారా లోకేష్ మీద తీవ్రస్థాయిలో విమర్శలు చేసే వైసీపీ ఎమ్మెల్యేలలో.. శ్రీకాళహస్తి వైసీపీ ఎమ్మెల్యే బియ్యపు మధుసూదన్ రెడ్డి ఒకరు. ఈ నేపథ్యంలో ఆయనకు చెక్ పెట్టాలనే యోచనతో టీడీపీ ఉన్నట్లు తెలుస్తోంది. అందులో భాగంగా వైసీపీ క్యాడర్‌ను తమవైపు తిప్పుకునే పనిలో పడింది. శ్రీకాళహస్తి మాజీ ఎమ్మెల్యే ఎస్సీవీ నాయుడు సైతం ఆరునెలల కిందటే టీడీపీలో చేరిపోయారు. ఇప్పుడు జెడ్పీటీసీలను సైతం తమవైపు తిప్పుకున్న టీడీపీ.. ముందు ముందు మరింత మందిని పార్టీలో చేర్చుకోవాలని.. తద్వారా బియ్యపు మధుసూదన్ రెడ్డికి చెక్ పెట్టాలని ప్లాన్ చేస్తోంది.

మరోవైపు జెడ్పీటీసీలుగా గెలిచామే తప్ప ఒక్క అభివృద్ధి పనీ చేయలేకపోయామని పార్టీ మారిన జెడ్పీటీసీలు చెప్పారు. స్థానిక సంస్థలను వైసీపీ ప్రభుత్వం నిర్వీర్యం చేసిందని ఆరోపించారు. వైఎస్ఆర్సీపీలో తమను బానిసలుగా చూస్తున్నారని.. అది తట్టుకోలేక పార్టీని వీడినట్లు చెప్పారు. శ్రీకాళహస్తిలో అవినీతిన తప్ప అభివృద్ధి లేదనీ.. శ్రీకాళహస్తి అభివృద్ధి జరగాలంటే అది టీడీపీతోనే సాధ్యమని అభిప్రాయపడ్డారు. మరోవైపు శ్రీకాళహస్తిలో టీడీపీ తరుఫున బొజ్జల సుధీర్ రెడ్డితోపాటు ఎస్సీవీ నాయుడు పోటీపడుతున్నారు. మరి టికెట్ ఎవరికి దక్కుతుందనేది ఆసక్తికరంగా మారింది.