ఎన్నికల విధుల్లో వాలంటీర్లను వాడొద్దు.. వారైతే ఓకే.. ఎన్నికల సంఘం ఆదేశాలు

ఏపీలో అసెంబ్లీ ఎన్నికలు సమీపిస్తున్న వేళ.. ఎన్నికల సంఘం కీలక ఆదేశాలు జారీ చేసింది. ఎన్నికల విధుల్లో వాలంటీర్లకు విధుల అప్పగింతకు సంబంధించి కీలక సూచనలు చేసింది. వాలంటీర్లకు ఎట్టి పరిస్థితుల్లోనూ ఎన్నికల విధులు అప్పగించవద్దని ఈసీ స్పష్టం చేసింది. వాలంటీర్లను పోలింగ్ ఏజెంట్లుగా నియమించుకోవడానికి అనుమతి ఇవ్వవద్దని స్పష్టం చేసింది. ఈ మేరకు ఎన్నికల సంఘం ఏపీ సీఈవోకు లేఖరాసింది.

ఇదే సమయంలో ఎన్నికల్లో గ్రామ,వార్డు సచివాలయ సిబ్బంది పాత్రపైనా ఈసీ స్పష్టమైన ఆదేశాలు ఇచ్చింది. ఎన్నికల విధుల్లోకి గ్రామ, వార్డు సచివాలయ సిబ్బందిని తీసుకునేందుకు ఎలాంటి అభ్యంతరం లేదని సీఈవోకు ఎన్నికల సంఘం లేఖలో స్పష్టం చేసింది. ప్రతీ పోలింగ్ బూత్‌లో రెగ్యులర్ సచివాలయ సిబ్బందిని ఉపయోగించుకోవచ్చని ఈసీ సూచించింది. అయితే ఓటర్ల వేలుకు ఇంకుపూసే విధులు వంటివి మాత్రమే అప్పగించాలని ఎన్నికల సంఘం స్పష్టం చేసింది. అంతకంటే ముఖ్యమైన పనులేవీ వారికి అప్పగించవద్దంటూ ఏపీ సీఈవోకు లేఖలో సూచించింది. అలాగే బీఎల్‌వోలుగా పనిచేసిన సిబ్బందిని పోలింగ్‌ విధుల్లోకి తీసుకోవద్దని.. వారికి పోలింగ్‌ రోజు ఇతర పనులు అప్పగించేలా ఉత్తర్వులు ఇవ్వాలని పేర్కొంది.

ఈసీ ఆదేశాల నేపథ్యంలో.. గ్రామ, వార్డు సచివాలయ సిబ్బందిని ఎన్నికల విధుల్లోకి తీసుకోవడానికి ఇబ్బంది లేదంటూ జిల్లా కలెక్టర్లకు , అధికారులకు సీఈవో తెలియజేశారు. అయితే ముఖ్యమైన విధులేవీ అప్పగించవద్దని స్పష్టం చేశారు. అలాగే వాలంటీర్లను ఎన్నికల విధులకు దూరంగా ఉంచాలని స్పష్టం చేశారు.మరోవైపు గతంలో ఉపఎన్నికల వంటి సమయాల్లోనూ ఈసీ వాలంటీర్లను దూరంగా ఉంచుతూ వచ్చింది. ప్రభుత్వం నుంచి గౌరవ వేతనం తీసుకునే వాలంటీర్లు అధికార పార్టీకి అనుకూలంగా వ్యవహరిస్తారంటూ గతంలో ఈసీకి ఫిర్యాదులు అందాయి. ఈ నేపథ్యంలో వచ్చే ఎన్నికల్లోనూ వాలంటీర్లకు విధులు అప్పగించవద్దంటూ ఈసీ.. సీఈవోకు సూచించింది.