ఆ ఊరు ఒక ఐఏఎస్‌ల ఫ్యాక్టరీ.. 75 ఇళ్లు ఉన్న గ్రామంలో 51 మంది ఐఏఎస్, ఐపీఎస్‌లు

మన దేశంలోనే అత్యున్నతమైన ప్రభుత్వ ఉద్యోగం అంటే అది ఐఏఎస్, ఐపీఎస్ లాంటి సివిల్ సర్వీసెస్. ఏటా యూనియన్ పబ్లిక్ సర్వీస్ కమిషన్ నిర్వహించే ఈ సివిల్ సర్వీసెస్ పరీక్ష కోసం దేశ వ్యాప్తంగా లక్షలాది మంది పోటీ పడుతూ ఉంటారు. ఇక ఐఏఎస్, ఐపీఎస్ అధికారులు కావాలంటే.. అత్యంత కఠినమైన యూపీఎస్సీ పరీక్షలో విజయం సాధించాలి. కానీ ఈ పరీక్షను దాటి ఇంటర్వ్యూను దాటడం చాలా కష్టమైంది. అయితే కొందరు ఏళ్లకేళ్లు కోచింగ్‌లు తీసుకున్నా.. గదుల్లో కూర్చొని పుస్తకాలను అవపోసన పట్టినా ఎక్కడో ఏదో చిన్న తప్పిదంతో ఉద్యోగానికి దూరం అవుతారు. ఇక ఈ పరీక్షలో పాసైన వారు అఖిల భారత సర్వీసుల్లో చేరి.. దేశానికి సేవలు అందిస్తారు. అలాంటి ఒక ఉద్యోగం ఊరిలో ఒకరికి వస్తేనే గగనం అనుకుంటే ఆ ఊరిలో మాత్రం దాదాపుగా ఇంటికో ఐఏఎస్, ఐపీఎస్ అధికారి ఉండడం విశేషం. కేవలం 75 ఇళ్లు మాత్రమే నివసించే ఓ చిన్న గ్రామం నుంచి 51 మందికి పైగా ఐఏఎస్, ఐపీఎస్ అధికారులు ఉన్నారు.

ఉత్తర్‌ప్రదేశ్‌లోని జౌన్‌పూర్ జిల్లాలోని మాధోపట్టి అనే గ్రామం ఐఏఎస్, ఐపీఎస్ అధికారులకు స్వస్థలం. మాధోపట్టి గ్రామంలో ఇప్పటివరకు 51 మంది అఖిల భారత సర్వీసులకు ఎంపిక అయ్యారు. రాజధాని లక్నో నుంచి 300 కిలోమీటర్ల దూరంలో ఉన్న ఈ మాధోపట్టి గ్రామం.. దేశానికి అత్యధిక మంది ఐఏఎస్, ఐపీఎస్‌లను అందించింది. అందుకే ఈ మాధోపట్టి గ్రామాన్ని ఐఏఎస్ ఫ్యాక్టరీ అని పిలుస్తారు. ఈ క్రమంలోనే మన దేశంలో సివిల్ సర్వీసెస్‌లో అత్యధిక అభ్యర్థులు ఉన్న గ్రామంగా మాధోపట్టి నిలవడం గమనార్హం. ఇక పండగల వేళ.. ఆ గ్రామం మొత్తం ప్రభుత్వ అధికారిక వాహనాలతో రద్దీగా ఉంటుందని స్థానికులు పేర్కొన్నారు.

అయితే ఈ మాధోపట్టి గ్రామం ఏటా ఐఏఎస్, ఐపీఎస్ అధికారులను తయారు చేయడం గమనార్హం. అయితే ఈ గ్రామంలో కోచింగ్ సెంటర్‌లు కూడా లేకపోవడం మరో విశేషం. అయితే ఈ మాధోపట్టి గ్రామంలోని వారు కేవలం ఐఏఎస్, ఐపీఎస్‌లకే కాకుండా ఇతర రంగాల్లో కూడా రాణిస్తున్నారు. విద్యకు కేంద్రంగా నిలుస్తున్న ఈ గ్రామం నుంచి వచ్చిన వారిలో స్పేస్, అణు పరిశోధన, న్యాయ సేవలు, బ్యాంకింగ్‌ రంగాల్లో ఉన్నత స్థాయిల్లో స్థిరపడ్డారు. ఇక నలుగురు అన్నదమ్ములు.. వినయ్ కుమార్ సింగ్, ఛత్రపాల్ సింగ్, అజయ్ కుమార్ సింగ్, శశికాంత్ సింగ్ అనే ఐఏఎస్ అధికారులు ఉండటంతో ఈ గ్రామం మరింత ప్రసిద్ధి చెందింది.

ఈ గ్రామం స్వాతంత్ర్య ఉద్యమ సమయంలో కూడా పాలుపంచుకుంది. స్వాతంత్ర సమరయోధుడు ఠాకూర్ భగవతి దిన్ సింగ్, అతని భార్య శ్యామరాతి సింగ్ 1917 లో పిల్లలను చదివించడం ప్రారంభించారని స్థానికులు చెబుతారు. మొదట్లో శ్యామరాతి అమ్మాయిలకు పాఠాలు చెప్పడం ప్రారంభించారని.. ఆ తర్వాత అబ్బాయిలకు కూడా నేర్పించడం మొదలుపెట్టినట్లు పేర్కొంటారు.