బెంగళూరు ఐస్‌క్రీమ్ షాపులో అక్షతామూర్తి, నారాయణమూర్తి.. బ్రిటన్ ప్రధాని సతీమణి సింప్లిసిటీకి అందరూ ఫిదా

ఆయనేమో దేశీయ ఐటీ దిగ్గజం.. ఆయన కుమార్తె ఏకంగా బ్రిటన్ ప్రధానికి సతీమణి. అయినా, వారిద్దరూ కలిసి సాధారణ వ్యక్తుల్లా ఐస్‌క్రీమ్ పార్లర్‌కు వచ్చి.. ఓ మూల కూర్చుని తింటున్న ఓ ఫోటో ప్రస్తుతం నెట్టింట వైరల్ అవుతోంది. వారి నిరాడంబరతకు అద్దం పట్టే ఈ దృశ్యం చూసిన నెటిజన్లు ప్రశంసలు కురిపిస్తున్నారు. బెంగళూరు నగరంలోని జయనగరలో ఉన్న కార్నర్‌ హౌస్‌ ఐస్‌క్రీమ్‌ ప్రియులతో రోజూ కిటకిటలాడుతుంది. ఈ క్రమంలో సోమవారం పార్లర్‌కు వచ్చిన ఇద్దరు అతిథులు సాధారణ కస్టమర్లలా వచ్చి ఐస్‌క్రీమ్‌ తింటున్నారు. అయితే, ఈ సమయంలో అక్కడకు వచ్చిన దేవి సింగ్‌ అనే వ్యక్తి తండ్రీకూతుళ్లను చూసి విస్తుపోయాడు.

ఎందుకంటే వారిద్దరూ సాధారణ వ్యక్తులు కాదు. ఒకరు ఇంగ్లండ్‌ ప్రథమ మహిళ అక్షతమూర్తి.. ఇంకొకరు భారతీయ ఐటీ దిగ్గజం ఇన్ఫోసిస్‌ వ్యవస్థాపకుడు నారాయణమూర్తి. ఒక్క క్షణం పాటు తనకళ్లను తానే నమ్మలేకపోయాడు. వెంటనే వారి దగ్గరకు వెళ్లి ఫోటో తీసుకున్నాడు. తండ్రీకూతుళ్లు అభ్యంతరం వ్యక్తం చేయకుండా చిరునవ్వు చిందిస్తూ ఉండిపోయారు. ఈ ఫోటోను అతడు ట్విట్టర్ (ఎక్స్)‌లో షేర్ చేయడంతో వైరల్ అవుతోంది.

‘బ్రిటన్‌లో అతి ధనవంతులైన వ్యక్తిగా అక్షితమూర్తి గుర్తింపు పొందగా.. నారాయణమూర్తి తన ఇన్ఫోసిస్‌ సంస్థతో పాటు ఫౌండేషన్‌తో కోట్లాది రూపాయలను సేవా కార్యక్రమాలకు ఖర్చు చేస్తున్నారు.. వీరు చాలా ధనికులు.. వీరి జీవితం మాత్రం ఎంతో నిరాడంబరం’ అంటూ ఫోటోకు క్యాప్షన్ జోడించాడు. దీనిపై ‘అద్భుతమైన సాధారణ వ్యక్తులు.. నిజంగా అద్భుతం’ అని ఒకరు.. ‘బ్రిటన్ ప్రథమ మహిళ నిరాడంబరత ఇది’ అని మరొకరు కామెంట్లు పెట్టారు.

గత ఆదివారం బెంగళూరులోని సెయింట్ జోసెఫ్ కాలేజ్ ఆఫ్ కామర్స్‌లో నారాయణమూర్తి జీవిత చరిత్ర ‘అన్‌కామన్‌ లవ్‌: ది ఎర్లీ లైఫ్‌ ఆఫ్‌ సుధా అండ్‌ నారాయణమూర్తి’ పుస్తకావిష్కరణ కార్యక్రమం నిర్వహించారు. ఈ కార్యక్రమానికి బ్రిటన్‌ ప్రధాని రుషి సునాక్‌ సతీమణి, ఆయన కుమార్తె అక్షతమూర్తి హాజరయ్యారు. ఈ కార్యక్రమం తర్వాత చిన్నతనంలో తాను ఎంతో ఇష్టంగా తినే ఐస్‌క్రీమ్‌ తినడానికి అక్షతా మూర్తి తండ్రితో కలిసి వచ్చారు. అక్షతా మూర్తి వివాహం 2009లో బ్రిటన్ ప్రధాని రిషి సునాక్‌తో జరిగింది.