సరిగ్గా పుల్వామా ఘటన జరిగిన రోజే సరిహద్దుల్లో మరోసారి రెచ్చిపోయిన పాక్ రేంజర్లు

2019 ఫిబ్రవరి 14 వ తేదీ. దేశం మొత్తం వాలంటైన్స్ డే సంబురాల్లో మునిగిపోగా.. జమ్మూ కాశ్మీర్‌లో మాత్రం విధ్వంసం జరిగింది. సీఆర్‌పీఎఫ్ జవాన్లు వెళ్తున్న కాన్వాయ్‌పై పుల్వామా వద్ద ఉగ్రదాడి చోటు చేసుకుంది. ఈ భయంకరమైన దుర్ఘటనలో 40 మంది భారత సైనికులు అమరులయ్యారు. ఈ ఘటన జరిగి నేటికి సరిగ్గా 5 సంవత్సరాలు. పుల్వామా దాడి జరిగిన ఫిబ్రవరి 14 వ తేదీ భారత దేశ చరిత్రలో ఒక బ్లాక్ డే గా నిలిచింది. అయితే ఇవాళ పాకిస్థాన్ సరిహద్దుల్లో పాక్ రేంజర్లు రెచ్చిపోయారు. మరోసారి కాల్పుల విరమణ ఒప్పందానికి తూట్లు పొడుస్తూ.. భారత సైన్యంపై కాల్పులు జరిపారు. సరిహద్దుల్లో బోర్డర్ సెక్యూరిటీ ఫోర్స్-బీఎస్ఎఫ్ ఏర్పాటు చేసుకున్న పోస్టు‌లపై ఇష్టం వచ్చినట్లు కాల్పులకు తెగబడ్డారు.

జమ్మూ కాశ్మీర్‌లోని భారత్-పాక్ అంతర్జాతీయ సరిహద్దు వెంబడి మరోసారి పాకిస్తాన్ రేంజర్లు బరితెగించారు. సరిహద్దు వెంబడి ఉన్న బీఎస్ఎఫ్ పోస్టులపై విచక్షణరహితంగా కాల్పులు జరిపారు. బుధవారం సాయంత్రం కాల్పుల విరమణ ఒప్పందాన్ని ఉల్లంఘించి పాక్ రేంజర్లు భారత సైన్యంపై కాల్పులు జరిపినట్లు అధికారులు వెల్లడించారు. అయితే ఈ కాల్పులను భారత సైనికులు తిప్పికొట్టారని పేర్కొన్నారు.

మక్వాల్‌లోని సరిహద్దు ఔట్‌పోస్టుపైకి సరిహద్దు అవతలి వైపు నుంచి పాక్ రేంజర్లు చేసిన కాల్పులను.. బీఎస్ఎఫ్ సిబ్బంది సమర్థవంతంగా అడ్డుకున్నట్లు పేర్కొన్నారు. సాయంత్రం 5.50 గంటలకు ప్రారంభమైన కాల్పులు 20 నిమిషాలకు పైగా కొనసాగినట్లు అధికారులు వెల్లడించారు. అయితే ఈ కాల్పుల్లో భారత్ వైపు ఎలాంటి ప్రాణనష్టం జరలేదని వెల్లడించారు. పాక్ వైపు పరిస్థితిపై ఇంకా స్పష్టత రాలేదు.

గతేడాది నవంబర్‌ 8, 9 వ తేదీల్లో మధ్య రాత్రిలో కూడా పాక్ రేంజర్లు ఇలాగే అకస్మాత్తుగా కాల్పులకు దిగారు. సాంబా జిల్లాలోని రామ్‌గఢ్ సెక్టార్‌లో కాల్పులకు తెగబడగా.. ఆ కాల్పుల్లో ఒక బీఎస్ఎఫ్ జవాన్ అమరుడు అయ్యారు. ఇక అంతకుముందు 2021 ఫిబ్రవరి 25 వ తేదీన రెండు దేశాలు కాల్పుల విరమణ ఒప్పందాన్ని అంగీకరించాయి. ఆ ఒప్పందం కుదరిన తర్వాత గతేడాది తొలి మరణం సంభవించింది.

అయితే అంతకుముందు అక్టోబర్ 26 వ తేదీన జమ్మూలోని అర్నియా సెక్టార్‌లో సరిహద్దు వెంబడి జరిగిన కాల్పుల్లో ఇద్దరు బీఎస్ఎఫ్ జవాన్లతోపాటు మరో మహిళ గాయపడ్డారు. అక్టోబర్ 17 వ తేదీన జరిగిన మరో ఘటనలో మరో బీఎస్ఎఫ్ జవాన్ గాయపడ్డాడు. అయితే పాక్ నుంచి భారత్‌లోకి జమ్మూ కాశ్మీర్‌లోకి ఉగ్రవాదులను పంపించేందుకు సాధారణంగా పాకిస్తాన్ రేంజర్లు భారత బలగాలపై కాల్పులు జరుపుతారు. ఈ క్రమంలోనే భారత బలగాల దృష్టి కాల్పులపై ఉంటే.. అదే అదనుగా భావించి ఉగ్రవాదులను భారత్‌లోకి పంపిస్తూ ఉంటారు.