చితికి నిప్పు అంటిస్తుండగా ఒక్కసారిగా లేచిన మహిళ.. అంతా షాక్!

భూమి మీద నూకలు ఉంటే ఎలాంటి ప్రమాదం జరిగినా బతికి బయటపడతారు అనే సామెతను మనం తరచూ వింటూనే ఉంటాం. అచ్చం అలాంటి సంఘటనే తాజాగా ఒకటి జరిగింది. ఓ అగ్ని ప్రమాదంలో తీవ్రంగా గాయపడిన మహిళను మొదట ఆస్పత్రికి తరలించారు. అక్కడ చికిత్స చేసిన డాక్టర్లు.. ఆ మహిళ చనిపోయిందని నిర్ధారించారు. దీంతో ఆ మహిళ మృతదేహాన్ని ఇంటికి తీసుకెళ్లి కుటుంబ సభ్యులు కన్నీరుమున్నీరుగా విలపించారు. ఆ తర్వాత ఆ మహిళ శవానికి దహన సంస్కారాలు నిర్వహించేందుకు అన్ని ఏర్పాట్లు చేశారు. చివరికి చితి కూడా పేర్చి.. దాన్ని అంటించేందుకు సిద్ధం కాగా.. అంతలోనే ఊహించని ఘటన చోటు చేసుకుంది. కొన్ని క్షణాల్లో చితి అంటిస్తుండగా.. దాని మీద పడుకున్న మహిళ ఒక్కసారిగా లేచింది. దీంతో అక్కడ ఉన్నవారంతా షాక్ అయ్యారు.

ఇంట్లో జరిగిన అగ్నిప్రమాదంలో ఓ మహిళ చనిపోయింది. అంతా కన్నీరుమున్నీరుగా విలపించారు. చివరకు దహన సంస్కారాలు నిర్వహించాలని స్మశాన వాటికకు తీసుకొచ్చారు. చితి కూడా సిద్ధం చేశారు. మరికొద్ది క్షణాల్లో చితికి నిప్పటించడానికి సిద్ధం అవుతుండగా.. మృతి చెందిన మహిళ ఒక్కసారిగా కళ్లు తెరిచింది. దీంతో కుటుంబ సభ్యులతోపాటు అక్కడున్న వారంతా ఒక్కసారిగా హడలెత్తిపోయారు.

ఈ విచిత్రమైన సంఘటన ఒడిశాలోని బెర్హంపూర్ నగరంలో మంగళవారం చోటు చేసుకుంది. బెర్హంపూర్ నగరానికి చెందిన బుజ్జమ్మ అనే 52 ఏళ్ల మహిళ ఇంట్లో ఈ నెల 1 వ తేదీన ఘోర అగ్ని ప్రమాదం జరిగింది. ఈ ఘటనలో బుజ్జమ్మ తీవ్రంగా గాయపడింది. ఈ ఘటనలో ఆమె శరీరం 50 శాతానికి పైగా కాలిపోయింది. దీంతో ఆమెను ఎంకేసీజీ మెడికల్ కాలేజీ అండ్ ఆస్పత్రికి తరలించి చికిత్స అందించినప్పటికీ ఫలితం లేకుండా పోయింది. మెరుగైన వైద్యం చేయించేందుకు పెద్ద ఆస్పత్రికి తీసుకెళ్లాలని డాక్టర్లు సూచించగా.. వారిది నిరుపేద కుటుంబం కావడంతో అంత డబ్బు పెట్టే స్థోమత లేక ఇంటికి తీసుకెళ్లారు.

ఇంటికి తీసుకువచ్చినప్పటి నుంచి కొనప్రాణాలతో పోరాడుతున్న బుజ్జమ్మ.. మంగళవారం రోజు ఊపిరి పీల్చుకోవడం లేదని, కళ్లు తెరవడం లేదని ఆమె భర్త సిబారం వారి బంధువులకు సమాచారం అందించాడు. దీంతో బుజ్జమ్మ చనిపోయిందని అంతా భావించారు. ఆమె అంత్యక్రియలు చేసేందుకు కూడా బుజ్జమ్మ భర్త సిబారం వద్ద డబ్బులు లేకపోవడంతో స్థానికుల వద్ద డబ్బులు సేకరించాడు. అనంతరం ఆమె మృతదేహాన్ని శ్మశానవాటికకు తీసుకెళ్లడానికి స్థానికులు వాహనాన్ని ఏర్పాటు చేశారు.

ఇక ఆ వాహనంలో బుజ్జమ్మ మృతదేహాన్ని బీజాపూర్‌లోని శ్మశాన వాటికకు తీసుకెళ్లి.. అక్కడ చితి ఏర్పాటు చేశారు. అన్నీ సిద్ధం చేసి.. చివరికి మంటలు అంటిస్తుండగా బుజ్జమ్మ ఒక్కసారిగా కళ్లు తెరచింది. దీంతో అక్కడున్న వారంతా ఒక్కసారిగా భయాందోళనలకు గురయ్యారు. బుజ్జమ్మ చనిపోలేదని.. ఇంకా బతికే ఉందని గుర్తించి.. అదే వ్యాన్‌లో ఆమెను ఇంటికి తీసుకెళ్లారు. చితికి నిప్పంటించడానికి కొన్ని నిమిషాల ముందు బుజ్జమ్మ కళ్లు తెరిసిన ఘటన స్థానికంగా సంచలనంగా మారింది. ఆమెను చికిత్స కోసం మళ్లీ ఆస్పత్రికి తరలించారు.