ఏపీ రైతుల అకౌంట్‌లలోకి డబ్బులు.. ఈ నెల 22లోగా కచ్చితంగా ఈ పని పూర్తి చేయాలి

ఏపీలో రైతులకు ముఖ్య గమనిక.. రబీలో ఈ–క్రాప్, ఈకేవైసీల నమోదు ప్రక్రియను ఈ నెల 22లోగా పూర్తి చేయాలని వ్యవసాయశాఖ ఇంఛార్జ్ కమిషనర్‌ డాక్టర్‌ గెడ్డం శేఖర్‌ బాబు సూచించారు. అన్ని జిల్లాల వ్యవసాయ అధికారులతో నిర్వహించిన వీడియో కాన్ఫరెన్స్‌లో సమీక్ష చేశారు. రబీలో ఎక్కువ సాగయ్యే శనగ, మొక్కజొన్న, మినుము వంటి మెట్టపంటలు కోతకు వచ్చే సమయం దగ్గర పడుతుందన్నారు. అందువలన సాధ్యమైనంత త్వరగా ఈ క్రాప్, ఈ కేవైసీల నమోదు ప్రక్రియ పూర్తి చేయాలని సూచనలు చేశారు.

క్షేత్రస్థాయిలో నియమించిన సూపర్‌ చెక్‌ బృందాల ప్రగతిపై సమీక్షించారు. ఈ కేవైసీలో నూరుశాతం సాధించే దిశగా ఈ నెల 12 నుంచి 21వ తేదీ వరకు జరుగుతున్న క్యాంపెయిన్‌ను సద్వినియోగం చేసుకోవాలన్నారు. వచ్చే ఖరీఫ్‌ 2024లో అవసరమైన ఎరువులు, విత్తనాల కోసం జిల్లాల వారీగా యాక్షన్‌ ప్లాన్‌ సిద్ధం చేయాలని సూచించారు. పీఎం కిసాన్‌ 16వ విడత నిధులు త్వరలో విడుదల కానున్నాయని.. ఇంకా ఆధార్‌తో బ్యాంక్‌ ఖాతాలను అనుసంధానం చేయని వారిని గుర్తించి సత్వరమే ఆ ప్రక్రియ పూర్తి చేయాలన్నారు.

ప్రకృతి వైపరీత్యాల కారణంగా నష్టాలను చవిచూస్తున్న రైతులకు ఈ–క్రాప్‌ నమోదుతో ఎంతో ప్రయోజనం చేకూరుతోంది. ప్రస్తుతం రబీసీజన్‌ ప్రారంభం కావడంతో జిల్లా వ్యాప్తంగా ఉద్యాన, వ్యవసాయశాఖ అధికారులు ఉమ్మడిగా ఈ –క్రాప్‌ నమోదు ప్రక్రియ చేపట్టారు. పంటల సాగు వివరాలు నమోదు చేయడం ద్వారా ప్రకృతి వైపరీత్యాలతో రైతులు తాము పండించిన పంటలు నష్టపోతే ప్రభుత్వం సాయం అందించడానికి వీలుంటుంది. ఈక్రాప్‌ సర్టిఫికెట్లతో బ్యాంకుల్లో పంట రుణాలు కూడా పొందే అవకాశం ఉంది. సాధారణ రైతులతో పాటు కౌలు రైతులకు పంటనష్టపరిహారం అందుతుంది.

ఈ క్రాప్ ద్వారా ప్రకృతి వైపరీత్యాలు సంభవించినప్పుడు పంటసాగు చేసి నష్టపోయిన రైతులకు నేరుగా నష్టపరిహారం పొందే వెసులు బాటు ఉంటుందంటున్నారు అధికారులు. దళారుల చేతికి బీమా పరిహారం అందదని.. ప్రభుత్వమే పూర్తిస్థాయిలో రైతుల తరపున బీమా సొమ్ము చెల్లిస్తోందన్నారు. దీంతో పంటనష్టపోయినప్పుడు గతంలో ఈ క్రాప్‌ ద్వారా రైతు ఎంత మేరకు పంట సాగు చేశారో వివరాలు తెలుస్తాయన్నారు. అలాగే పంట మార్పిడికి వీలు ఉంటుందని.. పంటల వివరాల ఆధారంగా ఉత్పత్తుల లభ్యతపై స్పష్టత వచ్చే అవకాశం ఉంటుందంటున్నారు. ఎరువులు, పురుగుల మందులు, ఎంతమేరకు అవసరం ఆవుతాయో ఆయా పరిధిలోని రైతుభరోసా కేంద్రాలకు (ఆర్‌బీకే) తెలుస్తుందని. దీంతో ఈక్రాప్‌ నమోదు రైతులకు ఎంతగానో ఉపయోగకరంగా ఉంటుంది అంటున్నారు. రైతులు ఈ విషయాన్ని గమనించి ఈ క్రాప్ నమోదు చేయించుకోవాలని అధికారులు సూచిస్తున్నారు.