కమలంలోకి మాజీ సీఎం కమల్‌నాథ్.. కాంగ్రెస్ పార్టీకి మరో ఎదురుదెబ్బ

సార్వత్రిక ఎన్నికల ముందు కాంగ్రెస్ పార్టీకి వరుస షాక్‌లు తగులుతున్నాయి. ఇప్పటికే ప్రతిపక్షాలన్నీ కలిసి ఏర్పాటు చేసిన ఇండియా కూటమి నుంచి కాంగ్రెస్ పార్టీని వ్యతిరేకిస్తూ మిగిలిన పార్టీలు ఒక్కొక్కటిగా దూరం జరుగుతున్నాయి. దీనికి తోడు అటు అధికార ఎన్డీఏ కూటమిలోకి కొత్త పార్టీలు, పాత మిత్రులు వచ్చి చేరుతున్నారు. ఇవన్నీ పక్కన పెడితే సీనియర్ నేతలు, దశాబ్దాలుగా కాంగ్రెస్ పార్టీని పట్టుకుని ఉన్న నాయకులు కూడా పార్టీని వీడుతుండటం హస్తం పార్టీకి మింగుడు పడటం లేదు. అటు ఇండియా కూటమి నుంచి పార్టీలు.. ఇటు సొంత పార్టీ నుంచి నేతలు బయటికి పోతుండటం ఎన్నికల ముందు కాంగ్రెస్ పార్టీకి ఊపిరి పీల్చుకోకుండా చేస్తున్నాయి. ఈ క్రమంలోనే మరో సీనియర్ కాంగ్రెస్ నేత, మధ్యప్రదేశ్ మాజీ సీఎం కమల్‌నాథ్‌ కూడా హస్తం పార్టీకి గుడ్ బై చెప్పి కాషాయ దళంలో చేరనున్నట్లు విస్తృత ప్రచారం జరుగుతోంది.

వివిధ రాష్ట్రాల్లో ఉన్న కాంగ్రెస్ సీనియర్ నేతలు, మాజీ ముఖ్యమంత్రులు, గట్టి పట్టున్న నేతలు ఒక్కొక్కరుగా పార్టీని వీడటం హస్తం పార్టీని ఉక్కిరిబిక్కిరి చేస్తున్నాయి. ఇటీవలె మహారాష్ట్ర మాజీ సీఎం అశోక్ చవాన్ కాంగ్రెస్ పార్టీకి గుడ్ బై చెప్పి బీజేపీలో చేరి.. ఆ వెంటనే రాజ్యసభకు నామినేషన్ వేయగా.. మరో మాజీ సీఎం కమల్ నాథ్ కూడా ఇప్పుడు అదే బాటలో ఉన్నట్లు తెలుస్తోంది. గత కొన్ని రోజులుగా కమల్‌నాథ్.. కమలం తీర్థం పుచ్చుకుంటారని వార్తలు వస్తుండగా.. తాజాగా ఆయన కుమారుడు నకుల్ నాథ్.. తన సోషల్ మీడియా బయో నుంచి కాంగ్రెస్ పార్టీ అనే పదాన్ని తొలగించారు.

ఈ నేపథ్యంలోనే కమల్ నాథ్, తన కుమారుడు నకుల్ నాథ్‌తో కలిసి కాంగ్రెస్ పార్టీని వీడి బీజేపీ కండువా కప్పుకుంటారు అనే ఊహాగానాలకు బలం చేకూరుతోంది. మరోవైపు.. కమల్ నాథ్ ఇప్పటికే ఢిల్లీ చేరుకుని బీజేపీ అగ్రనేతలతో చర్చలు జరుపుతున్నట్లు తెలుస్తోంది. తనతోపాటు తన కుమారుడికి కూడా పార్టీలో భవిష్యత్ గురించి స్పష్టమైన హామీ లభిస్తే.. ఇద్దరూ కలిసి బీజేపీలో చేరే అవకాశాలు కనిపిస్తున్నాయి.

ఇక గత కొన్ని రోజులుగా కమల్ నాథ్ పార్టీ మారుతున్నారనే ఊహాగానాలు వెల్లువెత్తిన వేళ.. ఆయన లోక్‌సభ ఎన్నికల ప్రచారాన్ని ప్రారంభించారు. తాను పార్టీ మారే ప్రసక్తి లేదని తేల్చి చెప్పారు. మరోవైపు.. ఈ నెల 27 వ తేదీన జరగనున్న రాజ్యసభ ఎన్నికలకు సంబంధించి కాంగ్రెస్ తరఫున మధ్యప్రదేశ్‌ నుంచి కమల్ నాథ్ సీటు ఆశించినట్లు ఆయన సన్నిహిత వర్గాల్లో చర్చ జరుగుతోంది. అయితే కమల్ నాథ్‌ను కాదని.. అశోక్ సింగ్‌ను బరిలోకి దింపింది. అయితే తనకు రాజ్యసభ అవకాశం రాకపోవడంతో కమల్ నాథ్ అలిగినట్లు తెలుస్తోంది. ఈ క్రమంలోనే ఢిల్లీ పర్యటన, కుమారుడి సోషల్ మీడియా అకౌంట్‌లో బయో మార్పు.. వారిద్దరి పార్టీ మారే అవకాశాలున్నాయని స్పష్టం అవుతోంది.