అయోధ్య రాముడి థీమ్‌తో నాణేలు విడుదల చేసిన కేంద్రం

భారత దేశ చరిత్రలోనే అయోధ్యలో రామ మందిర నిర్మాణం, ప్రారంభోత్సవం ఒక మైలు రాయిగా నిలిచిపోతుంది అని చెప్పడంలో ఎలాంటి అతిశయోక్తి లేదు. ఈ క్రమంలోనే దేశంలో రామ మందిర ప్రాణ ప్రతిష్ఠ మారుమోగిపోతూ ఉంది. ఈ నేపథ్యంలోనే మరికొన్ని రోజుల్లో జరగనున్న లోక్‌సభ ఎన్నికల్లో అధికారంలో ఉన్న నరేంద్ర మోదీ సర్కార్‌కు ఈ అయోధ్య రామ మందిరం భారీగా ఓట్లు తెచ్చిపెడుతుందని.. బీజేపీ వర్గాలు తెగ ఆశపడుతున్నాయి.

ఇక ఎన్నికలకు ముందు రామ మందిరాన్ని ప్రారంభించాలని.. ఆలయ నిర్మాణం పూర్తి కాకుండానే ప్రధాని నరేంద్ర మోదీ.. అయోధ్య రాముడికి ప్రాణ ప్రతిష్ఠ చేశారని.. ప్రతిపక్షాలు తీవ్ర ఆరోపణలు చేస్తున్నాయి. ఇవన్నీ పరిణామాల నేపథ్యంలో అయోధ్యలో కొలువుదీరిన బాలరాముడు ప్రస్తుతం నిత్యం లక్షలాది మంది భక్తులకు దర్శనం ఇస్తున్నాడు. ఈ క్రమంలోనే అయోధ్య థీమ్‌తో కేంద్ర ప్రభుత్వం నాణేలు విడుదల చేసింది.

తాజాగా కేంద్ర ఆర్థిక శాఖ మంత్రి నిర్మలా సీతారామన్.. గురువారం 3 సావనీర్ నాణేలను విడుదల చేశారు. ఇందులో అయోధ్య బాల రాముడు, అయోధ్యలోని రామ జన్మభూమి ఆలయం థీమ్ ఆధారంగా ఒకటి ఉండటం విశేషం. సెక్యూరిటీ ప్రింటింగ్ అండ్ మింటింగ్ కార్పొరేషన్ ఆఫ్ ఇండియా -ఎస్పీఎంసీఐఎల్‌కు సంబంధించిన 19 వ స్థాపన కార్యక్రమంలో పాల్గొన్న నిర్మలా సీతారామన్.. అయోధ్యలోని రామ్ లల్లా , రామ జన్మభూమి దేవాలయం థీమ్‌తో కూడిన 3 స్మారక నాణేలను ఆవిష్కరించారు.

బుద్ధుని జ్ఞానోదయం అయిన స్థాప జ్ఞాపకార్థం ద్వి లోహ కవచమైన సావనీర్ నాణేన్ని.. ఇక మన దేశంలో అంతరించిపోతున్న జంతువుల్లో భాగంగా ఖడ్గమృగం ఉన్న మరొక నాణెం.. ఇలా మొత్తం 3 నాణేలను నిర్మలా సీతారామన్ విడుదల చేశారు. ఈ సందర్భంగా మాట్లాడిన నిర్మలా సీతారామన్.. ఎస్పీఎంసీఐఎల్‌ సంస్థ విడుదల చేస్తున్న స్మారక స్టాంపులు లేదా నాణేలు తీసుకునే ఇతివృత్తాలు ఆకట్టుకునే విధంగా ఉన్నాయని కొనియాడారు. అంతేకాకుండా ప్రపంచవ్యాప్తంగా జరుగుతున్న పరిణామాలు, పర్యావరణ ఆందోళనలు, దివ్యాంగులకు సంబంధించిన ఆందోళనలను తెలుసుకోవాలని ఆ సంస్థకు సూచించారు.

ఇలాంటి నాణేలు బహుమతిగా ఇవ్వడానికి విలువైన వస్తువులుగా మారడానికి తగినంత ఆకర్షణీయంగా మారతాయని నిర్మలా సీతారామన్ ఆశాభావం వ్యక్తం చేశారు. అయితే ఈ నాణేలు గానీ స్టాంపులను గానీ.. సెక్యూరిటీ ప్రింటింగ్ అండ్ మింటింగ్ కార్పొరేషన్ ఆఫ్ ఇండియా అధికారిక వెబ్‌సైట్‌లో మాత్రమే అందులో నిర్ణయించిన ధరకు కొనుగోలు చేసే అవకాశం ఉంటుంది. అయితే ఇలాంటి నాణేలను కొనుగోలు చేసేవారు చాలా మంది ఆసక్తిగల వ్యక్తులు ఉంటారు.