120 కిలోల మేక చోరీ.. రూ.18 లక్షల విలువైన కారులో వచ్చి దొంగతనం.. ఎంతకు అమ్మారంటే?

దొంగలందు.. ఈ దొంగలు వేరయా అనే సామెత విన్నారా. ఈ దొంగతనం గురించి వింటే మీకు అదే అర్థం అవుతుంది. ఎందుకంటే కొంతమంది దొంగలు ఖరీదైన కారులో వచ్చి మేకను ఎత్తుకెళ్లారు. అయితే అది అలాంటి ఇలాంటి మేక కాదు. దాని బరువు 120 కిలోలు. రూ.18 లక్షల విలువైన కారులో వచ్చిన ఆ దొంగలు.. ఆ 120 కిలోల మేకను ఎత్తుకెళ్లారు. అనంతరం దాన్ని మటన్ షాప్ యజమానికి విక్రయించారు. ఇంతకీ ఆ భారీ బరువు ఉన్న మేకను ఎంతకు విక్రయించారో తెలుసా. రూ.27 వేలకు దాన్ని ఆ మటన్ షాప్ ఓనర్‌కు అమ్మారు. ఇప్పుడు ఈ వార్త సోషల్ మీడియాలో తెగ వైరల్‌గా మారింది.

ఈ ఘటన ఛత్తీస్‌గఢ్‌లోని అంబికాపూర్‌లో చోటు చేసుకుంది. ఖరీదైన కారులో వచ్చిన కొందరు దుండగులు స్థానిక బీజేపీ నేతకు చెందిన ఓ భారీ మేకను చోరీ చేశారు. తన భారీ మేక అదృశ్యమైందని బీజేపీ నేత సురేష్ గుప్తా పోలీసులకు ఫిర్యాదు చేశాడు. ఈ నెల 8 వ తేదీన తన మేక చోరీకి గురైనట్లు సురేష్ గుప్తా పోలీసులకు తెలిపాడు. తన ఇంటి వద్ద ఉన్న ఆ భారీ మేకను రూ.18 లక్షల విలువైన కారులో వచ్చి తీసుకెళ్లిపోయారని ఆవేదన వ్యక్తం చేశాడు.

అయితే తన మేక దొంగతనం కావడం పట్ల సురేష్‌ గుప్తా తీవ్ర విచారం వ్యక్తం చేశాడు. తన కుటుంబానికి ఆ మేకతో చాలా అనుబంధం ఉందని తెలిపాడు. ఆ మేకను తన కుటుంబంలో ఒక సభ్యుడిగా పెంచుకున్నట్లు పేర్కొన్నాడు. దాన్ని ఎంతో ఇష్టంగా పెంచుకుంటున్నట్లు వివరించాడు. దాంతో పాటు అది సాధారణమైన మేక కాదని.. 120 కిలోల బరువు ఉన్న ఆ మేక అదృశ్యం కావడంపై సురేష్‌ గుప్తా స్థానిక పోలీసులకు ఫిర్యాదు చేశాడు. అయితే తాను చేసిన ఫిర్యాదును స్థానిక పోలీసులు అంతగా పట్టించుకోకపోవడంతో సురేష్ గుప్తా తీవ్ర అసహనం వ్యక్తం చేశాడు. దీంతో మరికొంత మందితో కలిసి అదనపు ఎస్పీని కలిసి తన గోడు వెళ్లబోసుకున్నాడు.

దీంతో ఆ మేకను వెతికి పెట్టాలని అదనపు ఎస్పీ చేసిన ఆదేశాలతో పోలీసులు టీమ్‌లుగా ఏర్పడి గాలింపు చేపట్టారు. దీంతో రంగంలోకి దిగిన పోలీసులు.. సురేష్ గుప్తా ఇంటి పరిసరాల్లో ఉన్న సీసీటీవీ ఫుటేజ్‌ను పరిశీలించారు. ఈ క్రమంలోనే ఖరీదైన కారులో వచ్చిన వ్యక్తులు మేకను ఎత్తుకెళ్లిపోయినట్లు గుర్తించారు. 120 కిలోల బరువు ఉన్న ఆ మేకను మటన్‌ షాపు వ్యక్తికి రూ.27 వేలకు దొంగలు అమ్మేసినట్లు పోలీసులు గుర్తించారు. వెంటనే ఆ మటన్ షాప్‌ యజమాని ఆ భారీ మేకను కోసి మాంసంగా విక్రయించినట్లు దర్యాప్తులో వెల్లడైంది. దీంతో ఈ ఘటనకు సంబంధించి ఇద్దరు వ్యక్తులను పోలీసులు అరెస్ట్‌ చేశారు. తాము ఇష్టంగా పెంచుకున్న మేకను కోసి మాంసం విక్రయించడం పట్ల సురేష్ గుప్తా కుటుంబం తల్లడిల్లిపోయింది.