ఇంత కక్కుర్తి ఏంట్రా.. వేగంగా వెళ్తున్న ట్రక్కు నుంచి సినిమా రేంజ్‌లో చోరీ.. ఏం ఎత్తుకెళ్లారో తెలిస్తే నవ్వుతారు

 కాదేదీ చోరీకి అనర్హం అన్నట్టు కొన్ని కొన్ని దొంగతనాలు చూస్తే చాలా ఆశ్చర్యం వేస్తుంది. చిన్న చిన్న వస్తువులను కూడా దొంగతనం చేసి కొందరు దొంగలు కెమెరాలకు చిక్కుతూ ఉంటారు. అయితే తాజాగా జరిగిన ఓ దొంగతనం చూస్తే మాత్రం మీరు పగలబడి నవ్వడం ఖాయం. ఎందుకంటే కొందరు దొంగల ముఠా సినిమా రేంజ్‌లో దొంగతనానికి పాల్పడ్డారు. బైక్‌లపై వచ్చిన దొంగలు నడిరోడ్డుపై వేగంగా వెళ్తున్న ఓ ట్రక్కులోకి ఎక్కారు. ఆ తర్వాత ఆ ట్రక్కులో ఉన్న వస్తువులను తాము తెచ్చుకున్న బ్యాగుల్లో నింపుకున్నారు.

మేఘాలయ రాజధాని షిల్లాంగ్‌ నగరంలో ఈ దొంగతనం జరిగింది. కొందరు వ్యక్తులు బైక్‌లపై వచ్చి.. రోడ్డు మీద వేగంగా వెళ్తున్న ఓ ట్రక్కులోకి ఎక్కుతారు. ఇద్దరు దొంగలు ఆ ట్రక్కు ఎక్కి ఆ తర్వాత తమ వెంట తెచ్చుకున్న బ్యాగును బయటికి తీస్తారు. ఆ ట్రక్కులో ఉన్న ఓ భారీ బస్తా నుంచి వస్తువులను తమ బ్యాగుల్లో జాగ్రత్తగా నింపుకుంటారు. ఈ తతంగాన్ని మొత్తం ఆ ట్రక్కు వెనకాలే వెళ్తున్న ఓ వాహనదారుడు రికార్డ్ చేశాడు. ఆ వీడియోను ప్రస్తుతం సోషల్ మీడియాలో పోస్ట్ చేయడంతో తెగ వైరల్ అవుతోంది.

అయితే ముందు ట్రక్కులో దొంగతనం జరుగుతుంటే.. దాని వెనకాలే మిగిలిన దొంగలు బైక్‌లపై వెంట వెళ్లడం ఆ వీడియోలో కనిపిస్తోంది. ఇంత పకడ్బందీగా దొంగతనం చేస్తున్నారంటే అందులో ఏవో విలువైన వస్తువులే ఉన్నాయి అనుకుంటే అది పొరపాటే. ఎందుకంటే ఆ ట్రక్కులో ఉన్నవి ఉల్లిగడ్డలో లేదా ఆలుగడ్డలో అని తెలుస్తోంది. దీంతో నెటిజన్లు ఫన్నీగా కామెంట్లు పెడుతున్నారు. అంత పక్కాగా.. సినిమా రేంజ్ దొంగతనం చేస్తే అవి డబ్బులో లేక నగలో లేదా ఇంకా ఏమైనా విలువైన వస్తువులో అనుకున్నాం అంటూ పోస్టులు పెడుతున్నారు.

 అయితే దొంగతనం పూర్తి అయిన తర్వాత నిర్మాణంలో ఉన్న ఓ బ్రిడ్జి వద్దకు ఆ ట్రక్కు చేరగానే.. కాస్త నెమ్మదిగా వెళ్లడంతో ఆ ట్రక్కులోకి ఎక్కిన ఇద్దరు దొంగల్లో ఒక వ్యక్తి కిందికి దిగేశాడు. మరో వ్యక్తి మాత్రం ఆ ట్రక్కులోనే ఉన్నట్లు వీడియోలో కనిపిస్తోంది. అయితే ఆ బ్రిడ్జి నిర్మాణం వద్ద పోలీసులు ఉన్నారు. అయితే ఈ దొంగతనం మీద కేసు నమోదు అయిందా లేదా అనేది మాత్రం తెలియ రాలేదు. అంతే కాకుండా ఈ చోరీ ఎప్పుడు జరిగింది అనేది కూడా స్పష్టత లేదు. కానీ ఈ వీడియో మాత్రం ప్రస్తుతం తెగ వైరల్ గా మారింది.