మా కుక్క తప్పిపోయింది.. ఆచూకీ తెలిపితే బంపరాఫర్

సాధారణంగా ఇంట్లో పిల్లలు తప్పిపోతేనో.. లేదా ఎవరైనా కనిపించకుండా పోతేనో.. ప్రకటనలు ఇస్తుంటాం. పోలీస్ స్టేషన్‌కు వెళ్లి ఫిర్యాదు చేయటంతో పాటు అక్కడక్కడా వాల్ పోస్టర్లు అతికిస్తూ ఉంటాం. తమవారు కనిపించడం లేదని, ఆచూకీ తెలిపినవారికి పారితోషకం ఇస్తామంటూ అందులో ప్రకటిస్తూ ఉంటారు. అయితే నర్సరావుపేటలో మాత్రం భిన్నమైన ఘటన జరిగింది. తమ కుక్క కనిపించడం లేదంటూ ఓ వ్యక్తి పోస్టర్లు వేశాడు. అంతటితో ఊరుకోలేదు. తమ ముద్దుల శునకం ఆచూకీ తెలిపితే పారితోషకం కూడా ఇస్తామంటూ ఫ్లెక్సీలు కట్టించాడు. ఈ ఫోటో ఇప్పుడు సోషల్ మీడియాలో వైరల్ అవుతోంది. ఇక ఆ కుక్క కోసం ఆ కుటుంబం మొత్తం తిండీనీళ్లూ మాని వెతుకున్నారట.

అసలు సంగతిలోకి వస్తే.. నరసరావుపేట పట్టణంలోని శివారు ప్రాంతమైన తాళ్ళూరినగర్‌లో బొంతా స్వర్ణరాజు అలియాస్ బంగారు బాబు అనే ఆయన తన ఇంట్లో కుక్కను పెంచుకుంటున్నాడు. గోల్డెన్ రిట్రీవర్ జాతికి చెందిన కుక్కను య్యాచీ అనే ముద్దుపేరు పెట్టుకుని అల్లారు ముద్దుగా పెంచుతూ వస్తున్నారు. అయితే కొన్నిరోజుల కిందట ఆ కుక్క కనిపించకుండా పోయింది. దీంతో కంగారు పడిపోయిన స్వర్ణ రాజు కుటుంబం చుట్టుపక్కల మొత్తం విచారించింది. కనిపించిన వారందరినీ అడిగింది. తమ ఇంటి చుట్టుపక్కల ప్రాంతాన్ని మొత్తం జల్లెడ పట్టింది. అయినా ఉపయోగం లేకుండా పోయింది. పాపం ఆ య్యాచీ వారికి కనిపించలేదు.

ఇంట్లో సభ్యుడిగా కలిసిపోయిన య్యాచీ కనిపించకుండా పోవటంతో ఆ కుటుంబం తట్టుకోలేకపోయింది. దిగులులో తిండీనీళ్లూ కూడా మానేసి రాత్రివేళల్లో కూడా బంగారు బాబు కుటుంబసభ్యులు ఆ చుట్టుపక్కల ప్రాంతాల్లో గాలిస్తున్నారు. కనిపించిన ప్రతి ఒక్కరికి కుక్క ఫొటో చూపించి విచారిస్తున్నారు. అలాగే పట్టణంలో ఫ్లెక్సీలు వేయించి కుక్క కోసం గాలిస్తున్నారు. సోషల్ మీడియాలో ప్రకటనలతో పాటు కూడళ్ల వద్ద పోస్టర్లు వేసి కనిపించకుండా పోయిన య్యాచీ కోసం వెతుకులాట సాగిస్తున్నారు. అయితే ఈ ఫోటో, ఫ్లెక్సీలు చూసిన స్థానికులు కుక్కపై వీరికి ఎంత ప్రేమో అంటూ ఆశ్చర్యం వ్యక్తం చేస్తున్నారు పెంపుడు జంతువు పై ఆ కుటుంబ సభ్యుల మమకారాన్ని చూసి హర్షం వ్యక్తం చేస్తున్నారు..