ఏపీలోని రైతులకు గుడ్ న్యూస్.. ఆ రోజే అకౌంట్లోకి డబ్బులు.. ఏకంగా 64.37 లక్షల మందికి లబ్ధి

ఏపీలోని రైతులకు జగన్ సర్కారు గుడ్ న్యూస్ చెప్పింది. 2023-24 సీజన్‌కు సంబంధించి వైఎస్ఆర్ రైతు భరోసా మూడో విడత నిధులను ఎప్పుడు విడుదల చేసేదీ ప్రకటించింది. వైఎస్ఆర్ రైతు భరోసా మూడో విడత పెట్టుబడి సాయంతో పాటు సున్నా వడ్డీ రాయితీ సొమ్మును సీఎం వైఎస్ జగన్ ఫిబ్రవరి 28వ తేదీన రైతుల అకౌంట్లో జమ చేయనున్నారు. ఈ మేరకు రైతుభరోసా పెట్టుబడి సాయం కింద అర్హులైన రైతులకు రెండు వేల చొప్పున అకౌంట్లోకి జమచేస్తారు. మొత్తంగా రైతు భరోసా, సున్నా వడ్డీ రాయితీ కింద అర్హులైన 64.37 లక్షల రైతు కుటుంబాలకు రూ.1,294.34 కోట్ల సాయం అందించనున్నారు.

రైతు భరోసా మూడో విడత పెట్టుబడి సాయం కింద 53.58 లక్షల మంది రైతులకు ఒక్కొక్కరికి రెండు వేల రూపాయల చొప్పున రూ.1,078.36 కోట్లు జమ చేయనున్నారు. అలాగే 2021-22 రబీ సీజన్, 2022 ఖరీఫ్ సీజన్‌కు సంబంధించి 10.79 లక్షల మంది రైతులకు సున్నా వడ్డీ రాయితీ కింద రూ.215.98 కోట్లు జమ చేస్తారు.తాడేపల్లిలోని క్యాంప్‌ కార్యాలయంలో సీఎం వైఎస్‌ జగన్‌మోహన్‌రెడ్డి బటన్‌ నొక్కి ఈ సొమ్మును రైతు ఖాతాల్లో జమ చేయనున్నారు.

పీఎం కిసాన్, రైతు భరోసా పథకం కింద కేంద్రం అందించే ఆరువేల రూపాయలతో కలిపి ఏటా 13వేల 500 రూపాయలను ఏపీ ప్రభుత్వం రైతుల ఖాతాల్లో జమ చేస్తోంది. అర్హులైన రైతులకు మూడు విడతల్లో ఈ సాయం అందిస్తున్నారు. ఈ పథకం ద్వారా 2023–24 సంవత్సరం తొలి విడతలో 52,57,263 రైతు కుటుంబాలకు రూ.3,942.95 కోట్ల సాయం అందించారు. ఇక రెండో విడతలో 53,52,905 కుటుంబాలకు రూ.2,204.77 కోట్లు సాయం అందించారు. మూడో విడతలో భాగంగా ఫిబ్రవరి 28న 53,58,368 రైతు కుటుంబాలకు రూ.1,078.36 కోట్లు జమచేయనున్నారు.