ప్రధాని మోదీ విశాఖ పర్యటన రద్దు.. కాారణం ఏంటి

ప్రధానమంత్రి నరేంద్ర మోదీ విశాఖ పర్యటన రద్దయినట్టు సమాచారం అందింది. హిందుస్థాన్‌ పెట్రోలియం కార్పొరేషన్‌ లిమిటెడ్‌ (హెచ్‌పీసీఎల్‌) ఆధునికీకరణ ప్రాజెక్టును ప్రారంభించేందుకు మార్చి 1న ప్రధాని విశాఖ రావాల్సి ఉంది. ఇందుకు సంబంధించి ఆంధ్రా యూనివర్సిటీ ఇంజినీరింగ్ కాలేజీ మైదానంలో బహిరంగ సభ నిర్వహణకు అవసరమైన ఏర్పాట్లను జిల్లా యంత్రాంగం ప్రారంభించింది. అయితే, ప్రధాని పర్యటన రద్దయిందన్న సమాచారంతో ఆ పనులను తాత్కాలికంగా నిలిపివేశారు. కానీ, మోదీ పర్యటన రద్దుపై అధికారికంగా ఎటువంటి ఉత్తర్వులు రాలేదని అధికారులు చెబుతున్నారు. మొత్తం రూ.26 వేల కోట్ల ఖర్చుతో హిందుస్థాన్‌ పెట్రోలియం కార్పొరేషన్‌ లిమిటెడ్‌ రిఫైనరీని నవీకరించారు.

మరోవైపు, ప్రధాని నరేంద్ర మోదీ కాకినాడలో నిర్మించిన 100 పడకల ఈఎస్ఐ ఆస్పత్రిని ప్రధాని మోదీ ఆదివారం వర్చువల్‌గా ప్రారంభించి, జాతికి అంకితం చేయనున్నారు. మొత్తం 117 కోట్ల రూపాయల వ్యయంతో కాకినాడలోని సాంబమూర్తి నగర్‌లో ఆసుపత్రి నిర్మాణం చేపట్టారు. జిప్‌మర్‌కు అనుబంధంగా ఈ ఆస్పత్రిని కేంద్రం చేపట్టింది. భారత ప్రభుత్వ గృహ నిర్మాణ అర్బన్ డెవలప్‌మెంట్ మంత్రిత్వశాఖ పర్యవేక్షణలో జై ప్రకాష్ సంస్థ 7.26 ఎకరాల విస్తీర్ణంలో నాలుగేళ్ల కిందట నిర్మాణ పనులు ప్రారంభించింది. ఆస్పత్రితో పాటు సిబ్బంది క్వార్టర్స్, 90 కిలో లీటర్ల సమర్థ్యంతో వ్యర్ధజలాల శుద్ధి కేంద్రం, విద్యుత్ సబ్ స్టేషన్, సోలార్ వాటర్ హీటింగ్ సిస్టం వంటివి ఏర్పాటుచేశారు.

ఈ ఆసుపత్రి ప్రారంభోత్సవంతో కాకినాడ, తుని, యానాం తదితర ప్రాంతాలకు చెందిన లక్ష మంది బీమా కార్మికులకు ముల్టీ స్పెషాలిటీ వైద్య సేవలు అందుబాటులోకి వస్తాయి. కాగా, విశాఖపట్నంలో ఏర్పాటు చేసిన మైక్రోబయాలజీ ల్యాబ్‌ను ప్రధాని మోదీ సోమవారం వర్చువల్‌గా ప్రారంభించనున్నారు. గతంలో ప్రాంతీయ ఫుడ్‌ ల్యాబొరేటరీగా ఉన్న దీనిని రూ.4.5 కోట్ల నిధులు కేటాయించి రాష్ట్ర స్థాయికి హోదాకు పెంచింది. అత్యాధునిక పరికరాల కోసం అదనంగా రూ.14 కోట్లను కేటాయించి.. ఇప్పటికే రూ.8 కోట్ల నిధులను మంజూరు చేసింది.

పూర్తిస్థాయిలో పరికరాలు, యంత్రాలు సమకూరితే ఏడాదికి సుమారు 20 వేల ఆహారం, నీటి నమూనాలను పరీక్షించేందుకు అవకాశం ఉంటుంది. దీంతో పాటు ప్రభుత్వానికి అదనంగా ఆదాయమూ వస్తుంది. మంగళగిరిలో ఎయిమ్స్‌ను మోదీ ప్రారంభిస్తారు. గుంటూరు ప్రభుత్వ వైద్య కళాశాల ప్రాంగణంలో, తిరుపతిలోని టీటీడీ భవనంలోనూ రాష్ట్ర స్థాయి ల్యాబ్‌ల ఏర్పాటుకు రూ.18 కోట్ల చొప్పున విడుదలకు కేంద్రం ఆమోదం తెలిపింది. కేంద్ర, రాష్ట్ర ప్రభుత్వాలు రూ.2.07 కోట్లతో చేపట్టిన నాలుగు ఫుడ్‌ సేఫ్టీ ఆన్‌ వీల్స్‌ ల్యాబ్‌లను కూడా ప్రధాని సోమవారం ప్రారంభించనున్నారు.