రైలు ప్రయాణికులకు శుభవార్త చెప్పిన ఐఆర్‌సీటీసీ.. రైళ్లల్లో ఇక ఆ సేవలు కూడా!

మన దేశంలో నిత్యం రైలు ప్రయాణం చేసే ప్రయాణికులు లక్షల సంఖ్యలో ఉంటారు. సుదూర ప్రాంతాలకు బడ్జెట్లో చేరవేయగల సాధనం రైల్వే మాత్రమే. అందుకే దీనిని మిడిల్ క్లాస్ నేల విమానం అని పిలుస్తుంటారు. అయితే ప్రయాణికులు ఇబ్బంది కలగకుండా ఉండేందుకు ఇండియన్ రైల్వే అనేకచర్యలు తీసుకుంటూ వస్తోంది. టాయిలెట్ల దగ్గర నుంచి భోజనం వరకూ అన్నింటిలోనూ మెరుగైన సేవలు అందించేందుకు ఎప్పటికప్పుడు చర్యలు తీసుకుంటూ వస్తోంది. తాజాగా రైల్వే ప్రయాణికులకు రైల్వే శాఖ నుంచి శుభవార్త అందింది. దేశంలోనే అతిపెద్ద ఫుడ్ డెలివరీ ప్లాట్ ఫామ్ అయిన స్విగ్గీ.. ఐఆర్‌సీటీసీ‌తో ఒప్పందం కుదుర్చుకుంది.

రైలు ప్రయాణికులు ఆర్డర్ చేసిన భోజనాన్ని వారికి అందించేందుకు స్విగ్గీ, ఐఆర్‌సీటీసీ మధ్య ఒప్పందం చేసుకుంది. ఒప్పందంలో భాగంగా తొలుత దేశంలోని నాలుగు ప్రధాన రైల్వే్ స్టేషన్‌లలో ఈ సర్వీసులను అందుబాటులోకి తేనున్నారు. విజయవాడ, విశాఖఫట్నం, బెంగళూరు, భువనేశ్వర్‌లో ఐఆర్‌సీటీసీ కస్టమర్లకు స్విగ్గీ ఈ సేవలు అందించనుంది. ఐఆర్‌సీటీసీ ఈ క్యాటరింగ్ పోర్టల్ ద్వారా ముందుగా ఆర్డర్ బుక్ చేసుకున్నవారికి స్విగ్గీ డెలివరీ బాయ్‌లు ఈ ఆహారాన్ని అందజేస్తారు. బండ్ల్ టెక్నాలజీస్ ప్రైవేట్ లిమిటెడ్ ద్వారా ఈ క్యాటరింగ్ సర్వీస్ అందుబాటులోకి రానుంది. తొలి విడతలో నాలుగు స్టేషన్‌లలో ఈ సర్వీస్ అందుబాటులోకి రానుంది. ఆ తర్వాత మిగతా స్టేషన్‌లకు విస్తరించనున్నారు.

ఈ ఒప్పందం ద్వారా రుచికరమైన, ఆరోగ్యవంతమైన ఆహారం అందించడం ద్వారా ప్రయాణికుల జర్నీని మరింత సౌకర్యవంతం చేయవచ్చని స్విగ్గీ అభిప్రాయపడింది. అయితే ఫుడ్ డెలివరీ ప్లాట్‌ఫామ్‌లతో ఐఆర్‌సీటీసీ ఒప్పందం చేసుకోవడం ఇదే తొలిసారి కాదు. గతంలో జొమాటోతో ఒప్పందం చేసుకుంది. ఢిల్లీ, ప్రయాగ్‌రాజ్, కాన్పూర్, లక్నో , వారణాసితో సహా పలు రైల్వే స్టేషన్‌లలో ఆహారం అందించేందుకు జొమాటోతో ఒప్పందం చేసుకుంది. తాజాగా స్విగ్గీతో ఈ రకమైన ఒప్పందం చేసుకుంది..