ఆందోళనల్లో ఆస్తులు ధ్వంసం చేస్తే నిందితుల నుంచే రికవరీ.. కొత్త బిల్లును తీసుకువచ్చిన ప్రభుత్వం

శాంతియుతంగా నిరసనలు, ఆందోళనలు చేసేందుకు మన దేశంలో ప్రతీ పౌరుడికి హక్కు ఉంటుంది. అయితే కొన్ని నిరసనలు, ఆందోళనల్లో పాల్గొన్నవారు.. హద్దు మీరి హింసాత్మక ఘటనలు, ఆస్తుల ధ్వంసానికి దిగుతూ ఉంటారు. ఈ క్రమంలోనే ప్రభుత్వానికి, ప్రైవేటు ఆస్తులకు తీవ్ర నష్టం వాటిల్లుతుంది. ఇలాంటి ఘటనలు పెరుగుతుండటంతో ఉత్తరాఖండ్ ప్రభుత్వం కీలక నిర్ణయం తీసుకుంది. ఇలా ఆస్తులు ధ్వంసం చేస్తే.. నిరసనకారుల నుంచే ఆ నష్టాన్ని వసూలు చేయాలని నిర్ణయించింది. ఇందుకోసం ఏకంగా చట్టాన్నే తీసుకువచ్చేందుకు సిద్ధం అయింది. ఇప్పటికే ఈ బిల్లును తయారు చేయగా.. సోమవారం నుంచి జరగనున్న ఉత్తరాఖండ్ బడ్జెట్ సమావేశాల సందర్భంగా సభలో ప్రవేశపెట్టనున్నట్లు ఉత్తరాఖండ్ ప్రభుత్వ వర్గాలు పేర్కొన్నాయి.

నిరసనల పేరుతో ఆందోళనకారులు ప్రభుత్వ, ప్రైవేట్ ఆస్తులను ధ్వంసం చేయడం రోజురోజుకూ పెరుగుతుండటంతో ఉత్తరాఖండ్‌లో బీజేపీ నేతృ‌త్వంలోని పుష్కర్ సింగ్ ధామి సర్కార్ ఈ నిర్ణయం తీసుకుంది. ఉత్తరాఖండ్ పబ్లిక్ అండ్ ప్రైవేట్ ప్రాపర్టీ డ్యామేజ్ రికవరీ బిల్‌ను సోమవారం బడ్జెట్ సెషన్‌లో ప్రవేశపెట్టనుంది. ఈ బిల్లు ప్రకారం.. నిరసన, సమ్మెల సమయంలో ప్రభుత్వం, ప్రైవేటు ఆస్తులకు జరిగిన నష్టాన్ని అందులో ఉన్న నిందితుల నుంచి వసూలు చేయనున్నారు. ఆ నష్టాన్ని అంచనా వేసేందుకు.. దాన్ని వసూలు చేసేందుకు రిటైర్డ్ జిల్లా జడ్జి అధ్యక్షతన ట్రిబ్యునల్ ఏర్పాటు చేయనున్నారు. ఇప్పటికే మరో బీజేపీ పాలిత రాష్ట్రమైన ఉత్తర్‌ప్రదేశ్ ఈ బిల్లును 2020 లోనే ఆమోదించింది.

ఇక కొన్ని రోజుల క్రితమే యూనిఫామ్ సివిల్ కోడ్ బిల్లును తీసుకువచ్చి ఉత్తరాఖండ్ ప్రభుత్వం సంచలనం రేపింది. మతాలతో సంబంధం లేకుండా అన్ని వర్గాలకు ఒకే చట్టాలను అమలు చేయాలనే లక్ష్యంతో పుష్కర్ సింగ్ ధామీ ప్రభుత్వం యూసీసీ బిల్లును తీసుకువచ్చింది. ఫిబ్రవరి 7 వ తేదీన ముఖ్యమంత్రి పుష్కర్ సింగ్ ధామి మాట్లాడుతూ శాసనసభలో యూనిఫాం సివిల్ కోడ్ బిల్లు ఆమోదం పొందడం ఉత్తరాఖండ్ చరిత్రలో చారిత్రాత్మక రోజుగా అభివర్ణించారు.