మాజీ సీఎం కేసీఆర్ గురించి టీడీపీ నేత బుద్ధా వెంకన్న కీలక వ్యాఖ్యలు

టీడీపీ సీనియర్ లీడర్, మాజీ ఎమ్మెల్సీ బుద్ధా వెంకన్న తెలంగాణ మాజీ సీఎం కేసీఆర్ గురించి కీలక వ్యాఖ్యలు చేశారు. ఇటీవలే టీడీపీ నుంచి వైసీపీలోకి వెళ్లిన విజయవాడ ఎంపీ కేశినేని నానిని విమర్శిస్తూ... బుద్ధా వెంకన్న కేసీఆర్ గురించి ప్రస్తావన తెచ్చారు. తెలంగాణ తెచ్చిన వీరుడు కేసీఆర్ అని చెప్పిన బుద్ధావెంకన్న.. తెలంగాణ ఇచ్చింది సోనియా గాంధీ అయినా.. తెచ్చిన కేసీఆర్‌కే పేరు వచ్చిందన్నారు. అలాగే విజయవాడ ఫ్లై ఓవర్ విషయంలో తనకు అన్యాయం జరిగిందని కార్యకర్తలతో నిర్వహించిన ఆత్మీయ సమావేశంలో బుద్ధా వెంకన్న అభిప్రాయపడ్డారు. ఫ్లై ఓవర్ కోసం తాను ఉద్యమం చేశానన్న బుద్ధా వెంకన్న.. చంద్రబాబు కట్టారని చెప్పుకొచ్చారు. అయితే తనకు పేరు వస్తుందనే ఉద్దేశంతో కేశినేని నాని తానే తెచ్చానంటూ ప్రచారం చేసుకున్నాడని విమర్శించారు.

తెలంగాణ ఇచ్చింది సోనియా గాంధీ అయినా తెచ్చిన కేసీఆర్‌కు పేరు వచ్చినట్లు.. ఫ్లై ఓవర్ కోసం తాను ఉద్యమం చేస్తే కేశినేని నాని క్రెడిట్ కొట్టేసినట్లు ఆరోపించారు. ఇదే క్రమంలో కేశినేని నాని మీద బుద్ధా వెంకన్న తీవ్ర విమర్శలు చేశారు. కేశినేని నాని ఓ కోవర్టు అంటూ ఫైరయ్యారు.తనను ఇంఛార్జిగా తప్పించడానికి అన్ని ప్రయత్నాలు చేశాడని ఆరోపించారు. రాజీనామా చేస్తానంటూ చంద్రబాబుతో చెప్పి కోఆర్డినేటర్ పదవిని కేశినేని నాని తెచ్చుకున్నాడని మండిపడ్డారు. వైసీపీ నేత వెల్లంపల్లి శ్రీనివాస్‌తో కలిసి కోవర్టుగా కేశినేని నాని పనిచేశారంటూ తీవ్ర వ్యాఖ్యలు చేశారు.

మరోవైపు టీడీపీ తొలి జాబితాలో తన పేరు లేకపోవటంపైనా బుద్ధా వెంకన్న స్పందించారు. టికెట్ కోసం చంద్రబాబును రిక్వెస్ట్ చేస్తామే కానీ.. డిమాండ్ చేయటం సరికాదని బుద్ధా వెంకన్న అభిప్రాయపడ్డారు. తనకు ఎమ్మెల్యే, మంత్రి పదవుల కంటే చంద్రబాబు దగ్గర హనుమంతుడుగా ఉన్న పేరే ఎక్కువని చెప్పుకొచ్చారు. చంద్రబాబు రాముడు అయితే నేను హనుమంతుణ్ని అని.. ఆ పేరును బతికినంతకాలం పోగొట్టుకోనని అన్నారు. టికెట్ ఇస్తే ఒకలా ఇవ్వకపోతే ఒకలా మాట్లాడితే తనకు కొడాలి నాని, కేశినేని నాని, వల్లభనేని వంశీకి తేడా ఏముందని ప్రశ్నించారు. అలాగే తన రక్తంతో చంద్రబాబుకు కాళ్లు కడిగింది ప్రేమతో తప్ప ఆవేదనతో కాదని బుద్ధా వెంకన్న అన్నారు.చంద్రబాబు తమకు దేవుడితో సమానమని.. సీటు ఇవ్వలేదని వ్యతిరేకంగా మాట్లాడే వ్యక్తిని కానని అన్నారు.