అధికార పార్టీకి మరో షాక్.. బీజేపీ మీటింగ్‍లో ప్రత్యక్షమైన వైసీపీ ఎమ్మెల్యే

ఏపీలో రాజకీయ వలసలు కొనసాగుతున్నాయి. ఈ క్రమంలోనే అధికార వైసీపీకి చెందిన మరో ఎమెల్యే పార్టీ మారేందుకు సిద్ధమయ్యారు. ఈ మేరకు ఓ జాతీయ పార్టీ పెద్దలతో భేటీ కావటం ప్రాధాన్యం సంతరించుకుంది. అనంతపురం జిల్లా రాయదుర్గం నియోజకవర్గం సిట్టింగ్ ఎమ్మెల్యే కాపు రామచంద్రారెడ్డి బీజేపీలో చేరతారనే ప్రచారం జరుగుతోంది. 2019 ఎన్నికల్లో వైసీపీ తరఫున రాయదుర్గం నుంచి గెలుపొందారు కాపు రామచంద్రారెడ్డి. అయితే వచ్చే ఎన్నికల్లోనూ ఫ్యాన్ పార్టీ తరుఫున బరిలోకి దిగాలని భావించారు. అయితే సర్వేలలో వ్యతిరేక ఫలితాలు రావటంతో కాపు రామచంద్రారెడ్డికి జగన్ టికెట్ నిరాకరించారు. ఆయన స్థానంలో మెట్టు గోవిందరెడ్డిని రాయదుర్గం వైసీపీ ఇంఛార్జిగా నియమించారు.

దీంతో అధిష్టానం మీద అసంతృప్తిని వ్యక్తం చేస్తూ కాపు రామచంద్రారెడ్డి వైసీపీకీ రాజీనామా చేశారు. ఇదే సమయంలో.. ఏపీ కాంగ్రెస్ చీఫ్‌గా వైఎస్ షర్మిల నియామకం కావటంతో ఆవిడ వెంట కాపు రామచంద్రారెడ్డి నడుస్తారనే ప్రచారం జరిగింది. అయితే ఎవరూ ఊహించని విధంగా కాపు రామచంద్రారెడ్డి బీజేపీవైపు చూస్తున్నట్లు తెలిసింది.ఈ మేరకు విజయవాడలో జరిగిన బీజేపీ లోక్‌సభ కోర్ కమిటీ భేటీలో ఎమ్మెల్యే కాపు రామచంద్రారెడ్డి ప్రత్యక్షమయ్యారు. ఆ కార్యక్రమానికి హాజరైన బీజేపీ అగ్రనేత రాజ్‌నాథ్ సింగ్, ఏపీ బీజేపీ చీఫ్ పురందరేశ్వరిని కలిశారు. దీంతో కాపు రామచంద్రారెడ్డి బీజేపీలో చేరతారనే వార్తలకు మరింత బలం చేకూరింది.

అయితే ఏ పార్టీలో చేరేదీ ఇంకా నిర్ణయించుకోలేదని కాపు రామచంద్రారెడ్డి తెలిపారు. రాజ్‌నాథ్ సింగ్‌ను కలిసేందుకే విజయవాడ వచ్చానన్న కాపు రామచంద్రారెడ్డి .. తనకు సంబంధం లేని సమావేశమని తెలిసి బయటికి వచ్చేశానని చెప్పారు. వైసీపీని తాను పూర్తిగా వదిలేశానన్న ఆయన.. అయితే వచ్చే ఎన్నికల్లో పోటీ చేయడం ఖాయమని స్పష్టం చేశారు. రాజ్‌నాథ్ సింగ్‌ను మర్యాదపూర్వకంగానే కలిశానని.. త్వరలోనే ఏ పార్టీలో చేరేదీ వెల్లడిస్తానని అన్నారు.