పురంధేశ్వరి ఇలా.. రాజ్‌నాథ్ సింగ్ అలా.. ఏపీ బీజేపీకి ఏది నినాదం

ఏపీ బీజేపీ ఎన్నికలకు సిద్ధమవుతోంది. ఒంటరిగా అయినా, పొత్తులతో అయినా... ఎలా వెళ్లిన కూడా ఎన్నికల నాటికి పార్టీ శ్రేణులను సిద్ధం చేసే ఆలోచనతో ముందుకు వెళ్తోంది. ఈ క్రమంలోనే బీజేపీ ఆంధ్రప్రదేశ్ అధ్యక్షురాలు దగ్గుబాటి పురంధేశ్వరి కొత్త నినాదంతో ముందుకు వచ్చారు. ఆంధ్రాలో ఒకసారి.. కేంద్రంలో మరోసారి అంటూ నినాదం ఇచ్చారు పురంధేశ్వరి. ఏపీలో బీజేపీని ఒకసారి గెలిపిస్తే.. డబుల్ ఇంజిన్ సర్కారు ఎలా ఉంటుందో చూపిస్తామని అంటున్నారు. అయితే పురంధేశ్వరి నినాదం ఇలా ఉంటే.. అటు రక్షణ మంత్రి రాజ్‌నాథ్ సింగ్ మాత్రం మరోలా వ్యాఖ్యలు చేశారు.

వైజాగ్ స్టీల్ ప్లాంట్, రైల్వే జోన్‌పైనా ఏపీబీజేపీ చీఫ్ పురంధేశ్వరి కీలక వ్యాఖ్యలు చేశారు. విశాఖ స్టీల్ ప్లాంట్‌ విషయంలో కేంద్రం మరో ఆలోచన చేస్తోందని అన్నారు. స్టీల్ ప్లాంట్ ప్రైవేటీకరణ బదులుగా లాభాల బాటలోకి తెచ్చే ప్రయత్నం చేస్తోందని చెప్పారు. విశాఖ స్టీల్ ప్లాంట్‌కు సంబంధించిన వివరాలను కేంద్ర ఉక్కు శాఖ మంత్రి జ్యోతిరాధిత్య సింథియా ఇప్పటికే తెప్పించుకున్నారని పురంధేశ్వరి చెప్పారు. అలాగే రైల్వే జోన్ విషయంలోనూ కేంద్రం చిత్తశుద్ధితో ఉందని.. రాష్ట్ర ప్రభుత్వమే స్థలం ఇవ్వడం లేదని విమర్శించారు. అందుకే విశాఖ రైల్వే జోన్ ఆలస్యమవుతోందని పురంధేశ్వరి అన్నారు. రైల్వే జోన్‌కు భూములు ఇవ్వాలని రైల్వే మంత్రి అశ్వినీ వైష్ణవ్ స్వయంగా ఏపీ ప్రభుత్వాన్ని కోరారన్న పురంధేశ్వరి.. భూములు ఇవ్వకుండా తమపై నిందలు వేయడం సరికాదన్నారు. ఆంధ్రాలో ఒకసారి.. కేంద్రంలో మరోసారి అనే నినాదంతో ఎన్నికలకు వెళ్తామని పురంధేశ్వరి అన్నారు.

మరోవైపు విశాఖలో క్లస్టర్ ప్రవాస్ యోజనలో భాగంగా జరిగిన మేధావుల సమావేశంలో రాజ్‌నాథ్ సింగ్ పాల్గొన్నారు. ఈ సందర్భంగా మాట్లాడిన రాజ్‌నాథ్ సింగ్.. బీజేపీ మతతత్వ పార్టీ కాదని, నిఖార్సైన సెక్యులర్ పార్టీ అని అన్నారు. ఈ విషయాన్ని ప్రపంచం మొత్తం గుర్తించిందని చెప్పుకొచ్చారు. ఏపీ విషయానికి వస్తే ఆంధ్రాలో తమకు ఓటు బ్యాంకు పెరిగిందన్న రాజ్‌నాథ్ సింగ్.. ఇప్పటికిప్పుడు కాకున్నా ఏదో ఒకరోజు అధికారంలోకి రావటం ఖాయమన్నారు. ప్రధాని మోదీ, కేంద్ర ప్రభుత్వం పథకాల వలన ఏపీలో బీజేపీకి ప్రజాదరణ పెరుగుతుందని రాజ్‌నాథ్ సింగ్ చెప్పారు. బీజేపీని చూసి ఓర్వలేని వారు. బీజేపీని ఉత్తర భారత పార్టీ అని ముద్రవేసే ప్రయత్నం చేస్తున్నారని ఆరోపించారు. ఏపీలో మరో పదేళ్లకయినా బీజేపీ సొంతంగా ప్రభుత్వాన్ని ఏర్పాటు చేస్తుందని ధీమా వ్యక్తం చేశారు.