తగ్గేదే లేదంటున్న గుడివాడ అమర్‌నాథ్, వంగలపూడి అనిత.. ఓ రేంజులో వార్నింగులు

ఏపీలో ఎన్నికలు దగ్గర పడుతున్న నేపథ్యంలో నాయకుల మధ్య మాటలు మంటలు రగులుతున్నాయి. ఈ నేపథ్యంలోనే తనపై విమర్శలు చేసిన మంత్రి గుడివాడ అమర్‌నాథ్‌కు ఏపీ తెలుగు మహిళ అధ్యక్షురాలు వంగలపూడి అనిత స్ట్రాంగ్ కౌంటర్ ఇచ్చారు. పరిగెత్తించి కొడతాం అంటూ అమర్‌నాథ్ చేసిన వ్యాఖ్యలకు తన జోలికొస్తే గుడ్డు పగులుద్ది అంటూ వార్నింగ్ ఇచ్చారు వంగలపూడి అనిత. అంతేకాదు లైవ్‌లో గుడ్డు పగలగొట్టి మరీ హెచ్చరించారు. వీరిద్దరి మధ్య ఇంతలా మాటలయుద్ధం జరగడం వెనుక వేరే కారణం ఉంది.

సోమవారం అనకాపల్లి జిల్లా పాయకరావుపేట నియోజకవర్గ పరిధిలో జరిగిన సిద్ధం సభలో మంత్రి గుడివాడ అమర్‌నాథ్.. స్థానిక టీడీపీ అభ్యర్థి వంగలపూడి అనితపై ఘాటు విమర్శలు చేశారు. సీఎం జగన్ గురించి. భారతి గురించి అనిత ఇష్టానుసారం మాట్లాడుతోందని.. ఇంకోసారి వారి గురించి అనుచిత వ్యాఖ్యలు చేస్తే పరిగెత్తించి కొడతామంటూ వార్నింగ్ ఇచ్చారు, మీరు మీ నాయకులు పుస్తకంలో రాసుకోవాలేమో కానీ.. మా నాయకులకు, కార్యకర్తలకు పుస్తకాలు అవసరం లేదంటూ నారా లోకేష్ రెడ్ బుక్ మీద పరోక్షంగా వ్యాఖ్యలు చేశారు. అలాగే అనిత గురించి మాట్లాడితే ఆవిడ స్థాయి పెరుగుతుందంటూ ఘాటు వ్యాఖ్యలు చేశారు.

ఈ నేపథ్యంలో శుక్రవారం విలేకర్ల సమావేశం నిర్వహించిన వంగలపూడి అనిత.. గుడివాడ అమర్‌నాథ్ మీద ఓ రేంజులో ఫైరయ్యారు. అన్యాయాలు, అబద్ధాలు, మోసాలకు కేరాఫ్ అడ్రస్ వైసీపీ పార్టీ అంటూ విమర్శించిన అనిత.. దండుపాలె బ్యాచ్ తో జగన్ సభలు నిర్వహిస్తున్నారని విమర్శింంచారు. ఏపీలో చేతకాని, చేవలేని మంత్రి ఎవరంటే టక్కున కోడిగుడ్డు మంత్రని చెపుతారన్న అనిత.. టికెట్ పీకేసిన గుడివాడ అమర్‌నాథ్ తన నియోజకవర్గానికి వచ్చి ఇష్టానుసారం మాట్లాడుతున్నారని సెటైర్ వేశారు. తాను టీడీపీ మహిళా అధ్యక్షురాలిగా పనిచేస్తూ.. పాయకరావుపేటలో పోటీచేస్తున్నానని.. అమర్‌నాథ్‌కే ఎక్కడ పోటీచేస్తానో తెలియడం లేదని సెటైర్ వేశారు. ఇక ఆయనకు, తనకూ పోలికేంటని ప్రశ్నించారు.

అమర్‌నాథ్‌ను పరిగెత్తించి కొట్టేందుకు జనసైనికులు, టీడీపీ కార్యకర్తలు రెడీ ఉన్నారంటూ వంగలపూడి అనిత హెచ్చరించారు. ఫోటోలకు ఫోజులు తప్ప.. నువ్వు తెచ్చిన కంపెనీ పేరు చెప్పగలవా అంటూ ప్రశ్నించారు. నియోజకవర్గం వచ్చామా.. వెళ్ళామా.. అన్నుట్టుండాలి. అంతేగాని ఇష్టానుసారంగా మాట్లాడితే గుడ్డు పగులుద్ధి అంటూ లైవ్ లో గుడ్డు పగులకొట్టి మరీ వార్నింగ్ ఇచ్చారు.