టీడీపీలో చేరిన మంత్రి గుమ్మనూరు జయరాం.. ఆ మరుక్షణమే షాక్

ఏపీ మంత్రి గుమ్మనూరు జయరాం టీడీపీ గూటికి చేరారు. గత కొంతకాలంగా వైసీపీ అధిష్టానం మీద తీవ్ర అసంతృప్తితో ఉన్న ఆయన.. వైసీపీకి రాజీనామా చేసి టీడీపీలో చేరిపోయారు. మంత్రి, ఎమ్మెల్యే పదవులతో పాటు వైసీపీ ప్రాథమిక సభ్యత్వానికి రాజీనామా చేసిన గుమ్మనూరు జయరాం.. మంగళగిరిలో టీడీపీ నిర్వహించిన జయహో బీసీ సభ సందర్భంగా చంద్రబాబు సమక్షంలో తెలుగుదేశం పార్టీలో చేరిపోయారు. ఈ సందర్భంగా టీడీపీతోనే బీసీలకు న్యాయం చేకూరుతుందని, అందుకే పార్టీలో చేరానని జయరాం చెప్పుకొచ్చారు. మరోవైపు టీడీపీలో చేరిన కొద్దిసేపటికే వైసీపీ అధిష్టానం జయరాంకు షాక్ ఇచ్చింది. గుమ్మనూరి జయరాంను మంత్రివర్గం నుంచి బర్తరఫ్ చేసింది.

పార్టీ ఫిరాయించిన గుమ్మనూరి జయరాంను సీఎం జగన్ మంత్రివర్గం నుంచి బర్తరఫ్ చేశారు. అనంతరం గవర్నర్‌కు సిఫార్సును పంపగా.. ఆయన ఆమోదం తెలిపారు. దీంతో పార్టీ మారిన కొద్ది గంటల్లోనే గుమ్మనూరి జయరాం మంత్రిపదవికి కోల్పోయారు. అయితే టీడీపీలో చేరిన జయరాం.. అనంతపురం జిల్లా గుంతకల్లు నుంచి పోటీ చేస్తానని ప్రకటించారు. దీంతో గుంతకల్లు టీడీపీ తమ్ముళ్లు భగ్గుమంటున్నారు. జయరాం చేరికను మాజీ ఎమ్మెల్యే జితేంద్ర గౌడ్‌ తీవ్రంగా వ్యతిరేకిస్తున్నారు. గుంతకల్లు టీడీపీ కార్యాలయం ఎదుట ఆందోళనకు దిగారు. గుమ్మనూరు జయరాం అవినీతిపరుడంటూ పెద్దఎత్తున నినాదాలు చేశారు.

2019 ఎన్నికల్లో కర్నూలు జిల్లాలోని ఆలూరు నియోజకవర్గం నుంచి గుమ్మనూరు జయరాం వైసీపీ తరుపున ఎమ్మెల్యేగా గెలుపొందారు. అనంతరం జగన్ మంత్రివర్గంలో చేరారు. వచ్చే ఎన్నికల్లోనూ ఆయన అదే స్థానం నుంచి బరిలోకి దిగాలని భావించారు. అయితే సర్వేల ఆధారంగా గుమ్మనూరు జయరాంను పార్లమెంట్‌కు పంపాలని జగన్ నిర్ణయించారు. ఈ నేపథ్యంలో కర్నూలు పార్లమెంట్ నియోజకవర్గం ఇంఛార్జిగా ఆయనను నియమించారు. దీనిపై అసంతృప్తితో ఉన్న గుమ్మనూరు జయరాం అప్పటి నుంచి వైసీపీకి దూరంగా ఉంటూ వస్తున్నారు .

ఈ క్రమంలోనే టీడీపీలో చేరాలని నిర్ణయించుకున్న జయరాం.. తొలుత తన సోదరులను టీడీపీలోకి పంపారు. అనంతరం గుంతకల్లు ఎమ్మెల్యే సీటు హామీతోనే పార్టీలో చేరినట్లు తెలుస్తోంది. బలమైన సామాజిక వర్గం నేత కావటం, ఆర్థికంగా బలంగా ఉండటంతో టీడీపీ కూడా జయరాంను తమ పార్టీలో చేర్చుకుంది. అయితే ఇప్పటికే అక్కడ ఉన్న జితేందర్ గౌడ్ వర్గం గుమ్మనూరు రాకను తీవ్రంగా వ్యతిరేకిస్తోంది. అవినీతి పరుడైన గుమ్మనూరును పార్టీలోకి చేర్చుకోవద్దంటూ ఆందోళనలు చేస్తోంది. ఈ క్రమంలో గుమ్మనూరు టీడీపీ చేరటంతో.. జితేంద్రగౌడ్ వర్గం నెక్ట్స్ స్టెప్ ఏంటనేది ఆసక్తికరంగా మారింది.