ఏపీలో ప్రభుత్వ ఉద్యోగులకు గుడ్‌న్యూస్.. ఇకపై రెండేళ్లు కాదు, ఏడాది మాత్రమే

ఏపీలో ప్రభుత్వ ఉద్యోగుల సస్పెన్షన్‌ గరిష్ఠ పరిమితిని రెండేళ్ల నుంచి ఒక ఏడాదికి తగ్గిస్తూ ప్రభుత్వం ఉత్తర్వులు జారీ చేసింది. ఏసీబీ, ఇతర విభాగాల విచారణ సస్పెన్షన్‌ కేసులపై 4 నెలలకు ఒకసారి సమీక్ష చేయాలని పేర్కొంది. ప్రస్తుతం ఇది ఆరు నెలలకోసారి సమీక్ష చేయాలని ఉంది. అన్ని విభాగాలు, కలెక్టర్లు ఈ ఉత్తర్వుల అమలుకు చర్యలు తీసుకోవాలని ఆదేశించింది. ఈ నిర్ణయం ప్రభుత్వ ఉద్యోగులకు భారీ ఊరట అని చెప్పొచ్చు.. అలాగే కేసులపై సమీక్ష అంశం కూడా మరో రిలీఫ్ అంటున్నారు.

తమ సమస్యలను పరిష్కరించాలని జాతీయ గ్రామీణ ఉపాధి హామీ పథకం (నరేగా) సిబ్బంది తమ అధికారులకు వినతి పత్రాలు అందజేశారు. వివిధ జిల్లాలనుంచి వచ్చిన వీరు మొదట తాడేపల్లిలోని పంచాయతీరాజ్‌, గ్రామీణాభివృద్ధి శాఖ కమిషనర్‌, ఆ తరువాత సచివాలయంలోని ప్రత్యేక ప్రధాన కార్యదర్శిని వేర్వేరుగా కలిసి విన్నపాలను అందజేశారు. వివిధ క్యాడర్లలో పని చేస్తున్న సిబ్బందికి గ్రేడ్లు నిర్ణయించి పీఆర్‌సీ అమలుచేయాలని డిమాండ్‌ చేశారు. మూడేళ్ల సర్వీసు పూర్తి చేసిన టెక్నికల్‌ అసిస్టెంట్లు, కంప్యూటర్‌ ఆపరేటర్లను ఫిక్స్‌డ్‌ టెన్యూర్‌ ఉద్యోగులుగా పరిగణించాలని కోరారు. వినతులపై అధికారులు సానుకూలంగా స్పందించారని వారు తెలిపారు.

సీఎస్‌కు రెవెన్యూ అసోసియేషన్‌ ధన్యవాదాలు

ఏటా జూన్‌ 20న ‘రెవెన్యూ డే’గా పాటించాలని ప్రభుత్వం ఉత్తర్వులు జారీ చేయడంపై సీఎస్‌ జవహర్‌రెడ్డికి రాష్ట్ర రెవెన్యూ సర్వీసెస్‌ అసోసియేషన్‌ కృతజ్ఞతలు తెలిపింది. 1786 జూన్‌ 20న రెవెన్యూ శాఖ ఆవిర్భవించిందని.. అదే రోజున ‘రెవెన్యూ డే’గా గుర్తించాలని గతేడాది అక్టోబరులో చేసిన విజ్ఞప్తికి ప్రభుత్వం సానుకూలంగా స్పందించి ఉత్తర్వులు జారీ చేసింది అన్నారు. ఈ మేరకు అసోసియేషన్‌ అధ్యక్షుడు బొప్పరాజు ఇతర నేతలు సీఎస్‌ జవహర్‌రెడ్డిని సచివాలయంలో కలిసి ధన్యవాదాలు తెలిపారు.

ఈ ఏట 14 మంది ఐఏఎస్‌లు, ఆరుగురు ఐపీఎస్‌ల పదవీ విరమణ

ఏపీ క్యాడర్‌కు చెందిన 14 మంది ఐఏఎస్‌లు, ఆరుగురు ఐపీఎస్‌ అధికారులు ఈ ఏడాది పదవీ విరమణ చేయనున్నారు. ప్రభుత్వ ప్రధాన కార్యదర్శి కె.ఎస్‌.జవహర్‌రెడ్డి, ముఖ్యమంత్రి కార్యాలయ ప్రత్యేక ప్రధాన కార్యదర్శి పూనం మాలకొండయ్య, సీఎంవో కార్యదర్శి కె.ధనుంజయరెడ్డి, గనుల శాఖ ప్రత్యేక ప్రధాన కార్యదర్శి గోపాలకృష్ణ ద్వివేది సహా పలువురు ఐఏఎస్‌ అధికారులు ఈ జాబితాలో ఉన్నారు. సీనియర్ ఐపీఎస్ ఏబీ వెంకటేశ్వరరావు, ఏపీ రోడ్డు సేఫ్టీ అథారిటీ ఛైర్మన్‌ అంజనాసిన్హా తదితర ఐపీఎస్‌ అధికారులు ఈ ఏడాది పదవీ విరమణ చేయనున్నారు.