ఏపీ రాజకీయాల్లో అనూహ్య పరిణామం.. ఒక్కటైన రాజకీయ ప్రత్యర్థులు, ఆ ఇద్దరు నేతలు చేతులు కలిపారు

రాజకీయాల్లో శాశ్వత మిత్రులు, శాశ్వత శత్రువులు ఉండరని చెబుతుంటారు. అవును ఒక్కో సందర్భంలో పరిస్థితుల్నిబట్టి ఎంత ప్రత్యర్థులైనా.. చేతులు కలపాల్సిందే. తాజాగా అనకాపల్లిలో అదే జరిగింది.. ఎప్పటి నుంచో రాజకీయ ప్రత్యర్థులుగా ఉన్న ఇద్దరు నేతలు చేతులు కలిపారు. పంతాలు పక్కన పెట్టి పార్టీల గెలుపు కోసం ఒక్కటయ్యారు. మాజీ మంత్రి దాడి వీరభద్రరావును అనకాపల్లి తెలుగుదేశం జనసేన పార్టీల ఉమ్మడి అభ్యర్థి కొణతాల రామకృష్ణ మర్యాదపూర్వకంగా కలిశారు. ఇద్దరు నేతల కలయికతో అనకాపల్లి తెలుగుదేశం జనసేన కార్యకర్తలు ఆనంద ఉత్సవాలతో సంబరాలు చేసుకున్నారు.

ఇద్దరు నేతలు అనకాపల్లి అభివృద్ధికి నాంది పలుకుతామన్నారు. రాష్ట్రంలో ఇప్పుడున్న అరాచక ప్రభుత్వాన్ని గద్దె దించే వరకు కష్టపడి పనిచేయాలని కార్యకర్తలకు హితువు పలికారు. రాష్ట్రంలో చంద్రబాబు పవన్ కళ్యాణ్ కలిసి ప్రభుత్వాన్ని ఏర్పాటు చేసే విధంగా ప్రతి ఒక్కరు కష్టపడాలని సూచన చేశారు. ఈ ఎన్నికలకు ప్రతి ఒక్కరూ కలిసి పనిచేయాలని దాడి వీరభద్రరావు కోరారు. తనకు కొణతాలతో వ్యక్తిగతంగా ఎలాంటి విభేదాలు లేవని.. అవి రాజకీయంగా మాత్రమే అన్నారు. వైఎస్సార్‌సీపీ అనకాపల్లిలో అభ్యర్థి లేనట్లు అమెరికా నుంచి తీసుకొచ్చారని ఎద్దేవా చేశారు.

దాడి వీరభద్రరావు గతంలో టీడీపీలో ఉండగా.. కొణతాల రామకృష్ణ కాంగ్రెస్‌లో ఉన్నారు. దీంతో ఇద్దరు నేతలు ప్రత్యర్థులుగా మారారు. అలాగే ఇద్దరు నేతలు వైఎస్సార్‌సీపీలో కూడా పనిచేశారు.. కానీ విభేదాలు అలాగే కొనసాగాయి. 2014 ఎన్నికల్లో దాడి వీరభద్రరావు కుమారుడు రత్నాకర్ విశాఖ పశ్చిమ నుంచి పోటీ చేస్తే.. కొణాతాల సోదరుడు రఘునాథ్ అనకాపల్లి నుంచి పోటీ చేశారు. ఇటీవల వీరభద్రరావు టీడీపీలో చేరగా.. కొణతాల రామకృష్ణ జనసేన పార్టీలో చేరారు.