శ్రీశైలం నడిచి వెళ్లే భక్తులకు యువకుల పాదసేవ.. వారి కాళ్లకు మసాజ్
Andhra Pradesh Telugu | Suryaa Desk | Published : Fri, Mar 08, 2024, 07:49 PM
శ్రీశైలం పుణ్యక్షేత్రానికి పాదయాత్రగా తరలివచ్చే భక్తులకు పాద సేవ చేస్తున్నారు కొందరు యువకులు. నల్లమల కొండల్లోని శ్రీగిరికి వెళ్లే దారుల్లో అడుగడుగునా సేవా కార్యక్రమాలు చేపడుతున్నారు. అందులో భాగంగా పాదచారుల పాదాలకు ఆయిల్‌ మసాజ్ చేస్తూ భక్తుల సేవలో తరిస్తున్నారు. సుదూర ప్రాంతాల నుంచి వ్యయ ప్రయాసలకోర్చి నడిచి వస్తుంటారు. మండుటెండను లెక్క చేయకుండా నడక సాగిస్తున్న భక్తులు మార్గమధ్యలో కాళ్లనొప్పులతో ఇబ్బంది పడుతున్నారు. భక్తుల కాళ్ల నొప్పులు తగ్గించి వారికి ఉపశమనం ఇచ్చేందుకు యువకులు పాదసేవ ప్రారంభించారు.
సున్నిపెంటకు చెందిన ఒట్టి వెంకటరెడ్డి పర్యవేక్షణలో శ్రీశైల శివసేవా సమితి ఆధ్వర్యంలో దాతల సహకారంతో ఆయిల్‌ మసాజ్ కేంద్రం, వైబ్రేషన్‌ యంత్రాలను ఏర్పాటు చేసి మూడేళ్లుగా సేవలు అందిస్తున్నారు. వెంకటాపురం నుంచి నాగలూటి క్షేత్రం మీదుగా పెచ్చెర్వు గూడెం చేరుకున్న పాదచారులు మసాజ్ చేయించుకుని ఉపశమనం పొందుతున్నారు. సున్నిపెంటకు చెందిన దాదాపు 50 మంది యువకులు విడతల వారిగా పాదచారుల పాదాలకు మసాజ్ చేస్తూ భక్తుల సేవలో తరిస్తున్నారు. ఒక్కో విడతలో 10 మందికి పైగా యువకులు పాల్గొంటున్నారు. శివ సేవా సమితి ఆధ్వర్యంలో 17 ఏళ్లుగా పెచ్చెర్వులో ఉచిత వైద్య శిబిరాలు నిర్వహిస్తున్నారు. వైద్యులు అందుబాటులో ఉండి పాదచారులకు సేవలందిస్తున్నారు.
|
|