ప్రభుత్వ ష్యూరిటీతో రుణాలు.. ఉమెన్స్ డే సందర్భంగా టీడీపీ కొత్త హామీ.. రిజిస్ట్రేషన్ కూడా స్టార్ట్

అంతర్జాతీయ మహిళా దినోత్సవం సందర్భంగా టీడీపీ అధినేత చంద్రబాబు నాయుడు మహిళలకు శుభాకాంక్షలు తెలియజేశారు. ఈ క్రమంలోనే పై చదువులు చదవాలనుకునే విద్యార్థినులకు చంద్రబాబు మరో హామీ ఇచ్చారు. తాము అధికారంలోకి వస్తే కలలకు రెక్కలు పేరిట కొత్త పథకాన్ని తెస్తామని ఎక్స్ వేదికగా పోస్ట్ చేశారు. మహిళలంటే సమాజంలో సగం జనాభా మాత్రమే కాదు. సమాజ శక్తిలో సగమని చంద్రబాబు ట్వీట్ చేశారు. మహిళలను తోబుట్టువుల్లా చూసిన ఏకైక పార్టీ తెలుగుదేశమనీ.. వారి ఆత్మగౌరవాన్ని నిలబెట్టి, వారిలో ఆత్మవిశ్వాసం నింపి, ఆర్థిక స్వావలంబనకు నిరంతరం పని చేసింది తెలుగుదేశం పార్టీనని చంద్రబాబు పేర్కొన్నారు.

" విద్య, ఉద్యోగాల్లో మహిళా రిజర్వేషన్లు వంటి విప్లవాత్మక నిర్ణయాలతో ఆడబిడ్డల జీవితాల్లో వెలుగులు నింపింది తెలుగుదేశం. మహిళలను మహాశక్తులుగా మార్చేందుకు హామీ ఇచ్చిందే మహాశక్తి పథకం. ఈ పథకం కింద ఇంట్లో చదువుకునే పిల్లలకు ఒక్కొక్కరికి ఏడాదికి రూ 15,000 చొప్పున ఆర్థిక సహాయం, ప్రతి మహిళకు నెలకు రూ.1,500ల ఆడబిడ్డ నిధి, ఉచిత బస్సు ప్రయాణం, ఏడాదికి ఉచితంగా 3 గ్యాస్ సిలిండర్లు చొప్పున అందిస్తాం. అలాగే ఆర్థిక పరిస్థితులు అనుకూలించని కారణంగా మన ఆడబిడ్డలు ఇంటికే పరిమితం కాకూడదు అన్న ఆశయంతో, 'కలలకు రెక్కలు' అనే పథకాన్ని మన ప్రభుత్వం వచ్చాక అమలుచేయబోతున్నాం" అని చంద్రబాబు నాయుడు ట్వీట్ చేశారు.

ఇంటర్ పూర్తైన విద్యార్థినులు దేశంలో ఎక్కడైనా చదువునే విధంగా ఉన్నత చదువుల కోసం కలలకు రెక్కలు పథకాన్ని తెస్తామని చంద్రబాబు తెలిపారు. ఈ పథకం కింద విద్యార్థినులు తీసుకునే రుణాలకు ప్రభుత్వమే పూచీకత్తుగా ఉంటుందనీ.. కోర్సు కాలానికి ఋణంపై వడ్డీ కూడా ప్రభుత్వమే భరిస్తుందని హామీ ఇచ్చారు. కలలకు రెక్కలు పథకంలో మీ పేరును ఇప్పుడే నమోదు చేసుకోండి అంటూ చంద్రబాబు ట్వీట్ చేశారు. మరోవైపు నిజం గెలవాలి యాత్రలో భాగంగా కర్నూలు జిల్లాలో పర్యటిస్తున్న నారా భువనేశ్వరి ఈ పథకాన్ని తొలుత ప్రకటించారు. పథకంలో భాగంగా ప్రొఫెషనల్‌ కోర్సులు నేర్చుకునే వారికి ప్రభుత్వ గ్యారంటీతో బ్యాంకు రుణాలు ఇవ్వనున్నట్లు భువనేశ్వరి చెప్పారు. వీటికి వడ్డీ పూర్తిగా ప్రభుత్వమే చెల్లిస్తుందని భువనేశ్వరి తెలిపారు.