అరకులోయ సమీపంలో ఘోర ప్రమాదం.. నలుగురు మృతి, ఐదుగురికి తీవ్ర గాయాలు
Andhra Pradesh Telugu | Suryaa Desk | Published : Sat, Mar 09, 2024, 11:26 PM
అల్లూరి సీతారామరాజు జిల్లాలో ఘోర రోడ్డు ప్రమాదం జరిగింది. అరకులోయ మండలం మాదల పంచాయతీ తుమ్మగుడ్లి సమీపంలో మూడు బైక్‌లు ఢీకొన్న ఘటనలో నలుగురు ప్రాణాలు కోల్పోయారు.. మరో ఐదుగురికి తీవ్ర గాయాలయ్యాయి. నందివలసలో శుక్రవారం రాత్రి జరిగిన శివరాత్రి జాతరకు వెళ్తుండగా ఈ ప్రమాదం జరిగింది. ఈ ఘటన రాత్రి 10.30 గంటల ప్రాంతంలో జరిగింది. మృతుల్లో చినలబుడు పంచాయతీకి చెందిన బురిడి హరి (22), అమ్మనాకాంత్‌ (9), లోతేరు పంచాయతీ మంజగుడకి చెందిన త్రినాథ్‌ (32), భార్గవ్‌ (4) ఉన్నారు.
ఇదే ప్రమాదంలో గాయాలపాలైన కొంతిలి మోహనరావు, గుబాయి సింహాద్రిని విశాఖ కేజీహెచ్‌కు తరలించారు. చినలబుడుకు చెందిన కిల్లో పరశురాం, సుజిత్‌కుమార్‌, ఆర్‌.డుంబ్రిగుడకు చెందిన కిల్లో సంతోష్‌ గాయాలపాలయ్యారు. మరో ఇద్దరు యువకుల పరిస్థితి విషమంగా ఉందని డాక్టర్లు చెబుతున్నారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు. ఈ ఘటన స్థానికంగా తీవ్ర విషాదాన్ని నింపింది.
|
|